Silaki 1
1
Kulumbaisha Busongo
1Busongo boonse bulaswa kuMwaami Lesa,
alimwi bulaba anguwe ciindi coonse.
2Ino ngani weenga wabelenga museese wakulweenge?
Ino ngani weenga wabelenga mindondo yamfula?
Alimwi ngani weenga wabelenga nshiku shitaeli?
3Ino ngani weenga weshiba kulaampa kwaliculu?
Ino ngani weenga weshiba kukomena
kwacishi ca paanshi?
Ino ngani weenga weshiba kulampa
kwacilindi calufu?
Alimwi ngani weenga weshiba
kulampa kwa busongo?
4Busongo mbobutaanshi kulengwa,
shintu shoonse kashitana kulengwa
kunyumfwishisha shintu abusongo
kwakalingaako kumatalikilo.
5Katupu kamaano nga maswi akwe Lesa
uyo uli kwiculu.
Bwikaalo bwakwe ngumulawo walyoonse alyoonse.
6Muyanda busongo ngani wakamuyubulwita?
Ino nshila shanguwo shiswiite maano ngani ushishi?
7Ngani ushi shoonse isho busongo mboshishi?
Ngani unyumfwisha shoonse busongo mboshinyumfwisha?
8Mpaali Womwi wabusongo,
weelete kuloondwa abuumbi,
uyo ukala pamupando wabwaami.
Eenka uyo nguMwaami Lesa.
9Lakwe ngowakalenga busongo
wakashibona akusheelesha
alimwi wakashibika mumilimo yakwe yoonse.
10Busongo ubo bulakala mubantu
anga cipo cakwe Lesa,
ncakwiila lakwe uyo wakapa abo bamusuni.
Shakuloonda Mwaami Lesa
11Kuloonda Mwaami Lesa
kulapa bubile buunji,
alimwi akukondwa,
kulapa kusangalala
amushini wacisangalalo.
12Kuloonda Mwaami Lesa
nkusangalasha moyo,
kulapa kukondwa,
akusekelela abuumi buteeli.
13Abo baloonda Mwaami Lesa,
shoonse shilaakuba kabotu
kushikila kumamanino.
Lesa ulaamukupa coolwe pabushiku bwakufwa kwanu.
14Kuloonda Mwaami Lesa ngomatalikilo busongo.
Bantu baluleme balaabutambula
kabacili mumala muli banyinawabo.
15Bulekala pakati kabantu lyoonse alyoonse,
alimwi abashikulu babantu abo
balaakupekwa busongo bwa sheenka isho.
16Kuloonda Mwaami Lesa mbobusongo bwiine bwiine,
bantu balaakuta ashisepo shambubo.
17Busongo bulasusha maanda abantu
asheesho shebasuni,
matala abo alasusha
shitebulwa shambubo.
18Kuloonda Mwaami Lesa mbobusongo bwancinencine,
bulapa luumuno abuumi bwa nkusu.
19Busongo bulacafwa kwishiba
akunyumfwisha shintu.
Boonse abo bacite busongo ubo,
bulaakuliisha bulemu bwabo.
20Kuloonda Mwaami Lesa ngomapapaminwa abusongo,
misampi yambubo mbuumi butamaani.
Kuli kasha
21Kuloonda Mwaami Lesa nkukusha shibiibi,
na busongo bwakalikana bukali bulacicaawo.
22Kukalala pataapu mulandu taciluleme sobwe.
Bukali bulanyonyoola mwiine uyo ubucite.
23Muntu ucite caamba cishiite
ulaacicata kushikila ciindi
cakwe celeete cashika,
pesule ulaakukondwa abuumbi.
24Maswi akwe ulaabika mumoyo
kushikila ciindi cakwe cikashiike.
Pesule bantu balaakutalika kwaamba
ayi muntu uyo ngwabusongo.
25Busongo bulicite kubuula kukweene, mubutala bwambubo,
sombi kusuna shakulambila
muntu mubiibi kulamubisha.
26Na koosuni busongo,
konkela mulawo lyalo Mwaami Lesa
ulaakukupa busongo ubo.
27Kuloonda Mwaami Lesa mbobusongo akulama tunshiyanshiya.
Kushomeka akubomba moyo
sheshikondelesha Mwaami Lesa uyo.
28Uteemikani pakuloonda Mwaami Lesa,
utashiciti amyooyo yobilo.
29Utabi muntu waamba shabubeshi pakati kabantu,
alimwi kocata mulomo wako.
30Utalilumbi kuloonda ayi
inga wawa akufwa nsoni,
lakwe Mwaami Lesa wayubulula
shisisitwe akukulensha nsoni pakati kabantu,
ceebo ceendo cako tecakalinga
cakuloonda Mwaami Lesa.
Moyo wako wakalinga mubeshi abuumbi.
Currently Selected:
Silaki 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.