Silaki 2
2
Shakwikala koshomeka kuli Lesa
1Omwanaangu nakosuni kusebensela Mwaami Lesa,
kolibambila kusunkwa amapesho.
2Ube amoyo ubotu,
alimwi ube muntu utalisukami
utasoowi moyo cabwangu
paciindi camapesho.
3Ukakatile Lesa kutamushiya,
pesule ukacane bulemu paciindi cakufwa.
4Cili coonse nceenga cacitika
kuli ndiwe citambule amaansa obilo,
muciindi cakutoshatosha mubuumi bwako
bololokete, libombye,
5awalo golodi baloobika mumulilo
balo bakasalwa balawaalwa
mumunyumbi wamapesho.
6Shoma Mwaami Lesa lyalo ulaakukucafwa
ukonkele nshila iluleme lyalo ulaakumushoma.
7Mwebo nomuloonda Mwaami Lesa,
amulindile nkumbu shakwe.
Mutaswi munshila inga mwaakuwa.
8Mwebo nomuloonda Mwaami Lesa, mumushomeshe,
lyalo teshi mukaalilwe kutambula cilambu.
9Mwebo nweenka nomuloonda Mwaami Lesa,
amushome shintu shibotu pabuumi bwanu,
mushome kukondwa kwalyoonse ankuumbu.
10Amwiibaluke mashalane akulukulu
mubone na nkwaali ayo akashoma Mwaami Lesa,
lakwe bamulesha nsoni?
sa nkobali abo bakalikakatisha kubona Mwaami Lesa,
lakwe bamushiya?
Sa kuli uyo wakasenga
cintu kuMwaami Lesa
lakwe kutamunyumfwa?
11Ncakwiila Mwaami Lesa ngumubotu
moyo alimwi ulicite nkumbu.
Ulalekelela milandu,
ulapulusha bantu paciindi camapesho.
12Mapesho kuli baabo bamoyo
ulefukite amaansa atacite ncito.
Mapesho kuli baabo bacita shibiibi
bacite myooyo yobilo pakupa.
13Mapesho kuli baabo bacite
uyumu alimwi utacite lushomo,
ceebo ca ceeco teshi bakacafwikwe.
14Mapesho kuli ndimwe
nomwakacileka kuyuma yuma.
Ino mulaakucita buyani
pabushiku Mwaami Lesa aakusa mukumoombolosha?
15Bantu baloonda Mwaami Lesa
balanyumfwa maswi akwe.
Boonse basuni Mwaami Lesa
balakonkela nshila shakwe.
16Bantu baloonda Mwaami Lesa
baleelesha kucita ncaayanda Mwaami uyo.
Bantu basuni Mwaami Lesa
balakonkela Milawo yakwe.
17Bantu baloonda Mwaami Lesa
balabambila limwi myooyo yabo,
balaliceesha pameenso aMwaami uyo.
18Balo bakaamba ayi,
“Tiye tuwite mumaansa a Mwaami Lesa,
kuteeshi mumaansa abantu, ceebo cakwaamba ayi nkumbu shakwe
nshinene bweenka mbuli bwaami bwakwe.”
Currently Selected:
Silaki 2: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.