Filimoni 1
1
1Ndime Paulo uyo uli muntolongo ceebo cakwe Klistu Jesu. Ndi amukwabesu Timoti. Tutoolembela ndiwe omukwabesu Filimoni musebenshinyineesu, 2nankashi yangu Apiya, Akipasi shilumambanyineesu munkondo ya muMushimu alimwi acoonde cibungana muŋanda yako.#Kolo 4:17
3Luse aluumuno shibe awebo kuswa kuli Lesa Ishiwesu aMwaami Jesu Klistu.
Lusuno alushomo lwakwe Filimoni
4Ndalumba Lesa wangu lyoonse ndinkuyeeya mumipailo yangu 5mukwiinga ndanyumfwa shalusuno lwako pabashomi boonse alushomo ndoocite muMwaami Jesu. 6Ndapaila kwaamba ayi kwiinda mukwaamba shalushomo lwako, bantu beshibe abuumbi shibotu shoonse nshetucite muli Klistu. 7Mukwaabo, lusuno lwako lwansangalasha alimwi akunjuminisha ceebo wasangalasha myoyo ya bashomi boonse.
Paulo mbwaakasengela Onesimasi
8Paceebo ceeco nebo ndalinga kweeletebo kukulwiita muli Klistu nceweelete kucita. 9Sombi ceebo ca lusuno ndakusenga, nakubi kwaamba ayi ndime Paulo mutumwi wakwe Klistu Jesu alimwi pacecino ciindi nendi muntolongo ceebo ca nguwe. 10Ono ntookusenga ceebo cakwe Onesimasi, uyo wakaba mwanaangu muli Klistu kaandi muntolongo.#Kolo 4:9 11Kale kale taakalinga kucite ncito kuli ndiwe, sombi cino ciindi inga waba anciito kuli ndiswe soonse, webo anebo.
12Ono ntoomuboosha kuli ndiwe, anu mukucita boobo cilibo anga ndakutumina amoyo wangu woonse. 13Ndalinga kusuni ayi nkalaakwe kuno kwaamba ayi anoncafwaako mumusena wako, ndyencili muntolongo ceebo ca Makani Abotu. 14Nakubi boobo nshisuni kukukakatisha ayi uncaafwe, sombi ndisuni kwaamba ayi ulisuminine omwiine.
15Mpashi Onesimasi wakakushikwa kuli ndiwe ciindi ciniini kwaamba ayi ese ekale awebo lyoonse. 16Ono bulya taabetebo musha, sombi uleenda pamusha, ngumukwanu usunikwi muli Klistu. Nebo ndimusuni abuumbi, sombi kuli ndiwe ulaakwiindaawo mukwiinga ngumusha wako alimwi ngumukwanu muMwaami Jesu.
17Aboobo na ulaamba ayi ndimusebenshinyoko, tambula Onesimasi bweenka mbweenga wantambula. 18Ono na kuli ncaakakubishisha nabi kukukweleta, ulipilishe ndime. 19Maswi aya ntooalemba alyaansa lyangu ayi, “Nebo nePaulo ndaakukulipila.” Mukwaamba boobo, nsheelete kukwiibalusha ayi nkongole njoocite kuli ndime, mbuumi bwako omwiine. 20Paceebo ceeco mukwaabo, ndakusenga ayi uncaafwe pamakani aya ceebo ca Mwaami. Nsangalashe kweelana ambooli mukwesu muli Klistu.
21Pakulemba makani aya, ndishinishite ayi ulaakucita kweelana ambondasenga alimwi ayi ulaakwiindilishaawo. 22Ntoosenga alimwi ayi ukamambileko mwakoona ceebo ntooshoma kwaamba ayi Lesa ulaakukumbula mipailo yanu akumboosha kuli ndimwe.
Kwaansha kwakweelaako
23Epafulasi uyo ngombetaakwe muntolongo ceebo cakwe Klistu, wakwaansha.#Kolo 1:7; 4:12 24Maako, Alisitakasi, Dimasi alimwi aLuka basebenshima abalo bakwaansha.#Mili 12:12, 25; 13:13; 15:37-39; Kolo 4:10; Mili 19:29; 27:2; Kolo 4:10; Kolo 4:14; 2 Timo 4:10; Kolo 4:14; 2 Timo 4:11
25Luse lwa Mwaami Jesu Klistu lube amwebo noonse.
Currently Selected:
Filimoni 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.