Joni 15
15
Jesu ngomunyansa wancinencine
1“Nebo ndi munyansa wancinencine alimwi baTa mbobene muunda. 2Balatimbula musampi uli woonse muli ndime utacati shisepo, sombi musampi uyo ucata shisepo balaukwesoola misampi yamweela kwaamba ayi ube kabotu akucata shisepo shiinji kwiindaawo. 3Mwebo mwasalashikwa kale kwiinda mumaswi ngondamwaambila. 4Amukalilile muli ndime anebo ndaakukalilila muli ndimwe. Taaku musampi utabete kucinyina weenga wacata shisepo. Inga wacatabo shisepo na kooli kucinyina. Mbweeke ubo amwebo tamukoonshi kucata shisepo na mwabuula kukalilila muli ndime.
5“Nebo ndi munyansa, mwebo muli misampi. Uyo woonse ukalilila muli ndime anebo muli nguwe, ulaakucata shisepo shiinji. Ceebo kwakubula ndime taaku nceenga mwaciita. 6Na umwi wabula kukalilila muli ndime, ulasowekwa bweenka mbuli musampi watemwa, aboobo ulayuma. Misampi ya mushobo uyo ilabunganishikwa akuwaalwa mumulilo yapya. 7Na mwakalilila muli ndime aalo maswi angu akalilila muli ndimwe, inga mwaseenga cili coonse ncemusuni, mulaakupekwa. 8Na kamucata shisepo shiinji, ico inga caletela bulemu baTa, alimwi cilaakutondesha ayi muli bashikwiiya bangu bancinencine. 9Bweenka mbuli baTa mbobansuni, mboomusuni amwebo. Aboobo amukalilile mulusuno lwangu. 10Na mulakonkela milawo yangu, mulaakukalilila mulusuno lwangu, bweenka mbuli mboonkonkela milawo ya baTa akukalilila mulusuno lwabo.
11“Ndamulwiita shintu ishi kwaamba ayi kusangalala kwangu kube muli ndimwe alimwi akwaamba ayi kusangalala kwanu kushikeewo. 12Mulawo wangu ngooyu, amusunane bweenka mboomusuni anebo.#Joni 13:34; 15:17; 1 Joni 3:23; 2 Joni 5 13Taaku lusuno lunene muntu ndweenga wabaalo kwiinda loolu lwakwaamba ayi aabe buumi bwakwe ceebo ca babye. 14Na kamukonkela kwiisha kwangu, nkokwaamba ayi muli babyaanji. 15Teshi kamwiiteewo ayi basebenshi ceebo musebenshi taashibi shitoocita mwaami wakwe. Sombi ntoomwiita ayi babyaanji ceebo shoonse nshendakanyumfwa kuli baTa, ndakamulwiita. 16Teshi ndimwe mwakansala, sobwe. Sombi ndime ndakamusala kwaamba ayi mukacate shisepo isho shitaloobi. Lyalo baTa balaakumupa cili coonse nceshi mukasenge muliina lyangu. 17Anu mulawo wangu ngwakwaamba ayi musunane.
Bantu bamucishi ca panshi mbobapata bene Klistu
18“Na bantu bamucishi bakamupaate, mukashibe ayi bakataanguna kupata ndime. 19Nemwalinga kwikala mbuli bamucishi ca panshi naakwiinga kabamusuni. Ono mukwiinga mwebo tamubete bamucishi, sombi ndakamusala kuswa muli ncico, balimupatite. 20Amwiibaluke maswi ngondakamwaambila ayi, ‘Musebenshi taindi mwaami wakwe.’ Na nebo bakampensha amwebo balaakumupensha. Na bakakonkela kwiisha kwangu amwebo kwiisha kwanu balaakukukonkela.#Mate 10:24; Luka 6:40; Joni 13:16 21Sombi balaakucita shintu shoonse ishi pali ndimwe ceebo ca liina lyangu mukwiinga tabamwishi uyo wakantuma. 22Nintakwe kwisa mukubaiisha, naakwiinga tabacite mulandu pacibiibi cabo, sombi tabacite amwakuyubila. 23Uyo upatite ndime ulipatite abaTa. 24Nintakwe kucita shintu pali mbabo isho shitana kucitawo kale muntu nabi womwi, naakwiinga tabacite mulandu pacibiibi cabo. Nabi bakabona shintu shoonse ishi, bakatupata soonse, nebo abaTa. 25Ishi shakacitika kweelana ambokulembetwe muMilawo yabo ayi, ‘Bakampatabo pataapu ceebo.’#Kulu 35:19; 69:4
26“Ono aakwisa Mucafwi, ngweshi nkamutumine kuswa kuli baTa, Mushimu wiisha shalushinisho uyo uswa kuli baTa, ngweshi akasansulule shapali ndime. 27Amwebo muli bakamboni bangu mukwiinga mwekala anebo kuswa kumatalikilo.
Currently Selected:
Joni 15: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.