Joni 16
16
1“Ndamulwiita makani aya kwaamba ayi mutakacileeki kushoma. 2Balaakumutanda mushoonde shabo. Ono ciindi cilaakushika bantu beshi bakanoomucaya, ndyeshi bakayeeye ayi batoosebensela Lesa. 3Balaakucita boobo mukwiinga tababeshi baTa anebo tabenshi. 4Sombi ndamulwiitila limwi shintu ishi ayi ciindi caakushikila mukeebaluke ayi ndakamulwiitaawo kale.
Milimo ya Mushimu Usalashi
“Kumatalikilo nshikwe kumulwiitila limwi makani aya ceebo ndakalingaanu. 5Bulya ntooya kuli wooyo wakantuma, nakubi boobo taakuuwo nabi womwi pakati kanu utoonjipusha nkoontooya. 6Myoyo yanu yoongumana ceebo ndamulwiita makani aya. 7Ntoomulwiita calushinisho ayi ncibotu abuumbi kuli ndimwe kwaamba ayi nje. Mukwiinga na mbule kuya Mucafwi teshi akese kuli ndimwe. Sombi na nje, ndaakumutuma kuli ndimwe. 8Lyalo aakwisa Mucafwi uyo, ulaakushinina bamucishi shakubisha, shabululami alimwi ashaboomboloshi bwakwe Lesa. 9Ulaakubashinina pacikani cakubisha ceebo tabashomi muli ndime. 10Ulaakubashinina pacikani ca bululami ceebo ntooya kuli baTa, uko nkweshi mukabule kumbona alimwi. 11Ulaakubashinina pacikani ca boomboloshi mukwiinga Satana muleli wa pacishi ca panshi woomboloshekwa kale.
12“Ndicite maswi akumwaambila aanji, sombi inga tamwaatambuli cakusangalala pacecino ciindi. 13Ono Mushimu wiisha lushinisho pakwisa, lyalo ulaakumutanjilila mushintu shoonse shalushinisho. Ceebo teshi akaambe shaakwe mwiine, sombi ulaakusansulula sheesho nshaakanyumfwa kuli baTa alimwi akumulwiita shintu nsheshi shikese kunembo. 14Ulaakundetela bulemu mukwiinga ulaakubwesa maswi angu akumusansulwita. 15Shoonse sha baTa nshaangu. Nceceeco ncendaambila ayi Mushimu ulaakubwesu maswi angu akumusansulwita.
Buumba alimwi akusangalala
16“Muciindi ciniini citoosa teshi mukamboneewo, sombi paakwiinda acimwi ciindi ciniini, mulaakumbona.”
17Mpomunyaawo bashikwiiya bakwe bamwi bakatalika kwiipushanya ayi, “Anu cikani ici cilaambanshi? Batootwaambila ayi, ‘Muciindi ciniini citoosa teshi mukamboneewo, sombi paakwiinda acimwi ciindi ciniini mulaakumbona.’ Peculu lya waawo baamba ayi, ‘Mukwiinga ntooya kuli baTa.’ 18Anu maswi aya akwaamba ayi, ‘Muciindi ciniini’ alaambanshi? Tatucishi ncebatokwaamba.”
19Jesu wakeshiba ayi batooyanda kumwiipusha, aboobo wakabaambila ayi, “Sa mutokwiipushanya pacikani ncendaamba ayi, ‘Muciindi ciniini citoosa teshi mukamboneewo, sombi paakwiinda acimwi ciindi ciniini mulaakumbona?’ 20Ntoomulwiita calushinisho ayi mwebo mulaakulila akuungumana, sombi bamucishi balaakusangalala. Mulaakuungumana, sombi kuungumana kwanu kulaakuba kusangalala. 21Na walutundu uli pakati mumala mwabuka, ulapenshekwa ceebo ciindi cakupenga kwakwe cashikila. Sombi na wapulukaamo ulalubaako akupenga kwakwe ceebo ulasangalala ayi mwaana washalwa mucishi. 22Amwebo mbweeke ubo, bulya mulyuungumene mumyoyo. Sombi ndaakumubona alimwi, lyalo mulaakusangalala abuumbi. Kusangalala uko, taaku muntu eshi akakukusheewo pali ndimwe.
23“Pabushiku ubo taaku nceshi mukansenge. Ntoomulwiita calushinisho ayi baTa balaakumupa cili coonse nceshi mukasenge muliina lyangu. 24Kushikila asunu, tamuna kusengaawo kale muliina lyangu. Ono kamusenga, munanootambula kwaamba ayi musangalale cancinencine.
Jesu mbwaakakoma bubi bwa mucishi ca panshi
25“Ndamwaambila shintu ishi mumapinda. Nakubi boobo ciindi cilaakushika ndyeshi nkabule kwaambila mumapinda, sombi ndaakumusansulwita cakutashisa shapali baTa. 26Pabushiku ubo, mulaakusenga muliina lyangu. Nshintokwaamba ayi ndaakumusengelaako kuli baTa 27ceebo baTa beene balimusuni. Balimusuni ceebo mulinsuni alimwi mwakashoma ayi ndakaswa kuli Lesa. 28Ncakwiila ndakaswa kuli baTa akwisa mucishi ca panshi, alimwi bulya ntooswa mucishi akuboolela kuli baTa.”
29Lyalo bashikwiiya bakwe bakaamba ayi, “Ncakwiila ono mutokwaamba cakutashisa tamutokwaambila mumapinda. 30Ono tweshiiba ayi mulishi shintu shoonse alimwi taakuuwo aceebo muntu nceenga wamwiipushisha. Aboobo twashooma ayi mwakaswa kuli Lesa.”
31Jesu wakabeepusha ayi, “Sa mwashooma ono? 32Ciindi cilaakushikila, ncakwiila cashikila kale cakupalanganishikwa kuya mwanu mwanu. Lyalo mulaakunshiyabo neenka. Sombi nshibete neenka mukwiinga baTa bali anebo lyoonse. 33Ndamwaambila makani aya kwaamba ayi mube aluumuno mukushoma muli ndime. Mucishi ca panshi mulaakupenshekwa. Nakubi boobo amukalike myoyo, bubi bwa mucishi cino ndabukoma.”
Currently Selected:
Joni 16: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.