Esekelo 1
1
CILI ANGA NCILOTO CAKUTAANGUNA
(1:1—7:27)
Esekelo mbwaakabona cuuna ca bwaami ca Mwaami Lesa
1Mumwaaka wamakumi otatwe, mumweenshi wane pabushiku bwasanu ndindakalinga kwikala abasha kulubasu lwa Mulonga wa Keba mucishi ca Babiloni, liculu lyakacaluka. Mpeeke ndakabona shili anga nshiloto shakaswa kuli Lesa.#Ciyu 19:11 2Pabushiku bwasanu bwa mweenshi, mumwaaka wasanu kuswa ciindi mwaami Jeoiyakini ndyaakatolwa mubusha,#2 Baami 24:10-16; 2 Maka 36:9-10 3maswi a Mwaami Lesa akashinkila nebo neEsekelo nemupailishi mwanaakwe Busi ndindakalinga kuMulonga wa Keba mucishi ca bene Babiloni. Uko nkusu shakwe shakanselukila.
4Ndindakalangilisha, ndakabona cipuupu kaciswita kumatwa. Kubeka kwa mfula kwakalinga kuswa mulikumbi linene kalishingulukitwe amumuni unene. Pakati ka mabeebe pakalinga kuboneka cintu cakalinga kubembelabo anga ngubulonse. 5Pakati ka mabeebe pakalinga shilengwa shuumi shakalinga kucite mibili anga nja bantu.#Ciyu 4:6 6Sombi comwi acomwi cakalinga kucite shiwa shone amapapaminwa one. 7Myeendo ya nshisho yakalinga koololokete. Shoondo sha nshisho shakalinga kuboneka anga nsha moombe alimwi shakalinga kubembela anga ngubulonse wafulwa. 8Kunshi lya mapapaminwa ayo one, kumbasu shone sha nshisho, shakalinga kucite maansa mbuli a muntu. Shoonse shone shakalinga kucite shiwa alimwi amapapaminwa. 9Mapapaminwa a nshisho akalinga kukumene. Pakweenda shakalinga kweenda kashicatene cakutasandulula mibili ya nshisho.
10Cilengwa comwi acomwi cakalinga kucite shiwa shone shipusenepusene. Ciwa ca kunembo cakalinga ca muntu, cakululyo cakalinga ca nkalamu, ca kucipiko cakalinga ca musune acalo cakwisule cakalinga ca mumbankwashi.#Ese 10:14; Ciyu 4:7 11Anu ubo shiwa sha nshisho mboshakalinga. Shilengwa isho shakalinga kucite mapapaminwa obilo akalinga kufungulukite cakwaamba ayi akalinga kukumene aacilengwa ncencakalinga kubambene aco kumbasu shobilo. Mapapaminwa amwi obilo akalinga kufwekete mubili wa ncico. 12Cilengwa comwi acomwi cakalinga kulangite kumbasu shoonse shone cakwaamba ayi pakweenda likoto ilyo lyakalinga kuya kuli koonse nkweenga kalisuni cakutasandulukaawo.
13Shilengwa isho shakalinga kubonekabo anga ngamakalangasha a mulilo atoonyaka nabi cimunimwenge. Mulilo wakalinga kweenda kuya kunembo akuboola kwisule pashilengwa isho. Kwakalinga kutuba alimwi kuswa mumulilo uyo mwakalinga kuswa mabeebe.#Ciyu 4:5 14Shilengwa isho shakalinga kucicabo anga nkubeka kwa mfula uku akooku.
15Ono ndindakalanga shilengwa isho ndakabona mawilo one panshi. Nkokwaamba ayi liwilo lyomwi kulubasu lwa cilengwa comwi acomwi. 16Mawilo oonse one akalinga kukoshenye. Liwilo lyomwi alyomwi kubekabeka anga ndibwe lyamakwebo alimwi lyomwi alyomwi lyakalinga kuboneka anga lilicite liwilo limwi licilingene mukati. 17Ono pakweenda, akalinga kululama kulila lubasu pambasu shone uko nkweenga kwalanga shilengwa isho. Mawilo taakalinga kupetooka pakweenda shilengwa isho. 18Mawilo aya akalinga alaamfu akankamika alimwi oonse one akalinga kucite meenso kushinguluka. 19Na shilengwa isho sheenda, mawilo akalinga kumbasu sha nshisho, aalo nkweenda. Na shilengwa isho shanyamuka kuswa panshi, aalo mawilo nkunyamuka. 20Shilengwa isho shakalinga kuya kuli koonse nkweenga kashisuni. Aalo mawilo akalinga kucita ceenka ceenga cacita shilengwa isho ceebo shilengwa isho nsheshakalinga kwaaendelesha. 21Na shilengwa isho sheenda, aalo nkweenda, na sheemikana aalo nkwiimikana. Na shanyamuka kuswa panshi aalo mawilo nkunyamuka ceebo shilengwa isho nsheshakalinga kwaaendelesha.#Ese 10:1; Ciyu 4:2-3
22Peculu lya shilengwa isho pakalinga cintu cakalinga kufungulwitwe ico cakalinga kuboneka anga ngumusena ufongomene uyo wakalinga kubekabeka anga ndibwe lya maanshi likankamika. 23Munshaacintu ico, mapapaminwa obilo a cilengwa comwi acomwi akalinga kufungulwitwe cakwaakumanya kumapapaminwa acimwi ncecakalinga kubambene aco. Mapapaminwa amwi obilo akalinga kufwekete mubili wa ncico. 24Ndishakeenda, ndakanyumfwa coongo ca mapapaminwa a nshisho kaawootabo anga ngamaanshi, ee, anga ndiswi lyakwe Lesa shinkusu shoonse ncakwiila anga nciyobeyobe ca likoto lya bashilumamba. Na sheemikana, shakalinga kufunga mapapaminwa a nshisho.
25Mpeeke kwakaswa liswi peculu lya musena ufongomene uyo wakalinga peculu lya mitwi ya nshisho ndishakalinga kwiimfwi mapapaminwa kaafungitwe. 26Peculu lya musena ufongomene pakalinga cintu cakalinga kuboneka anga ncuuna ca bwaami cakapangwa kumabwe amakwebo eetwa ayi safaya. Peculu lya cuuna peene ico, pakalinga cakalinga kuboneka anga ngumuntu. 27Kuswa mubukome bwakwe kuya peculu, ndakabona cakalinga kuboneka anga nceela casalala kukulungula mumulilo. Kuswa mubukome kuya panshi wakalinga kuboneka anga ngumulilo alimwi wakalinga kushingulukitwe amumuni utuba tuu.#Ese 8:2 28Ono bweenka buboneka nkongolo mumakumbi pabushiku bwa mfula, mbweeke ubo bulemu bumushingulukite mbobwakalinga.
Anu uyo ngowakalinga mumuni utowa uyo utondesha bulemu bwa Mwaami Lesa. Ndindakabubona, ndakafukama cakushisha ciwa panshi. Mpomunyaawo ndakanyumfwa liswi lyakalinga kwaamba kuli ndime.
Currently Selected:
Esekelo 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.