Bene Loma 9
9
Lesa abantu bakwe mbaakasala
1Nshentokwaamba nshalushinisho alimwi nshibeci ceebo ndi wakwe Jesu Klistu. Moyo wangu, uyo weendeleshekwa aMushimu Usalashi, awalo ulandwiita ayi nshintoobeca 2pakwaamba ayi ndicite buumba bunene abuumbi alimwi ndapenshekwa mumoyo ceebo ca baJudama. 3Necalinga kukonsheka, naakwiinga nebo ndasumina ayi Lesa anshingane akumpansaanya aKlistu mumusena wa bene misheesu. 4Aba mbene Isilaeli abo Lesa mbaakasala ayi babe bana bakwe akubabonesha bulemu bwakwe. Lesa wakapanganaabo shipangano alimwi akubapa Milawo. Wakabeeisha mbobeelete kumulambila akubalasha shintu nsheshi akabacitile.#Kulo 9:4 5Balo bakaswa mucishiko ca mishobo yoonse ya bene Isilaeli. Alakwe Klistu kwiinda mukushalwa kwabuntu ngwa mumushobo wabo. Aalumbaishikwe lyoonse Lesa uyo weendelesha shintu shoonse. Ameni.
6Ono nshintokwaamba ayi Lesa taakwe kucita kweelana akushomesha kwakwe ceebo teshi bene Isilaeli boonse babandwa ayi mbantu bakwe Lesa cancinencine. 7Alimwi teshi bamulunyungu lwakwe Abulaamu baambwa ayi mbana bakwe Lesa cancinencine. Lesa mwiine wakaambila Abulaamu ayi, “Bamulunyungu lwakwe Isaki mbweshi bakabe bana bako.”#Mata 21:12 8Aboobo ici cilaamba ayi teshi bana bakwe Abulaamu boonse beetwa ayi mbana bakwe Lesa. Sombi bana bakwe Abulaamu abo bakashalwa kweelana akushomesha kwakwe Lesa, mbobeelete kwiitwa ayi mbana bakwe Abulaamu cancinencine. 9Anu maswi ngaakaamba Lesa pakushomesha Abulaamu ngakwaamba ayi, “Ndaakwisa paciindi ceenka cino mwakali. Paciindi ico Sala ulaakunoocite mwaana musankwa.”#Mata 18:10
10Teeshibo ceeco ceenka, sombi baana basankwa bobilo bakwe Labeka bakashalwa kumushali wesu mukulukulu, Isaki. 11-12Sombi baana kabatana kushalwa, nkokwaamba ayi kabatana kucitawo cibotu nabi cibiibi, Lesa wakaambila Labeka ayi, “Munenebantu ulaakunoosebensela mwanikebantu.” Kusalwa kwa mwanikebantu kwaakacitika kweelana aLesa mbwaakabamba. Takukwe kucitika ceebo ca milimo njebakacita, sombi nkusala kwakwe Lesa mwiine.#Mata 25:23 13Bweenka bwaamba Malembo akwe Lesa ayi, “Ndakasuna Jakobo, sombi ndakasuula Esau.”#Mala 1:2-3
14Ono sa inga twaamba ayi Lesa taaluleme? Sobwe, napaceyi. 15Ceebo Lesa wakaambila Mose ayi, “Na ndasuna kunyumfwila nkumbu muntu umwi, ndaakumunyumfwila. Na ndasuna kuba abuumba pamuntu umwi, ndacita mbomunya ubo.”#Kulo 33:18 16Ono aboobo kusala uku takucitiki kweelana aceeco muntu ncaasuni nabi ncaacita, sombi cinene ninkumbu shakwe Lesa. 17Mukwiinga muMalembo Lesa wakaambila Falawo ayi, “Ndakakupa bwaami kwaamba ayi kwiinda muli ndiwe nkatondeshe nkusu shangu akulengesha ayi bantu boonse mucishi ca panshi banshiibe.”#Kulo 9:16 18Anu Lesa ulanyumfwila nkumbu abo mbaasuni kunyumfwila akulengesha cimpamya kubamwi abo mbaasuni.
Shabukali alimwi ankuumbu shakwe Lesa
19Ono umwi pali ndimwe inga weepusha ayi, “Ino ono na Lesa mbwaacita ubo, ulapetanshi bantu milandu? Ino ngani weenga wakasha Lesa kucita nshaasuni?” 20Ino webo ndiwaani kwaamba ayi upikishanye aLesa? Sa nongo inga yaambila wakeebumba ayi, “Wakamumbilanshi bobulya?”#Isa 29:16; 45:9 21Sa shikubumba mwiine taacite nkusu shakubumbamo nongo shobilo mubulongo mbwaacite, imwi ya makwebo anene alimwi aya makwebo aniini?
22Mbweeke ubo Lesa mbwaakacita. Wakalinga kusuni kubatondesha bukali bwakwe kwaamba ayi bantu beshibe nkusu shakwe. Nakubi boobo wakanyumfwila nkumbu akulekelela baabo boonse mbwaakalinga kusuni kupa mulandu, abo bakalinga kweelete kunyonyoolwa. 23Wakacita boobo kwaamba ayi ayubulule bulemu bwakwe bwancinencine kuli ndiswe, sotwakanyumfwilwa nkumbu akubambilwa limwi ayi tukatambuleko bulemu ubu. 24Ceebo ndiswe baabo mbaakasala, kuteshi kuswa kumushobo wa baJuda weenka, sombi akubaswamashi bakunsengwe. 25Kweelana abwaamba Lesa mulibuku lyakalemba Osiya mulaluki mukulukulu ayi,
“Abo batakalinga bantu bangu
ndaakubeeta ayi, ‘Bantu bangu.’
Amushobo uyo ngoontakwe kusuna
ndaakuusuna.#Osi 2:23
26Kumusena uko Lesa nkwaakabaambila ayi, ‘Tamwishi bantu bangu,’
nkomunya uko balakwiitwa ayi, ‘Bana bakwe Lesa muumi.’ ”#Osi 1:10
27Alakwe Isaya mulaluki mukulukulu wakaamba cankusu pabene Isilaeli ayi, “Nakubi kwaamba ayi bene Isilaeli mbaanji anga ngumuseese uli muloombe lwa lweenge, sombi mbaniini beshi bakapulushikwe. 28Ceebo Mwaami Lesa, ulaakufwambaana koombolosha cankusu bantu boonse.”#Isa 10:22-23 29Ici cilibo bweenka bwakaamba Isaya kale kale ayi, “Mwaami Lesa shinkusu shoonse naatakwe kutushiila bantu bamwi bamumushobo wesu, naakwiinga twakaloba anga nindabala ya Sodoma alimwi aGomola.”#Isa 1:9
Makani Abotu aalo ngabene Isilaeli
30Ncetutokwaamba nceeci, baswamashi bakunsengwe tebakalinga kweelesha kulilulamika pameenso akwe Lesa. Sombi Lesa wakabalulamika ceebo bakamushoma. 31Nakubi boobo bene Isilaeli abo bakalinga kweelesha kululamikwa pameenso akwe Lesa kwiinda mukukonkela Milawo, bakaalilwa. 32Ino ceebonshi bakaalilwa? Ceebo bakalinga kusuni kuba bantu baluleme kwiinda mukukonkela Milawo kuteshi kushoma Lesa. Bakalisuntula mulibwe lisuntula bantu. 33Bweenka bwaamba Malembo akwe Lesa ayi,
“Amunyumfwishishe, ndabiika libwe muSiyoni
ndibalisuntulaako bantu.
Ncakwiila ndabiika mwaandami ngweshi bakanoolisuntulaako.
Sombi uyo woonse ushoma muli nguwe teshi akanyumfwe nsoni.”#Isa 28:16
Currently Selected:
Bene Loma 9: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
