Bene Loma 7
7
Cikoshanyo ca pacikwati
1Nobamakwesu, ntokwaamba kuli baabo beshi shaMilawo. Mulishi kabotu kwaamba ayi Milawo ileendeleshabo muntu kaacili muumi. 2Atwaambe bobulya, mwanakashi weebetwe uleendeleshekwa amulawo wa cikwati kulilabo ibaye kaatana kufwa. Sombi na wafwa, mwanakashi ulaangululwa kumulawo uyo. 3Paceebo ceeco na mwanakashi weebetwe wakumana amusankwa umwi ibaye kaacili muumi, nkokwaamba ayi wacita bulale. Sombibo na ibaye wafwa mwanakashi ulaangululwa kumulawo wa cikwati. Aboobo na weebwa kumusankwa umwi teshi kucita bulale.
4Mbocibete akuli ndimwe nobamakwesu. Kweelana amakani aMilawo mwebo mwakafwa akuba shipansha sha mubili wakwe Klistu, uyo wakabushikwa kuswa kubafu kwaamba ayi tusebensele Lesa milimo ibotu. 5Ceebo nditwakalinga kwikala mubuumi bwa buntu, kuyandishisha kubisha uko kwakayuminishikwa aMilawo, kwakalinga kweendelesha buumi bwesu. Aboobo kwakatuletela lufu. 6Ono Lesa wakatwaangulula kuswa kuMilawo mukwiinga twakafwa kuli njiyo yakalinga kutwaangite. Aboobo mubwikaalo bukulukulu bwakukonkelabo Milawo ilembetwe twakaswaamo, bulya Mushimu Usalashi ngootucafwa kusebensela Lesa munshila ipya.
Shamilawo ashabubi
7Ino ono twaambe buyani? Sa twaambe ayi Milawo njibiibi? Sobwe, tabwishi mbocibete ubo! Sombi njiMilawo yakalengesha ayi nshibe bubi. Nikuteshi Milawo yaamba ayi, “Utabi amunyono pashintu sha mubyo”, naakwiinga nshishibiiwo lunkumbwa lwa mushobo uyu.#Kulo 20:17; Duto 5:21 8Sombi kwiinda muMilawo iyi, bubi bwakacana nshila yakulengesha miyeeyo yakukumbwa shintu shimwi shoonse muli ndime. Ceebo na taaku Milawo, bubi tabucite nkusu. 9Kaantana kwishiba bwaamba Milawo ndakalinga muumi, sombi ndindakeshiba shaMilawo kuyandishisha kubisha kwakakomena, kweelana ambocibete ndakafwa. 10Mpeeke Milawo yakalinga kweelete kuletela bantu buumi, nebo yakandetela lufu. 11Ceebo bubi bwakacana nshila muMilawo alimwi kwiinda muMilawo bwakambeca akuncaya.#Mata 3:13
12Nkokwaamba ayi Milawo ilisalalite alimwi mulawo uli woonse ulisalalite, uliluleme alimwi uli kabotu. 13Sa ici cilaamba ayi cintu cibotu ici ncecakanengesha ayi mfwe? Sobwe! Sombi mbubi bwakalengesha kwiinda mukusebensesha cintu cibotu ico kwaamba ayi bubi buboneke mbuli mbobubete. Aboobo kwiinda muMilawo bubi bulabicila limwi.
Inkondo icitika mumuntu
14Tulishi kwaamba ayi Milawo yakaswa kuli Lesa. Sombi nebo ndimuntu alimwi ndimusha wa bubi. 15Nshishi na nciinshi nceencita ceebo nshiciti ceeco nceensuni ayi ncite, sombi ndacita ceeco nceempatite.#Gala 5:17 16Ono mukwiinga ndacita ceeco ncentasuni kucita, nkokwaamba ayi Milawo ililuleme. 17Aboobo teshi ndime ncita cintu ici, sombi mbubi ubo buli muli ndime. 18Ndishi kwaamba ayi moyo wangu tookoonshi kunengesha kucita cintu cibotu mubuumi bwa buntu. Nakubi kwaamba ayi ndisuni kucita cintu cibotu, sombi ndaalilwa kucicita. 19Nshiciti cintu cibotu ico nceensuni kucita, sombi ndacita bubi mbontasuni kucita. 20Na kaancita cintu nceentasuni kucita, nkokwaamba ayi teshi ndime nemwiine neentoocicita, sombi mbubi ubo buli muli ndime.
21Aboobo ndacana kwaamba ayi cicitika muli ndime na ntooyanda kucita cintu cibotu, nkusalabo bubi. 22Ndakondwa amoyo wangu woonse ceebo ca Milawo iswa kuli Lesa. 23Sombi ndishi kwaamba ayi muli ndime muli mulawo uyo utasuni miyeeyo yangu. Mulawo umwi uyo ukonkela nshila ya bubi ngowalengesha ayi mbe musha wa bubi. 24Maawe akomena mapensho! Anu ngani eshi akamfuneeko kubuumi ubu butoontola kulufu? 25Aalumbwe Lesa eshi akamfuune kwiinda muli Jesu Klistu Mwaami wesu! Anu mbulya mboombete, nebo nemwiine ndisuni kukonkela Milawo yakwe Lesa, sombi kwiinda mulunkumbwa ndakonkela mulawo untola kububi.
Currently Selected:
Bene Loma 7: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
