Bene Loma 2
2
Lesa ulaakoombolosha bantu boonse
1Omweensuma, webo nowoombolosha babyo, taaku mpweshi ukayubile mulandu, nabi ubaani. Ceebo ndiwoombolosha bamwi pabubi bweenka mboocita, awebo utolishinina omwiine.#Mate 7:1; Luka 6:37 2Soonse tulishi kwaamba ayi Lesa uloombolosha mubululami bantu bacita shibiibi sha mushobo uyu. 3Sombi webo omweensuma, shintu sheenka ishi nshoopetawo babyo milandu, awebo omwiine nshoocita. Sa utooyeeya ayi webo ulaakuyuba mulandu wakwe Lesa? 4Nabi sa utoonyansha Lesa ceebo ca kwaamba ayi ngushinkumbu abuumbi alimwi taatondeshi bukali bwakwe paciindi ceenka ico, sombi ulatolelela kulekelela? Ncakwiila ulishi kwaamba ayi Lesa ncaabetele shinkumbu nkweelesha kwaamba ayi usanduke kuswa kushibiibi shako. 5Ono ceebo uli shicimpamya utoolengesha Lesa ayi akeendeewo kukutondesha bukali bwakwe pabushiku ndyeshi akoomboloshe bantu boonse mubululami. 6Ceebo Lesa ulaakulambula muntu woonse kweelana amilimo yakwe.#Kulu 62:12 7Abo batolelela kucita shiluleme, kuyandoola bulemu kuli Lesa, shoolwe alimwi abuumi butamaani, Lesa ulaakubapa buumi ubo. 8Sombi bamwi abo basuni kucita nshebasuni beene akukaka kucita shiluleme kabacitabo shitaluleme, Lesa ulaakuboombolosha mubukali bwakwe. 9Mapensho alimwi amakatasho alaakuba pabantu abo bacita shibiibi, kutaanguna baJuda, pesule baswamashi bakunsengwe. 10Sombi ulaakulumbaisha akulemeka alimwi akupa luumuno abo bacita shiluleme, kutaanguna baJuda, pesule baswamashi bakunsengwe. 11Mukwiinga Lesa taasalululi.#Duto 10:17
12Bantu boonse bakabisha kabateshi Milawo balaakunyonyoolwa nakubi kwaamba ayi tebakalinga kwishi Milawo. Abo bakabisha kabeshi Milawo, Milawo yeenka iyo ilaakubashinina. 13Ceebo bantu tabalulamikwi pameenso akwe Lesa kwiinda mukunyumfwabo Milawo, sombi kwiinda mukucita bwaamba Milawo. 14Baswamashi bakunsengwe tabakwe kupekwa Milawo, sombi na bacita bwaamba Milawo palwabo beene, nkokwaamba ayi babonesha ayi balicite Milawo mumyoyo yabo, nabi tabakwe kupekwa Milawo iyo. 15Nshebacita shilatondesha kwaamba ayi shaamba Milawo shililembetwe mumyoyo yabo. Shintu nshebayeeya mumyoyo yabo shilatondesha ayi nshancinencine ceebo cimwi ciindi shilabalwiita ayi babisha nabi bacita kabotu. 16Mbweekoobo mbweshi cikabe pabushiku Lesa ndyeshi akoomboloshe bantu kwiinda muli Jesu Klistu pasheesho nshebayeeya beene, kweelana aMakani Abotu aya ngoonshimikila.
Bwaamba Milawo pabaJuda
17Ino webo noolyaamba ayi uli muJuda? Ulacinka manungo muMilawo alimwi akulisumpula muli Lesa. 18Ulishi kuyanda kwakwe Lesa alimwi ceebo wakeeishikwa muMilawo, aboobo ulishi bwakusala shintu shibotu. 19Kweelana ambocibete ulashoma ayi uli mutanjilili wa boofu, mumuni wa baabo bali mumunshinshe 20alimwi amufundishi wa baluya abatacite lushibo. Ulishinishite ayi ulishi shoonse alimwi shoonse nsheenga waamba nshalushinisho mukwiinga wakapekwa Milawo. 21Uleeisha bamwi sombi, ulyeelete akuliisha omwiine, ulashimikila ayi bantu tabeelete kwiipa, sombi webo omwiine uleepa. 22Uleeisha ayi bantu tabeelete kucita bulale, sombi webo omwiine ulacita bulale. Shibumbwabumbwa ulishipatite abuumbi, sombi uleepa shintu sha mumaanda mobapailila shibumbwabumbwa. 23Ulalisumpula ayi ulicite Milawo yakwe Lesa, sombi ulamulensha nsoni kwiinda mukutakonkela Milawo iyo. 24Cililembetwe muMalembo akwe Lesa ayi, “Ceebo ca ndimwe nobaJuda, baswamashi bakunsengwe balacobola Lesa.”#Isa 52:5
25Na ulacita kweelana abwaamba Milawo, ingayi kupalulwa kwako kulibo kabotu. Sombi na tooikonkeli, nkokwaamba ayi kupalulwa kwako taaku mbokubete. 26Balo baswamashi bakunsengwe tabakwe kupalulwa, nakubi boobo na kabakonkela Milawo, ncakwiila Lesa ulaakubabonabo anga bakapalulwa. 27Paceebo ceeci, na uyo utakwe kupalulwa kaakonkela Milawo, ulaakukushinina webo omuJuda nowakapalulwa alimwi nowakapekwa Milawo, sombi tooikonkeli. 28Shoonse ishi shitoosansulula ayi muJuda wancinencine teshi wooyo uliboneshabo kubantu ayi ngumuJuda. Akwalo kupalulwa kwancinencine teshi kooko bantu nkobacita kumibili, sobwe. 29Anu muJuda wancinencine ngooyo muJuda mumoyo. Akwalo kupalulwa kwancinencine nkooko kwa mumoyo kucitikwa aMushimu Usalashi. Kupalulwa uku takucitwi ceebo muntu wacita bwaamba Milawo. Muntu wa mushobo wooyo umulumbaisha nguLesa, teshi bantu, sobwe.#Duto 30:6
Currently Selected:
Bene Loma 2: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.