Bene Filipi 3
3
Bululami bwancinencine
1Ono cakweelaako nobamakwesu, kamusangalala muMwaami Jesu. Nshileemi kulemba shintu nshendakamulembelaawo kale mukwiinga maswi aya alaakumucafwa. 2Amucenjele abantu bacita shibiibi abo bali anga mbakabwa, abo bantu bacikakatisha kupalulwa. 3Swebo ndiswe twakapalulwa cancinencine sotutanjililwa aMushimu Usalashi mukulambila Lesa akusangalala muli Klistu Jesu. Aboobo tatushomi shapacishi ca panshi, sobwe. 4Teshi kwaamba ayi nebo ndabuula cintu cakusangalalilaamo. Na kuli muntu uyeeya ayi ulicite shintu sha mushobo uyo, nebo ndamwiindaawo. 5Nebo ndakapalulwa kaancite nsondo abushiku bomwi. Ndi mwine Isilaeli kukushalwa kwangu, mukowa wakwe Benjameni. Ndakaswa kubulowa bwiine bwa bamaEbulu. Ono kwaamba shakukonkela milawo ya baJuda nebo ndakalinga muFalisi.#Loma 11:1; Mili 23:6; 26:5 6Ndakalinga shilunkutwe mukupensha coonde. Kwaamba shabululami buswa mukukonkela Milawo yeenka, ndakaboneka anga ngumuntu utacite shibiibi.#Mili 8:3; 22:4; 26:9-11
7Nakubi boobo ceebo cakwe Klistu, shoonse nshendakalinga kubona ayi shilicite mpindu, ono ndacana ayi taaku mboshibete. 8Ncakwiila shintu shoonse ishi nshakusowabo tasheelani ampindu yakwishiba Klistu Jesu, Mwaami wangu. Ceebo ca nguwe shoonse ndashisowa. Ndayeeya ayi taaku mboshibete mukwaamba ayi ntambule Klistu 9alimwi akucanika muli nguwe. Nshiliyeeyeli kwaamba ayi ndiluleme kwiinda mukukonkela Milawo, sombi bululami bwangu bulacanika kwiinda mukushoma Klistu. Bululami ubu buswa kuli Lesa bulapekwa kwiinda mulushomo. 10Ndisuni kwishiba Klistu ankusu shakubuka kwakwe kuswa kubafu, kukoshanyaakwe mumapensho akuba mbuli nguwe mulufu lwakwe. 11Ndacita boobo kwaamba ayi anebo nkabuke kuswa kubafu akuba abuumi butamaani.
Kucica lubilo kushikila kumamanino
12Nshintokwaamba ayi ndashitambula kale, sombi ntoocica kwaamba ayi nkatambule shoolwe ishi mukwiinga ncaakancatila Klistu Jesu ayi mbe waakwe. 13Nobamakwesu, nshintooyeeya ayi ndashicana kale, sombi cintu cinene nceencita nkushiya shoonse shili kwisule akusukamabo shili kunembo. 14Aboobo ndacicila kushika kumeelelesho kwaamba ayi nkatambule cilambu kwiculu ncakatwiitila Lesa kwiinda muli Klistu Jesu.
15Ono soonse sotukomete mulushomo tulyeelete kuba amiyeeyo ya mushobo uyu. Na kakuli bamwi pakati kanu bacite miyeeyo ipusene, shoonse isho Lesa ulaakumuyubulwita. 16Aboobo nabi caba buyani, atwikale kweelana aciimo ca lushomo lwesu ici ncetwashikaamo.
17Nobamakwesu, kamwiiya ndime alimwi mubalabilile abo bantu beenda munshila njetwakamwiisha.#1 Koli 4:16; 11:1 18Ndamulwiita lyoonse mankanda maanji alimwi ntekubooshaawo kaandila. Kuli bantu baanji batondesha mubuumi bwabo ayi mbalwani kumakani akwe Klistu pamucilingano. 19Kumeelelesho balaakunyonyoolwa mukwiinga lesa wabo nshintu shisangalasha mubili. Aboobo balo balasangalalila mushintu isho sheelete kubapa nsoni alimwi balayeeyabo shintu sha pacishi ca panshi. 20Swebo ncakwiila kumisheesu kwiine kwiine nkwiculu alimwi tulalangila Mupulushi wesu Mwaami Jesu Klistu kuswa nkomunya uko. 21Lakwe ulaakusandula mibili yesu ilefukite ya buntu kwaamba ayi ikabe mbuli mubili wakwe wa bulemu. Ulaakucita boobo munkusu shakwe isho shikoma shintu shoonse akushilela.
Currently Selected:
Bene Filipi 3: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.