Shakubelenga 3
3
Bana bakwe Aloni basankwa
1Ono aba mbobana bakwe Aloni aMose basankwa, paciindi ico Mwaami Lesa ndyaakaamba aMose paKalundu ka Sinayi. 2Aloni wakalinga kucite baana basankwa bone, Nadabu wakwiiya, Abiyu, Eliyasa alimwi aItama.#Shakube 26:60 3Bakananikwa akubikwa pabupailishi. 4Sombi Nadabu alimwi aAbiyu bakacaikwa ndibakabenga mulambu kuMwaami Lesa pamulilo utasalalite muluyanga lwa Sinayi. Basankwa bobilo aba tabakwe kushalaawo. Paceebo ceeci, Eliyasa aItama mbobakasebensa mulimo wa bupailishi mubuumi bwakwe Aloni ishiwabo.#Bene Lefi 10:1-2; Shakube 26:61
Mulimo wa bene Lefi
5Mpomunyaawo Mwaami Lesa wakaambila Mose ayi, 6“Leta mukowa wa bene Lefi akubapa mulimo wakucafwa Aloni mupailishi. 7Balaakunoocita milimo yoonse iyandika muTente ya Cipangano, mukusebensela bapailishi alimwi abene Isilaeli boonse. 8Balaakunoolama shintu shoonse sha muTente alimwi akusebensela bene Isilaeli boonse mukucita mulimo wa muTente ya Cipangano. 9Anu mulimo bene Lefi ngobacitebo ngwakucafwa Aloni alimwi abana bakwe basankwa. 10Sombi ukabike Aloni alimwi abana bakwe basankwa pamulimo wa bupailishi. Ono umwi woonse eshi akeeleshe kucita mulimo uyu, ulaakucaikwa.”
11Lyalo Mwaami Lesa wakaambila Mose ayi, 12“Ntoolibikila palubasu bene Lefi kuswa pabene Isilaeli mumusena wa baana basankwa bakwiiya ba banakashi bene Isilaeli boonse. Bene Lefi mbaangu 13ceebo baana bakwiiya mbaangu. Ndindakacaya baana basankwa bakwiiya boonse muIjipiti, ndakalibikila palubasu mwaana musankwa wakwiiya woonse wa mwine Isilaeli, alimwi amwaana musankwa wakwiiya wa munyama. Boonse balyeelete kuba baangu, nebo ndime Mwaami Lesa.”#Kulo 13:2
Kubelengwa kwa bene Lefi
14Ono muluyanga lwa Sinayi, Mwaami Lesa wakaambila Mose ayi, 15“Belenga bene Lefi kwiinda mumakoto amumaanda alimwi akulemba musankwa uli woonse ucite mweenshi nabi ayiindilila.” 16Aboobo Mose wakababelenga, bweenka bwakamwaambila Mwaami Lesa. 17Ono meena a bana bakwe Lefi basankwa ngaaya. Geshoni, Koati alimwi aMelali. 18Meena a bana bakwe Geshoni basankwa ngaaya. Libini alimwi aShimeyi. 19Meena a bana bakwe Koati basankwa ngaaya. Amulamu, Isa, Ebuloni alimwi aUsiyelo. 20Aalo meena a bana bakwe Melali basankwa ngaaya. Mali alimwi aMushi. Ishi nsheshipani sha mumikowa ya bene Lefi, kweelana ameena a bamashali babo bakulukulu.
21Mucipani cakwe Geshoni mwakalinga mikowa yobilo, nkokwaamba ayi Libini alimwi aShimeyi. 22Basankwa abo bakalembwa bakalinga kucite mweenshi nabi ayiindilila bakalinga 7,500. 23Cipani ici cakayakila kulubasu lwa kumbo, kwisule lya Tente ya Cipangano. 24Mutanjilili wa ncico wakalinga Eliyasafu mwanaakwe Layelo. 25Bamucipani ici bakapekwa mulimo wakulama Tente, cakufweka peculu ca mukati, cakufweka peculu ca pansengwe lya Tente, cisani cakushitilisha pamulyango, 26shisani shakulushito lwa lubansa lushingulukite Tente acipaililo, cisani cakushitilisha mwinjililo wa lubansa alimwi antaambo sha ndulo. Nkokwaamba ayi bakapekwa milimo yoonse ikumite kushintu ishi.
27Acalo cipani cakwe Koati cakalinga kucite mukowa wakwe Amulamu, Isa, Ebuloni alimwi aUsiyelo. 28Basankwa boonse bakalinga kucite mweenshi nabi ayiindilila abo bakalembwa bakakumana 8,600. Cipani cakwe Koati cakalinga kucite mulimo wa mumusena usalalite, 29alimwi cakalinga kuyaka misumba kumalenge lya Tente. 30Mutanjilili wa ncico nguElisafani mwanaakwe Usiyelo. 31Balo mulimo wabo wakalinga wakulama Libokoshi lya Cipangano, tebulu, cakubikawo malampi, shipaililo, shisebensesho isho bapailishi nshebakalinga kusebensesha muMusena Usalalite, alimwi acisani cakushitilisha pamulyango wa kuMusena Usalalite Wiindaawo. Nkokwaamba ayi bakapekwa milimo yoonse ikumite kushintu ishi.
32Anu munene pabamatanjilili ba bene Lefi nguEliyasa mwanaakwe Aloni mupailishi. Lakwe ngowakalinga kulangilisha pabaabo bakalinga kusebensa milimo mumusena usalalite.
33Acalo cipani cakwe Melali cakalinga kucite mikowa yakwe Mali alimwi aMushi. 34Basankwa boonse bakalinga kucite mweenshi nabi ayiindilila abo bakalembwa bakakumana 6,200. 35Cipani ici cakalinga kuyaka misumba kumatwa lya Tente, alimwi mutanjilili wa ncico wakalinga Suliyelo mwanaakwe Abiyelo. 36Balo bakapekwa mulimo wa kulama shintu sha makonko one sha shisamu sha kuTente, mbaalo sha ndilyo, shisamu sha ndilyo, shapanshi sha ndilyo ashimwi shoonse shibikwaako. Nkokwaamba ayi bakapekwa milimo yoonse ikumite kushintu ishi. 37Bakapekwa amulimo wa kulama shisamu, shapanshi sha bulonse, mpoopo alimwi antaambo sha kulushito lushingulukite Tente.
38Sombi Mose aAloni alimwi abana bakwe basankwa bakalinga kuyaka misumba yabo kwicwe kunembo lya Tente ya Cipangano. Balo mulimo wabo wakalinga wakusebensela bene Isilaeli muMusena Usalalite. Muntu umwi uli woonse wakeelesha kucita mulimo uyu wakalinga kucaikwa. 39Anu bene Lefi basankwa boonse bakalinga kucite mweenshi nabi ayiindilila abo Mose mbwaakalemba mucipani acipani kweelana abwakaamba Mwaami Lesa, bakakumana 22,000.
Bene Lefi mbobakabwesa ciimo ca baana basankwa bakwiiya
40Mpomunyaawo Mwaami Lesa wakaambila Mose ayi, “Belenga basankwa boonse bakwiiya bene Isilaeli abo bacite mweenshi nabi ayiindilila akulemba meenaabo. 41Ono benga bene Lefi ayi babe baangu mumusena wa baana basankwa boonse bakwiiya ba bene Isilaeli. Ubenge shifubwa sha bene Lefi shoonse mumusena wa shifubwa shakwiiya sha bene Isilaeli bamwi boonse. Nebo ndime Mwaami Lesa.” 42Mose wakacita mbomunya ubo, akulemba meena a baana basankwa boonse bakwiiya 43abo bakalinga kucite mweenshi nabi ayiindilila. Pantu pomwi boonse bakakumana 22,273.
44Mpeeke Mwaami Lesa wakaambila Mose ayi, 45“Ono benga bene Lefi boonse ayi mbaangu mumusena wa baana basankwa boonse bakwiiya ba bene Isilaeli. Ubenge shifubwa sha bene Lefi shoonse mumusena wa shifubwa sha bene Isilaeli. Nebo ndime Mwaami Lesa. 46Ceebo cakwaamba ayi baana basankwa bakwiiya ba bene Isilaeli bakeendaawo ba bene Lefi abaana bali 273, mulyeelete kulubula baabo beshi bakasotokeewo. 47Ono pamwaana womwi mulyeelete kulipila maali a silifa ali osanwe, kweelana acipimo cakasuminishikwa, 48akupa Aloni alimwi abana bakwe basankwa maali ayo.” 49Aboobo Mose wakatambula maali akubalubula kuswa kuli baabo bakeendilila pamweelo wa bene Lefi. 50Wakatambula maali a silifa ali 1,365 kweelana acipimo cakasuminishikwa. 51Mpeeke Mose wakapa maali ayo Aloni abana bakwe basankwa kweelana abwakaamba Mwaami Lesa.
Currently Selected:
Shakubelenga 3: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
