Shakubelenga 23
23
1Mpeeke Balaamu wakaambila Balaki ayi, “Amunjakile shipaililo shosanwe ashobilo pano, akundetela bacende bosanwe abobilo alimwi ambelele shisankwa shosanwe ashobilo.”
2Alakwe Balaki wakacita kweelana ambwaakalwiitwa, anu lakwe alimwi aBalaamu bakabenga mucende womwi ambelele isankwa yomwi pacipaililo comwi acomwi. 3Lyalo Balaamu wakaambila Balaki ayi, “Imikana waano pali mulambu wako wakutenta nebo ndyenciya mukubona na Mwaami Lesa utoonkumanya nabi taau. Ntookulwiita cili coonse nceshi anjubulwita.” Aboobo wakaya eenka peculu pakalundu, 4alakwe Mwaami Lesa wakamukumanya. Mpeeke Balaamu wakamwaambila ayi, “Ndayaaka shipaililo shosanwe ashobilo akubengelawo mucende womwi ambelele isankwa yomwi pacipaililo comwi acomwi.”
5Mpomunyaawo Mwaami Lesa wakalwiita Balaamu shakwaamba akumwaambila ayi, “Boolela kuli Balaki ukamwaambile mbondakulwiita.” 6Aboobo wakaboolela akucana Balaki uciimfwibo pamulambu wakwe wakutenta pantu pomwi abamatanjilili ba bene Moabu boonse.
7Kuswawaawo Balaamu wakalaluka ayi,
“Balaki wankusha kuSilya,
mwaami wa kuMoabu wankusha kuswa kutulundu twa kwicwe.
Wakaamba ayi, ‘Kosa unshinganineko Jakobo.
Kosa unambilileko malwesa bene Isilaeli.’
8Ino nebo inga ndashingana buyani
abo Lesa mbwaatakwe kushingana?
Ino nebo inga ndalamba buyani malwesa
abo Mwaami Lesa mbwaatakwe kulamba?
9Ndababona kuswa peculu lya tulundu twa mabwe.
Ndababona kuswa peculu lya tulundu tulaamfu.
Ngumushobo wikalabo weenka,
balishi ayi balicite coolwe kwiinda mishobo imwi yoonse.
10Ngani weenga wabelenga bamulunyungu lwakwe Jakobo?
Ncakwiila mbaanji anga ngumuseese.
Inshiku shangu anshimanishe anga ngumuntu wakwe Lesa.
Amfwite muluumuno anga mbantu baluleme.”
11Lyalo Balaki wakaambila Balaamu ayi, “Wancitilanshi bobulya? Ndakakwiitila kushingana balwani bangu, sombi webo ncewacita nkubapa coolwe.” 12Lakwe wakakumbula ayi, “Nebo ndaambabo Mwaami Lesa nceenga wandwiita ayi ŋambe.”
Kulaluka kwabili kwakwe Balaamu
13Mpomunyaawo Balaki wakaambila Balaamu ayi, “Katiya soonse kumusena umwi uko nkweenga wabonabo bene Isilaeli bamwi. Unshinganishileeko nkomunya uko.” 14Lyalo wakamutola kumuunda wa Sofimu peculu lyaKalundu ka Pisiga. Apalo apo wakayakawo shipaililo shosanwe ashobilo akubengelawo mucende womwi alimwi ambelele isankwa yomwi pacipaililo comwi acomwi.
15Mpeeke Balaamu wakaambila Balaki ayi, “Imikana waano pali mulambu wako wakutenta, nebo ndaya mukukumana aLesa kulya.”
16Aboobo Mwaami Lesa wakakumana aBalaamu akumulwiita shakwaamba akumwaambila ayi, “Boolela kuli Balaki ukamwaambile mbondakulwiita.” 17Aboobo wakaboolela akucana Balaki uciimfwibo pamulambu wakwe wakutenta pantu pomwi abamatanjilili ba bene Moabu. Balaki wakamwiipusha ayi, “Ino Mwaami Lesa waamba ayinshi?” 18Mpomunyaawo Balaamu wakalaluka ayi,
“Amunyamuke baBalaki munkutike,
amunyumfwe nobana babo baSipo.
19Lesa taabete anga mbantu abo babeshi.
Taabete anga ngumuntu upilula miyeeyo yakwe.
Coonse nceenga walasha, ulacicita
alimwi na waamba, ncaamba cilacitwa.
20Nebo ndalwiitwa ayi mpe coolwe.
Ono na Lesa wapa coolwe,
nebo inga nshicisanduliiwo.
21Taaku mapensho kubamulunyungu lwakwe Jakobo,
taaku makatasho kubene Isilaeli.
Mwaami Lesa, Lesa wabo uli ambabo,
abalo beene baloolobesha ayi nguMwaami wabo.
22Lesa wakabakusha mucishi ca Ijipiti,
ulabalwaninaako anga ninyati.
23Taaku buloshi kubamulunyungu lwakwe Jakobo,
taaku buŋanga bweenga bwasebensa kubene Isilaeli.
Ono bantu balaakwaamba pabene Isilaeli ayi,
‘Amubone Lesa nshaacita!’
24Bene Isilaeli balanyamuka anga ninkalamu yanakashi,
balalibusha anga ninkalamu isankwa.
Tayookeshi kushikila yacaya akulya,
akunwa bulowa bwa ceeco nceyacaya.”
25Lyalo Balaki wakaambila Balaamu ayi, “Wakaaka kushingana bene Isilaeli, sombi acoolwe coonse utabapi!” 26Lakwe Balaamu wakakumbula ayi, “Sa nshikwe kumulwiita ayi ndyeelete kucitabo Mwaami Lesa nsheenga wandwiita?”
Kulaluka kwatatu kwakwe Balaamu
27Mpomunyaawo Balaki wakaambila Balaamu ayi, “Katiya soonse, ono ntookutola kumusena umwi. Mpashi Lesa kwalo inga wasuminisha ayi uye unshinganineko bene Isilaeli.” 28Aboobo wakatola Balaamu peculu paKalundu ka Peyo, kalangene aluyanga. 29Mpeeke Balaamu wakamwaambila ayi, “Anu njakile shipaililo shosanwe ashobilo pano akundetela bacende bosanwe abobilo alimwi ambelele shisankwa shosanwe ashobilo.” 30Balaki wakacita kweelana ambwaakalwiitwa, akubenga mucende womwi alimwi ambelele isankwa yomwi pacipaililo comwi acomwi.
Currently Selected:
Shakubelenga 23: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
