Shakubelenga 21
21
Kukomwa kwa bene Kenani bamwi
1Ono mwaami mwine Kenani wa kuAladi kulubasu lwa kumalenge ndyaakanyumfwa ayi bene Isilaeli batoosita kuAtalimu, wakabalwana akucatawo bantu bamwi.#Shakube 33:40 2Lyalo bene Isilaeli bakashomesha cakulumbila kuMwaami Lesa ayi, “Na mutusuminishe kukoma bantu aba, tulaakubabenga kuli ndimwe pantu pomwi amandabala abo. Nkokwaamba ayi tulaakubanyonyoola alimwi amandabala abo.” 3Mwaami Lesa wakabanyumfwa akubacafwa ayi bakome bene Kenani. Aboobo bene Isilaeli bakabanyonywetabo limwi pantu pomwi amandabala abo. Mpeeke musena uyo wakatumbwa ayi Oma.
Insoka ya bulonse
4Mpeeke bene Isilaeli bakaswa paKalundu ka Ole akwiinda nshila iya kuLweenge Lusalala kwaamba ayi bashinguluke cishi ca Edomu. Sombi pakunooya bantu bakatyongola#Duto 2:1 5akutalika kutongookela Lesa alimwi aMose. Bakaamba ayi, “Nciinshi ncemwakatukushisha mucishi ca Ijipiti ayi twise tufwite momuno muluyanga mutaamu shakulya nabi maanshi? Twalema kulya cakulya ici cibiibi!” 6Lyalo Mwaami Lesa wakabatumina nsoka shikali, alimwi bene Isilaeli baanji bakalumwa akufwa.#1 Koli 10:9 7Ndibakabona boobo, bakesa kuli Mose akwaamba ayi, “Twakabisha nditwakatongookela Mwaami Lesa alimwi amwebo. Ono amupaile kuMwaami Lesa.” Aboobo Mose wakabapaililaako. 8Mpomunyaawo Mwaami Lesa wakalwiita Mose ayi apange nsoka ya bulonse akuyaanjika pacisamu kwaamba ayi woonse weenga walumwa inga walanga kuli njiyo akuba kabotu. 9Aboobo Mose wakapanga nsoka ya bulonse akuyaanjika pacisamu. Uyo woonse wakalumwa akulanga kunsoka iyo, wakaba kabotu.#2 Baami 18:4; Joni 3:14
Lweendo lwakuya kucishi ca Moabu
10Kuswawaawo bene Isilaeli bakalonga akuya mukuyaka misumba kuOboti. 11Ndibakaswa pamusena uyo, bakayaka misumba pamatongo a Abalimu muluyanga, kwicwe lya cishi ca bene Moabu. 12Kuswa kooko bakalonga akuya mukuyaka misumba yabo mucinyika ca Seledi. 13Lyalo bakalonga alimwi, akuya mukuyakila kumatwa lya Mulonga wa Anoni, muluyanga lushika mucishi ca bene Amoli. Mulonga wa Anoni wakalinga njenyinsa ya cishi ca Moabu alimwi aca Amoli. 14Nceceeco Libuku lya Nkondo sha Mwaami Lesa ncelyaambilila ayi,
“Pandabala ya Wayebu mumusena wa Sufa, alimwi ashinyika.
Mulonga wa Anoni,
15ankunamo ya shinyika shiya mukushika mundabala ya Ali
alimwi akushika kunyinsa ya cishi ca Moabu.”
16Kuswa kooko bakeenda akushika kumukalo wiitwa ayi Biya, uko Mwaami Lesa nkwaakaambila Mose ayi, “Bunganya bantu kwaamba ayi mbape maanshi.” 17Paciindi ico bene Isilaeli bakeemba lwiimbo ulu,
“Omukalo kusha maanshi ako!
Atwiimbile mukalo uyo!
18Uyo mukalo wakakaba bamaami.
Ncakwiila bamatanjilili ba bantu mbobakaukaba.
Bakaukaba akasako ka bwaami kabo ankooli shabo.”
Mpomunyaawo bakaswa muluyanga akuya kuMatana, 19alimwi kuswa kooko bakaya kunembo akushika kuNaaliyelo. Ono ndibakaswaako uko bakaya kuBamoti, 20alimwi ndibakaswa kuBamoti bakaya kucinyika cili mucishi ca bene Moabu, kamutana kushika peculu lya Kalundu ka Pisiga, aluyanga kalubwenekete.
Kukomwa kwa mwaami Sioni amwaami Ogi
(Duto 2:26—3:11)
21Lyalo bene Isilaeli bakatuma bantu kumwaami Sioni wa bene Amoli mukumwaambila ayi, 22“Mutusuminishe kwiinda mucishi canu. Swebo alimwi aŋombe shesu teshi twiinde mumyuunda imwibo nabi ya minyansa alimwi teshi tunwe maanshi mumikalo yanu. Tunanoolibo mumukwakwa unene kushikila tuswe mucishi canu.” 23Sombi Sioni wakakasha bene Isilaeli kwiinda mucishi cakwe. Lakwe wakabunganya likoto lyakwe lya bashilumamba akuya kuJaasi muluyanga akulwana bene Isilaeli. 24Nacibi boobo, bene Isilaeli bakacaya balwani babo baanji alimwi akwikala mucishi cabo, kuswa kuMulonga wa Anoni tibili akuMulonga wa Jaboku, kweela cishi ca bene Amoni mukwiinga nyinsa yabo yakalinga kulamitwe kabotu abuumbi. 25Munshila iyi bene Isilaeli bakabwesa mandabala anene oonse a bene Amoli akwikalaamo, kubikaawo aEshiboni alimwi amandabala amwi oonse akalinga kushingulukite. 26Anu Eshiboni yakalinga njendabala inene ya mwaami Sioni wa bene Amoli, uyo wakalwana mwaami wa bene Moabu wakalingaawo kalekale akumunyaya cishi coonse kuya mukweela kuMulonga wa Anoni. 27Nceceeco bantu beshitushimpi ncebakaambila ayi,
“Amwise kuEshiboni, ndabala inene iyakwe alimwi,
ndabala inene ya mwaami Sioni ibe mboyakalinga!
28Kalekale kuswa mundabala iyo ya Eshiboni,
bashilumamba bakwe Sioni bakalinga kuya anga ngumulilo.
Bakanyonyoola ndabala inene ya Ali muMoabu,
alimwi atulundu twa kumatalikilo a Mulonga wa Anoni.
29Mapensho kuli ndimwe nobene Moabu!
Mwebo nomulambila Kemoshi mwanyonyoolwa!
Lesa wanu ulalengesha basankwa banu kulobokela kushishi shimwi,
abalo banakashi Sioni mwaami wa bene Amoli wakabacata.#Jele 48:45-46
30Sombi bulya bamulunyungu lwabo bakakomwa,
kutalikila kuEshiboni kushikila akuDiboni.
Twakabanyonyoola kushikila akuNofa,
ndabala ili pafwaafwi aMedeba.”
31Mpeeke bene Isilaeli bakatalika kwikala mucishi ca bene Amoli, 32Lyalo Mose wakatuma beshikusensa kundabala inene ya Jasa. Anu bene Isilaeli bakeebwesa alimwi amandabala amwi akalinga kwiishingulukite, akutandamo bene Amoli bakalinga kwikalaamo.
33Kuswawaawo bene Isilaeli bakapetuka akwiinda nshila ya kuBashani. Mpeeke mwaami Ogi wa bene Bashani, wakanyamuka alikoto lyakwe lya bashilumamba mukulwana ambabo kuEdileyi. 34Mpomunyaawo Mwaami Lesa wakaambila Mose ayi, “Utamuloondi. Nebo ntoolengesha ayi mumukoome, bantu bakwe alimwi acishi cakwe. Umuciite bweenka mbowakacita Sioni mwaami wa bene Amoli, uyo wakalinga kweendelesha kuEshiboni.” 35Aboobo bene Isilaeli bakacaya Ogi pantu pomwi abana bakwe basankwa, bantu bakwe boonse cakutashiyaawo nabi womwi. Kuswawaawo bakekala mucishi cakwe.
Currently Selected:
Shakubelenga 21: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
