Shakubelenga 10
10
Mapeenga a silifa
1Mwaami Lesa wakaambila Mose ayi, 2“Panga mapeenga obilo a silifa wakufula ayo akunoosebensesha pakubunganya bantu alimwi apakulonga. 3Na mwanyumfwa mapeenga obilo oonse alila ciindi cilaamfu, bene Isilaeli boonse balyeelete kubungana kunembo lyako pamulyango wa Tente ya Cipangano. 4Sombi na kwalilabo lupeenga lomwi, ingayi mbamatanjilili ba shipani sha mumikowa beenkabo beelete kubungana kunembo lyako. 5Ono na lupeenga lwalilabo ciindi cifwaafwi, ingayi mikowa iyakite kulubasu lwakwicwe njeyeelete kunyamuka. 6Na lupeenga lwalila lyabili ciindi cifwaafwi, mikowa iyakite kulubasu lwakumalenge njeyeelete kunyamuka. Aboobo na lupeenga lwalila ciindi cifwaafwi nkokwaamba ayi nkulonga. 7Sombi na nkubunganya bene Isilaeli boonse, mapeenga obilo ayo alyeelete kulila ciindi cilaamfu. 8Bapailishi bana bakwe Aloni basankwa mbobeelete kulisha mapeenga ayo.
“Ono mulawo uyu ulyeelete kunookonkelwa lyoonse mumashalane oonse acisa. 9Na mucishi mwesa nkondo, kwaamba ayi mulifuune kubalwani abo besa mukumulwana, mulyeelete kulisha cishibisho ca nkondo mumapeenga aya. Nebo neMwaami Lesa, Lesa wanu ndaakumucafwa alimwi akumupulusha kubalwani banu. 10Amwalo muciindi cakusangalala mbuli pakusekelela sha Mweenshi Upya alimwi apakusekelela shakupaila kwanu kumwi koonse, mulyeelete kulisha mapeenga pakunoobenga milambu yanu yakutenta alimwi amilambu ya bwanabwankashi. Lyalo ndaakumucafwa. Nebo ndime Mwaami Lesa, Lesa wanu.”
Bene Isilaeli mbobalonga kuswa muluyanga lwa Sinayi
11Pabushiku bwamakumi obilo mumweenshi wabili, mumwaaka wabili ciindi bene Isilaeli ndibakaswa muIjipiti, likumbi lyakaswa paTente ya Cipangano. 12Mpeeke bene Isilaeli bakatalika lweendo lwabo lwakuswa muluyanga lwa Sinayi. Kuswawaawo likumbi lyakesa mukwiimikana muluyanga lwa Palani.
13Mpomunyaawo bakatalika kweenda kweelana abwakabalwiita Mwaami Lesa kwiinda muli Mose. 14Mushiindi shoonse ndibakalinga kulonga, makoto a mumukowa wakwe Juda akalinga kutaanguna kunyamuka akweendela pesule lya mbembela yabo. Mutanjilili wa bamumukowa uyu nguNashoni mwanaakwe Aminadabu. 15Netanelo mwanaakwe Suwa wakalinga kutanjilila likoto lya mumukowa wakwe Isaka, 16alakwe Eliyabu mwanaakwe Eloni wakalinga kutanjilila likoto lya mumukowa wakwe Sebuluni.
17Kuswawaawo Tente ya Cipangano yakalinga kuyakululwa, mpeeke bamucipani cakwe Geshoni alimwi acakwe Melali abo bakalinga kwiinyamuna, bakalinga kutalika lweendo lwabo pesule lya bene Juda.
18Kuboolaawo makoto a mumukowa wakwe Lubeni akalinga kunyamuka akweendela pesule lya mbembela yabo. Mutanjilili wa bamumukowa uyu nguElise mwanaakwe Sheduwa. 19Shelumyelo mwanaakwe Sulishadayi wakalinga kutanjilila likoto lya mumukowa wakwe Simyoni, 20alakwe Eliyasafu mwanaakwe Dewelo wakalinga kutanjilila likoto lya mumukowa wakwe Gadi.
21Kuboolaawo bamucipani cakwe Koati bakalinga kunyamuka, kabayumwite ashintu shisalalite. Ciindi nceenga bashikilamo kumusena umwi wakuyakawo misumba, bakalinga kucana Tente ya Cipangano yeemikwa kale.
22Kuboolaawo makoto a mumukowa wakwe Efuleemu akalinga kunyamuka akweendela pesule lya mbembela yabo. Mutanjilili wa bamumukowa uyu nguElishama mwanaakwe Amiyudi. 23Gamalyelo mwanaakwe Pedasa wakalinga kutanjilila likoto lya mumukowa wakwe Manase, 24alakwe Abidani mwanaakwe Gidyoni wakalinga kutanjilila likoto lya mumukowa wakwe Benjameni.
25Akweelaako ngamakoto a mumukowa wakwe Dani akalinga kunyamuka akweendela pesule lya mbembela yabo. Bakalinga kuba beshikutabilila makoto amwi oonse kwisule. Mutanjilili wa bamumukowa uyu nguAyiyesa mwanaakwe Amishadayi. 26Pagiyelo mwanaakwe Okulani wakalinga kutanjilila likoto lya mumukowa wakwe Asha. 27Alakwe Ayila mwanaakwe Enani wakalinga kutanjilila likoto lya mumukowa wakwe Nafutali. 28Anu ubo mbobakalinga kukonkana pakweenda kwabo, makoto amakoto, ciindi coonse na bene Isilaeli balonga akunooya.
29Mpomunyaawo Mose wakaambila Obabu mwanaakwe Luwelo mwine Midyani mupongoshi wakwe ayi, “Tuli pafwaafwi kuya kumusena uyo Mwaami Lesa ngweshi akatupe. Wakalasha kubilisha bene Isilaeli, anu kosa tuye soonse, alimwi tulaakubilila pantu pomwi awebo.” 30Obabu wakakumbula ayi, “Sobwe, nebo ntooboolela kucishi cine misheesu.” 31Sombi Mose wakaamba ayi, “Ndapapaata utatushiiyi. Webo ulishi misena ibotu yakuyakilaamo misumba muluyanga, aboobo inga waba shikututanjilila. 32Na uye aswebo, awebo ulaakutambulako shoolwe shoonse isho Mwaami Lesa nsheshi akanootupa.”
Bene Isilaeli mbobakanyamuka
33Ono bantu ndibakaswa kuSinayi, kalundu kasalalite, bakeenda nshiku shotatwe. Libokoshi lya Cipangano lya Mwaami Lesa lyoonse lyakalinga kunembo lyabo kuya cibayandweeta musena wakuyakilaawo. 34Ndibakalinga kuya bweenda kuswa pamisumba womwi awomwi, likumbi lya Mwaami Lesa lyakalinga kweendelabo peculu lyabo ciindi ca malumwi.
35Kulilabo na Libokoshi lya Cipangano lyanyamuka, Mose wakalinga kwaamba ayi,
“Amunyamuke noBaami baLesa,
amupalanganye balwani banu boonse
akulengesha baabo bamupatite kucica!”
36Ono na lyeemikana, wakalinga kwaamba ayi,
“Amuboole noBaami baLesa,
kubene Isilaeli abo bali shuulu shiinji.”
Currently Selected:
Shakubelenga 10: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
