Maako 4
4
Cikoshanyo ca mushangi
(Mate 13:1-9; Luka 8:4-8)
1Jesu wakatalika alimwi kwiisha kulubasu lwa Lweenge lwa Galili. Likoto lyakabungana lyakakomena bunene cakwaamba ayi Jesu wakenjila mubwaato wekala. Bwaato bwakalinga pamaanshi, lyalo likoto kalili petala muloombe lwa lweenge.#Luka 5:1-3 2Jesu wakabeeisha shintu shiinji mushikoshanyo, kaabaambila ayi,
3“Amuleke mulwiiteewo! Kwakalinga muntu umwi wakaya mukushanga mbuto. 4Ono ndyaakalinga kuminsa, mbuto shimwi shakalokela munshila, abalo bayuni bakesa bashilya. 5Shimwi shakalokela pabulongo bwa mabwe. Imbuto ishi shakafwambaana kumena ceebo bulongo bwakalingabo peculu. 6Sombi lumwi ndilwakabala, busonga boonse bwakapya akuyuma ceebo miyanda taikwe kuya bunene panshi. 7Imbuto shimwi shakalokela pamyuumfwa, ayalo myuumfwa ndiyakakula yakashitilisha misonga, aboobo taikwe kukula kwaamba ayi icate. 8Sombi mbuto shimwi shakalokela pabulongo bubotu, shakamena, shakula alimwi akucata shakacata. Shimwi shakacata nseke makumi otatwe, shimwi makumi osanwe alyomwi, ashimwi mwaanda.”
9Lyalo Jesu wakamanisha akwaamba ayi, “Uyo ucite matwi, aanyumfwe!”
Ceebo cinene ca shikoshanyo
(Mate 13:10-17; Luka 8:9-10)
10Bantu ndibakamwaika, bashikwiiya bakwe bali likumi abobilo abantu bamwi bakacaala, bakamusenga ayi asansulule shikoshanyo. 11Jesu wakabakumbula ayi, “Mwebo mwakapekwa lushibo lwa shintu shishisitwe sha Bweene bwakwe Lesa. Sombi bamwi abo batana kwishiba, balanyumfwa shintu shoonse mushikoshanyo 12kwaamba ayi,
‘Balangishishe, sombi bataboneshi,
bakutikishe, sombi batanyumfwishishi,
mukwiinga inga basandukila kuli Lesa alakwe inga wabalekelela.’ ”#Isa 6:9-10
Jesu mbwaakapandulula cikoshanyo ca mushangi
(Mate 13:18-23; Luka 8:11-15)
13Lyalo Jesu wakabeepusha ayi, “Sa tamukwe kucinyumfwa cikoshanyo ici? Ino mulaakucikonsha buyani kunyumfwa shikoshanyo shimwi shoonse? 14Mushangi ulashanga maswi akwe Lesa. 15Bantu bamwi bali anga nimbuto isho shakalokela munshila. Bamanabo kunyumfwa maswi akwe Lesa, Satana ulesa waakushaamo. 16Bamwi bali anga nimbuto isho shakalokela pabulongo bwa mabwe. Banyumfwabo maswi akwe Lesa, baleendililabo kwaatambula cakusangalala. 17Sombi maswi taanjili cankusu mumyoyo yabo, aboobo taakaali ciindi. Makatasho nabi mapensho na abapolela ceebo ca maswi akwe Lesa, balatentuka kufwambaana. 18Bamwi bali anga nimbuto yakashangwa mumyuumfwa. Aba mbobaabo banyumfwa maswi akwe Lesa, 19sombi shintu sha mucishi ca panshi, kusuna bubile alimwi ashintu shimwi shakulikondelesha, shilafulunganya maswi akwe Lesa, aboobo tabacati shisepo. 20Sombi bantu bamwi bali anga nimbuto yakashangwa mubulongo bubotu. Balanyumfwa maswi akwe Lesa, baatambula, baashoma alimwi akucata shisepo. Bamwi balacata shili makumi otatwe, bamwi makumi osanwe alyomwi alimwi bamwi mwaanda.”
Lilampi lifweketwe nongo
(Luka 8:16-18)
21Jesu wakatolelela akubeepusha ayi, “Sa kuli muntu weenga wanyansha lilampi akulifweka nongo nabi kulibika munshaabulo? Sa inga taalibiki peculu#Mate 5:15; Luka 11:33 22Cili coonse cishisitwe, cilaakuyubululwa patuba alimwi cili coonse citashibikitwe, cilaakushibikwa.#Mate 10:26; Luka 12:2 23Uyo ucite matwi, aanyumfwe!”
24Wakabaambila alimwi ayi, “Amucenjele, mutabecekwi! Milawo njemusebensesha pakoombolosha bamwi alakwe Lesa njeshi akasebenseshe pali ndimwe, lyalo akwiindaawo.#Mate 7:2; Luka 6:38 25Uyo ucite kale ulaakubikilwaawo, sombi ucite kaniini ulaakunyaikwa nabi kaako koonse nkaacite.”#Mate 13:12; 25:29; Luka 19:26
Cikoshanyo ca mbuto itoomena akukula
26Jesu wakatolelela kaamba ayi, “Bweene bwakwe Lesa buli bobulya. Muntu ulashanga mbuto mumuunda wakwe. 27Uloona mashiku alimwi akubuka macuunsa na bwaca, sombi coonse ciindi ici imbuto shitoomena akuya cikula, kaateshi ambocicitika. 28Bulongo bwiine mbobukulisha mumeno akuulengesha kwaamba ayi ucate. Citaanguna ncibuba, kuboolaawo njimifuko, pesule mifuko ndyeiba anseeke. 29Na shapya, muntu uyo ulatalika kucesa mukwiinga ciindi cakutebula cashikila.”#Jowe 3:13
Cikoshanyo ca mbuto ya masitadi
(Mate 13:31-32, 34; Luka 13:18-19)
30Jesu wakabeepusha ayi, “Ino Bweene bwakwe Lesa inga twabukoshanisha anshi? Nabi inga twasebensesha cikoshanyonshi kubupandulula? 31Bulikoshenye aluseke lwa masitadi ulo luniini kwiinda nseke shoonse sha pacishi ca panshi. Na muntu walushanga, 32lulakomena kwiinda mbewu shoonse akuba amisampi inene cakwaamba ayi bayuni balesa mukupanga shiinswa mumisampi ya ncico ceebo ca cimfule cibotu.” 33Jesu wakashimikila bantu maswi akwe mushikoshanyo shiinji sha mbuli sheeshi kweelana akunyumfwa kwabo. 34Taakwe kubalwiitaawo maswi akwe Lesa kwakubula shikoshanyo, sombi wakalinga kusansulwita bashikwiiya bakwe shoonse na bacaala beenka.
Jesu mbwaakoomusha cipuupu
(Mate 8:23-27; Luka 8:22-25)
35Macolesha bushiku bweenka ubo, Jesu wakaambila bashikwiiya bakwe ayi, “Atusubukile kwitala.” 36Mpeeke bakashiya likoto lya bantu. Bashikwiiya bakenjila mubwaato mweenka mwakalinga Jesu akuyaakwe. Maato amwi akalingaawo ngobakeetaawo pantu pomwi. 37Mpomunyaawo kwakaba cipuupu cinene pamaanshi, maaba akatalika kuuma kubwaato, lyalo bwakatalika kuya cisula. 38Paciindi ici Jesu waalinga kulete kuunshi mubwaato kaataamite pamutaamino. Bashikwiiya bakwe bakamubusha akwaamba ayi, “Bafundishi, sa tamutoolisukama kwaamba ayi tutooyanda kufwa?”
39Jesu wakabuka akukalalila cipuupu amaaba ayi, “Umuna! Cileke kupuupa!” Muuwo wakacileka kupuupa, lyalo kwakaboolabo tontolo. 40Mpeeke wakaambila bashikwiiya bakwe ayi, “Nciinshi ncemutoloonda? Sa tamucite lushomo?” 41Sombi boonse bakalinga kuloondete abuumbi akuliipusha beene ayi, “Ino uyu ngumuntu uli buyani cakwaamba ayi cipuupu amaaba shoonse shilamunyumfwila?”
Currently Selected:
Maako 4: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.