Maako 2
2
Jesu mbwaakashilika musankwa wakalinga kuyuminite mubili
(Mate 9:1-8; Luka 5:17-26)
1Ndipakeenda nshiku shiniini, Jesu wakaboolela muKapenaumu alimwi bantu bakanyumfwa ayi nkwaali kuŋanda. 2Bantu baanji bakayoboloka cakwaamba ayi kwakabula amusena wakacaala, apamulyango poonse pakesula. Lyalo Jesu wakabashimikila maswi akwe Lesa. 3Kaaciisha, bantu bamwi bakashika. Ono bone bakalinga kuyumwite musankwa wakalinga kuyuminite mubili. 4Muceebo bakaalilwa kumwiinsha kumutola kuli Jesu, mulandu wa kufula kwa bantu, bakatanta paciluli ca ŋanda akupanga bulyango kupimabo peenka pakalinga Jesu. Bakamwiinsha akumuleleesha pamacila kushikila panshi. 5Jesu ndyaakabona lushomo lwabo, wakaambila wakalinga kuyuminite mubili ayi, “Ndaba, shibiibi shako shalekelelwa.”
6Lyalo bafundishi ba Milawo bakalingaawo, bakatalika kuyeeya mumyoyo yabo ayi, 7“Ino uyu muntu utokwaambilanshi bobulya? Nkucobola Lesa uku! Ngani weenga walekelela shibiibi? Sa te nguLesa eenkabo?”
8Mpomunyaawo Jesu wakeshiba nshibakalinga kuyeeya mumyoyo yabo. Lyalo wakabaambila ayi, “Ino mutooyeeyelanshi shintu sha mushobo uyu mumyoyo yanu? 9Ncili cuubu kwaambila muntu uyu ayi, ‘Shibiibi shako shalekelelwa’, nabi kwaamba ayi, ‘Nyamuka, bwesa macila ako unooya’? 10Sombi ntooyanda kwaamba ayi mwishibe ayi MwanaaMuntu ulicite bulemu ankusu shakulekelela shibiibi pacishi ca panshi.” Mpomunyaawo wakaambila uyuminite mubili ayi, 11“Ntookwaambila, nyamuka, bwesa macila ako, uye kumishaanu.” 12Bantu boonse kabamubwene, wakabuka, wabwesa macila akwe, kaaya. Boonse bakakankamana akulumbaisha Lesa akwaamba ayi, “Tatuna kucibonaawo camushobo uyu!”
Jesu mbwaakeeta Lefi
(Mate 9:9-13; Luka 5:27-32)
13Jesu wakaboolela alimwi kulubasu lwa Lweenge lwa Galili. Bantu baanji bakesa kuli nguwe, lyalo wakatalika kubeeisha. 14Ndyaakalinga kuya bweenda, wakabona Lefi mwanaakwe Alufeyasi, kaashite mukaanda ka musonko. Mpeeke Jesu wakamwaambila ayi, “Nkonkele!” Alakwe wakanyamuka akumukonkela.
15Ono Jesu wakalinga kulya muŋanda yakwe Lefi. Beshikusonkesha abantu batakonkeli Milawo yakwe Mose bakalya anguwe abashikwiiya bakwe mukwiinga bantu baanji ba mushobo uyo bakamukonkela. 16Lyalo bafundishi ba Milawo, baFalisi, ndibakabona ayi utoolya abantu aba, bakeepusha bashikwiiya bakwe ayi, “Ino utoolitanshi abeshikusonkesha alimwi abantu batakonkeli Milawo yakwe Mose?”
17Ndyaakanyumfwa mwiipusho wabo, Jesu wakabaambila ayi, “Teshi bantu bayumu balangoola mushiliki, sombi balwashi beenka. Nshikwe kwisa mukwiita baluleme, sombi bamucita shibi.”
Mwiipusho wa pakulikasha kulya
(Mate 9:14-17; Luka 5:33-39)
18Bumwi bushiku bashikwiiya bakwe Joni Mubombeki alimwi abashikwiiya ba baFalisi, bakalinga paciindi ca kulikasha kulya. Bantu bamwi bakesa kuli Jesu akwiipusha ayi, “Nceebonshi bashikwiiya bakwe Joni aba baFalisi balaba aciindi ca kulikasha kulya, sombi bashikwiiya bako tabalikaashi?”
19Jesu wakabakumbula ayi, “Sa inga babye shibwiinga bafwa nsala shibwiinga kaacili abo? Sobwe! Kulilabo shibwiinga kaali abo, inga tabakoonshi kufwa nsala. 20Sombi ciindi cilaakushika shibwiinga ndyeshi akakushikweewo pali mbabo. Paciindi ico ndyeshi bakalikashe kulya.
21“Taaku muntu utunga cimami ca nsalu ipya pacakufwala cikulukulu. Ceebo cimami cipya mukukokonyana, nsalu ikulukulu ilakwamuka mweenka mwakeela cimami. Aboobo cilyango cilakomenenaako. 22Mbweeke ubo taaku muntu weenga wabika waini upya munkomwe sha shipaya shikulukulu. Mukwiinga na wabikaamo, nkomwe shilapasuka, waini ankomwe shoonse shilanyonyooka. Waini upya ulabikwa munkomwe sha shipaya shipya.”
Mwiipusho wa pabushiku bwakookesha bwa Cibelu
(Mate 12:1-8; Luka 6:1-5)
23Bumwi bushiku Jesu abashikwiiya bakwe bakalinga kwiinda mumyuunda ya witi pabushiku bwakookesha bwa Cibelu. Ndibakalinga kuya ceenda, bashikwiiya bakwe bakatalika kuyapa mitwi ya witi.#Duto 23:25 24Paceebo ceeco baFalisi bakeepusha Jesu ayi, “Bona, batoocitilanshi cintu citasuminishikwi aMilawo pabushiku bwakookesha bwa Cibelu?”
25Jesu wakabakumbula ayi, “Sa tamuna kubelengaawo cakacita Defedi ciindi lakwe ababye ndibakanyumfwa nsala kabatacite cakulya? 26Nshiku isho Abyata ndyaakalinga mupailishi munene, Defedi wakenjila muŊanda yakwe Lesa akulya cimaande cisalalite. Wakalya cimaande ico cakalinga kulyabo bapailishi kweelana aMilawo akupaako babye.”#Bene Lefi 24:9#1 Samwe 21:1-6
27Lyalo Jesu wakabaambila ayi, “Bushiku bwakookesha bwa Cibelu bwakapangilwa muntu, kuteshi muntu kupangilwa Cibelu. 28Nkokwaamba ayi, MwanaaMuntu ngoMwaami wa shoonse abushiku bwakookesha bwa Cibelu.”
Currently Selected:
Maako 2: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.