Mateyo 26

Mbobakapangana shakucaya Jesu

(Maako 14:1-2; Luka 22:1-2; Joni 11:45-53)

1Ono Jesu ndyaakamanisha kwaamba makani oonse aya, wakaambila bashikwiiya bakwe ayi, 2“Mulishi kwaamba ayi kwacaalabo nshiku shobilo ayi bushike bushiku bwa Pasika bwakwiibaluka kusotokela. Lyalo MwanaaMuntu ulaakwaabwa ayi apopwe pamucilingano.”#Kulo 12:1-27

3Lyalo bamatanjilili ba bapailishi abamaloba ba baJuda bakabungana mulubansa lwa mupailishi munene Kayafasi. 4Bakasuminishanya ayi bacane nshila yakucatilamo Jesu cabushishi kwaamba ayi bamucaaye. 5Bakaamba ayi, “Tatweelete kumucata pabushiku ubu bwakusekelela mukwiinga inga pacitika shimfulunganya pabantu beshi bakanooliiwo.”

Jesu mbwaakananikwa mafuta kuBetani

(Maako 14:3-9; Joni 12:1-8)

6Jesu wakalinga kundabala ya Betani muŋanda yakwe Simoni wiitwa ayi shimanata. 7Jesu ndyaakalinga kulya, kwakesa mwanakashi umwi wakalinga kucite musaashi wakapangwa kulibwe lya alabasita, kauswite mafuta anunkila kabotu amakwebo ayo ngaakapumwita pamutwi wakwe Jesu.#Luka 7:37-38 8Sombi bashikwiiya bakwe ndibakabona boobo, bakatongooka akwaamba ayi, “Ceebonshi kunyonyoola bobulya mafuta? 9Mafuta aya naakwiinga aulishikwa mweelo unene akupa maali ayo kubakandu!” 10Sombi Jesu wakeshiba nshebakalinga kwaamba, lyalo wakabaambila ayi, “Ino mutoopensheshanshi mwanakashi uyu? Wancitila cintu cibotu abuumbi, 11mukwiinga bakandu muli abo nshiku shoonse, sombi nebo teshi nooli anu lyoonse.#Duto 15:11 12Ndyaantila mafuta pamubili, waunanikilabo limwi mafuta mubili wangu kwaamba ayi unoolindilabo kufukilwa. 13Ntoomulwiita calushinisho ayi, kuli koonse bantu nkweshi bakanooshimika Makani Abotu mucishi coonse ca panshi, balaakunokwaamba acikani ici cacita mwanakashi uyu mukumwiibaluka.”

Judasi mbwaakasumina kwaaba Jesu

(Maako 14:10-11; Luka 22:3-6)

14Mpomunyaawo umwi wa bashikwiiya bakwe Jesu bali likumi abobilo, wiitwa ayi Judasi Isikalyoti, wakaya kubamatanjilili ba bapailishi 15akwiipusha ayi, “Ino inga mwampanshi na ndaaba Jesu kuli ndimwe?” Mpeeke bakabelenga maali asilifa ali makumi otatwe.#Seka 11:12 16Kuswawaawo Judasi wakatalika kuyandoola ciindi ceelete cakwaabilawo Jesu.

Jesu mbwaakalya paska abashikwiiya bakwe

(Maako 14:12-21; Luka 22:7-13, 21-23; Joni 13:21-30)

17Ono pabushiku butaanshi bwakusekelela kwakulya Cimaande, bashikwiiya bakwe bakamwiipusha ayi, “Ino nkuli nkomusuni ayi tukamubambile kwakulita cakulya ca bushiku bwa Pasika bwakwiibaluka kusotokela?” 18Lakwe Jesu wakaamba ayi, “Kamuya kumusankwa mundabala inene iyi mukamulwiite ayi, ‘Mufundishi wesu waamba ayi, ciindi cangu cili pafwaafwi. Ntooyanda kulita cakulya ca bushiku bwa Pasika abashikwiiya bangu muŋanda yako.’ ” 19Mpeeke bashikwiiya balya bakacita kweelana aJesu mbwaakabaambila. Lyalo bakabamba cakulya ca bushiku bwa Pasika.

20Ndipakashiyashiyabo, Jesu abashikwiiya bakwe bali likumi abobilo bakekala ayi balye. 21Ndibakalinga kulya, Jesu wakaamba ayi, “Ntoomulwiita calushinisho ayi umwi mulikoto lyanu utoongaba.” 22Mpeeke bashikwiiya bakwe bakacatwa buumba akutalika kumwiipusha womwi womwi ayi, “Sa ndime, Nkambo?” 23Lakwe wakakumbula ayi, “Ngooyo ngoontobwengaakwe mumbale yomwi. 24MwanaaMuntu utooya kulufu kweelana ambokulembetwe, sombi mapensho kuli wooyo muntu utoomwaaba! Naakwiinga cakabotabo akutashalwa muntu uyu.” 25Mpomunyaawo alakwe Judasi shikumwaaba wakeepusha ayi, “Sa ndime, Nkambo?” Jesu wakamukumbula ayi, “Wacaamba omwiine.”

Mulalilo wa Mwaami

(Maako 14:22-26; Luka 22:14-20; 1 Koli 11:23-25)

26Ndibakalinga kulya, Jesu wakabwesa cimaande, walumba Lesa, akukomoona wapa bashikwiiya akubalwiita ayi, “Amutambule mulye, uyu ngumubili wangu.” 27Lyalo wakabwesa nkomeshi, walumba Lesa, akupa bashikwiiya bakwe akubaambila ayi, “Amunweemo noonse 28mukwiinga ubu mbulowa bwangu bwa cipangano cipya, bweshi bukatiilwe kwaamba ayi baanji balekelelwe shibiibi shabo. 29Ntoomulwiita ayi, teshi nkanwewo lyobilo maanshi a shisepo sha minyansa, kushikila pabushiku ubo ndyeshi nkanwe anu maanshi apya a shisepo ishi, muBweene bwa baTa.”

30Ndibakamana kwiimba lwiimbo lwakulumbaisha Lesa, bakaya kuKalundu ka Olifi.

Jesu mbwaakaambila Pita ayi ulaakunkaka

(Maako 14:27-31; Luka 22:31-34; Joni 13:36-38)

31Jesu wakaambila bashikwiiya bakwe ayi, “Sunu lyeenka mashiku, mwebo noonse mutotyongola akunshiya neenka. Kweelana ambokulembetwe ayi, ‘Ndaakucaya mweembeshi, mpeeke mbelele shoonse shilaakupalangana.’ 32Sombi na nkabushikwe kuswa kubafu, ndaakutanjila kuya kuGalili.” 33Sombi Pita lakwe wakamwaambila ayi, “Nabi boonse bakatyongooke akumushiya, sombi nebo teshi nkamushiyeewo.” 34Mpomunyaawo Jesu wakaambila Pita ayi, “Ntookulwiita calushinisho ayi sunu lyeenka mashiku, kombwe kaatana kulila, utokwaamba mankanda otatwe ayi toonshi.” 35Lakwe Pita wakaamba kuli nguwe ayi, “Nabi na baambe ayi bancaile pantu pomwi amwebo, nebo inga nshaambiiwo ayi nshimwishi.” Lyalo bashikwiiya boonse bakaamba bweenkoobo.

Jesu mbwaakapaila mumuunda wa Getisemani

(Maako 14:32-42; Luka 22:39-46)

36Lyalo Jesu wakaya abashikwiiya bakwe kumusena wiitwa ayi Getisemani, mpeeke wakabaambila ayi, “Amwikale pano ndyeenciya kokulya mukupaila.” 37Mpeeke Jesu wakaya aPita alimwi abana bakwe Sebedi basankwa bobilo. Lyalo Jesu wakatalika kuba abuumba akulisukama mumoyo. 38Mpomunyaawo wakabaambila ayi, “Moyo wangu wacatwa buumba bwakuyanda kuncaya. Amwikale pano munoolindilila kamulibambite pantu pomwi anebo.” 39Mpeeke Jesu wakeendakobo paniini, wakawita panshi akutalika kupaila ayi, “Ta, na kacikonsheka, nkomeshi ya mapensho inyindilile, nakubi boobo mutaciti kuyanda kwangu. Sombi mucite kuyanda kwanu.” 40Ndyaakaboola kubashikwiiya bakwe botatwe balya, wakacana balilete. Lyalo wakaambila Pita ayi, “Sa mwebo mwaalilwa kulindilila anebo apaciindi ciniinibo ici? 41Amwikale kamulibambite, akupaila kwaamba ayi mutanjili mumasunko. Moyo walo ulisuni, sombi mubili ngowabula nkusu.”

42Jesu wakaboolela mukupaila alimwi ayi, “Ta, na nkomeshi ya mapensho iyi inga tainyindilili kaantana kunwa, anu kuyanda kwanu akucitike.” 43Ndyaakaboola alimwi, wakacana balilete ceebo shikoye shabo shakalinga kulemete kutulo. 44Jesu wakabashiya alimwi akuya mukupaila lyatatu, kaamba maswi ngomunya alya ataanshi. 45Lyalo wakaboolela kubashikwiiya bakwe akubaambila ayi, “Sa abobulya mucilete akunocookesha? Amubone, ciindi cashikila, MwanaaMuntu ono utokwaabwa mumaansa a bamucita shibi. 46Amunyamuke, katiya. Amubone, shikungaba washika kale.”

Jesu mbwaakacatwa

(Maako 14:43-50; Luka 22:47-53; Joni 18:3-12)

47Jesu ndyaakalinga kucaamba, alakwe Judasi womwi wa bashikwiiya bakwe Jesu bali likumi abobilo wakashika. Wakesa abantu baanji baanji bakalinga kucite mipeeni ankooli. Bantu aba bakabatuma mbamatanjilili ba bapailishi alimwi abamaloba ba baJuda. 48Ono uyo shikwaaba Jesu wakalinga wabapa kale citondesho ayi, “Uyo ngweshi njeenkaanshe akufyonta mwishibe ayi ngonguwe, mumucate.” 49Judasi ndyaakashika, wakeendililabo kuya kuli Jesu akwaamba ayi, “Mwaboneka Nkambo!” Mpomunyaawo wakamufyonta. 50Lakwe Jesu wakamwaambila ayi, “Ndaba, cita nceweendela!” Mpeeke balya bantu bakalibumba pali Jesu, bamucata. 51Lyalo umwi wa baabo bakalinga aJesu, wakakusha mupeni wakwe akusutula kutwi musha wa mupailishi munene. 52Sombi Jesu wakamwaambila ayi, “Boosha mupeni mookala ceebo boonse balwanisha kumupeeni abalo balaakucaikwa kumupeeni. 53Sa tooshi kwaamba ayi inga ndasengabo shuulu sha baanjelo kuli baTa alimwi ayi inga bampa paciindi ceenka ico? 54Sombi na ndacita boobo, ino inga shacitika buyani shilembetwe muMalembo akwe Lesa ayi ishi shilyeelete kucitika?” 55Lyalo Jesu wakabaambila bantu baanji balya ayi, “Ino mweshitanshi amipeeni alimwi ankooli pakwisa mukuncata anga ndimwiipi? Nebo ndakalinga anu inshiku shiinji, kaamwiisha muŊanda yakwe Lesa, sombi tamukwe kuncataawo, sobwe.#Luka 19:47; 21:37 56Sombi shoonse ishi shacitika kwaamba ayi shakalemba balaluki bakulukulu shicitike cancinencine.” Mpeeke bashikwiiya bakwe boonse bakamupalangana, bamushiya eenka.

Jesu mbobakamutola kunkuta

(Maako 14:53-65; Luka 22:54-55, 63-71; Joni 18:13-14, 19-24)

57Bantu abo bakacata Jesu bakamutola kuŋanda yakwe Kayafasi, mupailishi munene, uko kwakalinga kubungene bafundishi ba Milawo abamaloba ba baJuda. 58Sombi Pita wakalinga kuya cikonkela Jesu palaale, kushikila wakaya mukwinjila amulubansa lwa ŋanda ya mupailishi munene. Wakenjila mukati akwikala pantu pomwi abeshikulindilila kuŋanda yakwe Lesa ayi abone nceshi cicitike. 59Bamatanjilili ba bapailishi alimwi abaabo boonse beendelesha munkuta, bakalinga kuyandoola bukamboni bwakubekesha Jesu kwaamba ayi bamucanine mulandu wakumucailaawo. 60Sombi tabakwe kubucana nakubi kwaamba ayi bantu baanji bakalinga kupa bukamboni bwakubeca pali Jesu. Kumamanino kwakesa bantu bobilo 61akwaamba ayi, “Uyu muntu wakaamba ayi, ‘Nebo, ndakonsha kumwaaya Ŋanda yakwe Lesa, akwiiyaka alimwi munshiku shotatwe.’ ”#Joni 2:19 62Lyalo mupailishi munene wakanyamuka akwiipusha Jesu ayi, “Sa teshi ukumbuleewo pamakani aya oonse ngobatokwaambila?” 63Sombi Jesu wakoomunabo tontolo. Mupailishi munene wakeepusha Jesu alimwi ayi, “Ntookwaambila muliina lyakwe Lesa muumi ayi, ulumbile na ndiwe Usalitwe wakwe Lesa ulya, Mwanaakwe Lesa.” 64Jesu wakamukumbula ayi, “Mwacaamba nobeene. Sombi ntoomwaambila noonse ayi, kuswa cecino ciindi mulaakubona MwanaaMuntu kaashiite kulyaansa lyalulyo lwa baIshi, Beshinkusu shoonse. Mulaakumubona keesa mumakumbi a kwiculu.”#Danye 7:13 65Mpeeke mupailishi munene wakakwamoona shakufwala shakwe, akwaamba ayi, “Nkucobola Lesa uku. Ono apa sa inga katucilangoola abamwi bakamboni? Noonse mwalinyumfwila mbwaacobola Lesa. 66Ono mutooyeeya buyani?” Lyalo boonse bakakumbula ayi, “Ulyeelete kucaikwa.”#Bene Lefi 24:16 67Mpomunyaawo bakamushipila mate pameenso akumuuma. Bamwi bakamuuma mapaka#Isa 50:6 68bakaamba ayi, “Twaambile webo oUsalitwe wakwe Lesa, ino ngani wakuuma?”

Pita mbwaakakaka Jesu

(Maako 14:66-72; Luka 22:56-62; Joni 18:15-18, 25-27)

69Pita wakalinga kushiite pansengwe mulubansa lwa ŋanda. Mpeeke mwanakashi musebenshi umwi wakaya kuli Pita akumwaambila ayi, “Awebo wakalinga aJesu wa kuGalili.” 70Sombi Pita wakakaka pameenso a bantu boonse kwaamba ayi, “Isho nshotokwaamba nshishishiiwo tau.” 71Cilya Pita ncaakaamba ayi aswe mulubansa lwa ŋanda, aumwi mwanakashi musebenshi wakamubona, akutalika kulwiita baabo bakalingaawo ayi, “Alakwe muntu uyu wakalinga aJesu wa kuNasaleti.” 72Pita wakakaka alimwi, akulumbila ayi, “Ncakwiila nebo nshimwinshiiwo muntu uyo!” 73Ndipakeendabo ciindi ciniini, abo bakalingaawo bakaya kuli Pita akumwaambila ayi, “Ncakwiila webo uli wa mulikoto lyakwe Jesu mukwiinga mwaambo wako utookuyubulula.” 74Sombi Pita wakaalabo, wasansaawo amaanshi akutalika kulumbila ayi, “Lesa ulimbwene na ntokwaamba cakubeca. Uyu muntu nebo nshimwishiiwo.” Paciindi ceenka ico kombwe wakalila. 75Mpeeke wakeebaluka maswi akamulwiita Jesu ayi, “Kombwe kaatana kulila, webo Pita ulaakunkaka mankanda otatwe.” Lyalo wakaswita pansengwe, waya walila abuumbi.

Currently Selected:

Mateyo 26: BBBLI

Highlight

Compare

Copy