Mateyo 1
1
Bamashali bakulukulu bakwe Jesu Klistu
(Luka 3:23-38)
1Jesu Klistu wakashalwa mulunyungu lwakwe Defedi aAbulaamu. 2Abulaamu wakashala Isaki, Isaki wakashala Jakobo, alakwe Jakobo wakashala Juda abamakwabo bamwi boonse. 3Juda wakashala Pelesi aSela muli Tama, Pelesi wakashala Esiloni, alakwe Esiloni wakashala Lamu. 4Lamu wakashala Aminadabu, alakwe Aminadabu wakashala Nashoni, alakwe Nashoni wakashala Salumoni. 5Salumoni wakashala Bowasi muli Laabu, Bowasi wakashala Obedi muli Lute, alakwe Obedi wakashala Jese. 6Jese wakashala mwaami Defedi.
Ono Defedi wakashala Solomoni muli muka Uliya. 7Solomoni wakashala Leoboamu, Leoboamu wakashala Abija, alakwe Abija wakashala Asa. 8Asa wakashala Jeoshafati, Jeoshafati wakashala Jolamu, alakwe Jolamu wakashala Usiya. 9Usiya wakashala Jotamu, Jotamu wakashala Aasi, alakwe Aasi wakashala Esekiya. 10Esekiya wakashala Manase, Manase wakashala Amoni, alakwe Amoni wakashala Josiya. 11Josiya wakashala Jekoniya abamakwabo bamwi muciindi bene Isilaeli ndibakalinga kutolwa kuBabiloni.#2 Baami 24:14-15; 2 Maka 36:10; Jele 27:20
12Pesule lyakutolwa kuBabiloni, Jekoniya wakashala Shiyalutyelo, alakwe Shiyalutyelo wakashala Selubabelo. 13Selubabelo wakashala Abyudi, Abyudi wakashala Eliyakimu, alakwe Eliyakimu wakashala Aso. 14Aso wakashala Sadoki, Sadoki wakashala Akimu, alakwe Akimu wakashala Elyudi. 15Elyudi wakashala Eliyasa, Eliyasa wakashala Matani, alakwe Matani wakashala Jakobo. 16Jakobo wakashala Josefu muka Maliya, banyina Jesu wiitwa ayi Klistu.
17Anu mashalane oonse kutalikila kuli Abulaamu kushikila kuli Defedi akalinga likumi aone. Akutalikila kuli Defedi kushikila kuciindi bene Isilaeli ndibakatolwa kuBabiloni, apalo pakalinga likumi aone. Akwalo kuswa kuciindi cakutolwa kuBabiloni kushikila kukushalwa kwa Usalitwe wakwe Lesa, apalo pakalinga mashalane likumi aone.
Kushalwa kwakwe Jesu Klistu
(Luka 2:1-7)
18Ono mbulya mbwaakashalwa Jesu Klistu. Maliya banyina bakalinga kumamikitwe kuli Josefu, sombi kabatana kweebana, cakacanika ayi bakalinga pakati kwiinda munkusu sha Mushimu Usalashi.#Luka 1:27 19Sombi Josefu ibaye, wakalinga musankwa ululeme alimwi taakalinga kusuni ayi amulenshe nsoni Maliya. Aboobo wakayeeya kumanisha cibusa cabo kumapela. 20Ndyaakalinga kuciyeeya cikani ici, munjelo wakwe Lesa wakaboneka kuli nguwe muciloto kaamba ayi, “Josefu, omwanaakwe Defedi, utaloondi kweeba Maliya, mukwiinga ulimitite lyankusu sha Mushimu Usalashi. 21Ulaakushala mwaana musankwa, ukamutuumbe liina ayi Jesu, mukwiinga ngweshi akapulushe bantu bakwe kuswa kushibiibi shabo.”#Luka 1:31
22Shoonse ishi shakacitika, ayi maswi akaamba Mwaami kwiinda mumulaluki mukulukulu abe alushinisho, akwaamba ayi, 23“Ncakwiila mwanakashi utana kukumanawo kale amusankwa ulaakumita, akushala mwaana musankwa eshi akanokwiitwa ayi Imanuweli,” (nkokwaamba ayi “Lesa uli aswebo.”)#Isa 7:14
24Josefu ndyaakapapuka wakacita bweenka mbwaakamwaambila munjelo wa Mwaami Lesa, akumweeba Maliya. 25Sombi taakwe kukumanaakwe pamubili kaacili pakati. Wakashala mwaana musankwa akumutumba ayi Jesu.#Luka 2:21
Currently Selected:
Mateyo 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.