Luka 6
6
Mwiipusho wa pabushiku bwakookesha bwa Cibelu
(Mate 12:1-8; Maako 2:23-28)
1Bumwi bushiku Jesu abashikwiiya bakwe bakalinga kwiinda mumyuunda ya witi pabushiku bwakookesha bwa Cibelu. Ndibakalinga kuya ceenda, bashikwiiya bakwe bakatalika kuyapa mitwi ya witi akwiipekesa mumaansa akunoolya witi.#Duto 23:25 2Mpomunyaawo baFalisi bamwi bakeepusha ayi, “Ino mutoocitilanshi citasuminishikwi aMilawo pabushiku bwakookesha bwa Cibelu?”
3Jesu wakakumbula ayi, “Sa tamukwe kubelengaawo cakacita Defedi ciindi lakwe ababye ndibakanyumfwa nsala? 4Wakenjila muŊanda yakwe Lesa akubwesa cimaande cisalalite. Wakalya cimaande ico cakalinga kulyabo bapailishi kweelana aMilawo akupaako babye.”#Bene Lefi 24:9#1 Samwe 21:1-6
5Lyalo Jesu wakabaambila ayi, “MwanaaMuntu ngoMwaami wa bushiku bwakookesha bwa Cibelu.”
Jesu mbwaakashilika musankwa uyuminite lyaansa
(Mate 12:9-14; Maako 3:1-6)
6Pabushiku bumwi bwakookesha bwa Cibelu, Jesu wakenjila mucoonde ca baJuda mukwiisha. Mucoonde umo mwakalinga musankwa wakalinga kuyuminite lyaansa lyalulyo. 7Bafundishi ba Milawo abaFalisi bakalinga kulangishisha ayi babone na Jesu utooshilika musankwa uyo pabushiku bwakookesha ayi bamucanine mpapo bubi. 8Sombi wakalinga kwishi ncebakalinga kuyeeya. Mpeeke wakaambila musankwa uyo wakalinga kuyuminite lyaansa ayi, “Kosa wiimikane kunembo kuno.” Alakwe wakanyamuka akuya mukwiimikana kunembo. 9Lyalo Jesu wakabaambila ayi, “Ntooyanda kumwiipusha ayi, ‘Ino Milawo ilatusuminisha kucitanshi pabushiku bwakookesha bwa Cibelu? Kucita cibotu na kucita cibiibi? Kupulusha buumi bwa muntu na kubunyonyoola?’ ” 10Amane kwaamba boobo wakalangilisha bantu boonse bakalinga mucoonde ca baJuda, mpeeke wakaambila musankwa uyo ayi, “Fungulula lyaansa lyako.” Alakwe wakalifungulula, lyalo lyakaba kabotu.
11Sombi balo bakakalala abuumbi akutalika kulifuyafuya mbweenga bacita Jesu.
Jesu mbwaakasala batumwi bali likumi abobilo
(Mate 10:1-4; Maako 3:13-19)
12Muciindi ico Jesu wakaya kukalundu mukupaila alimwi bwakamucetabo kaapaila. 13Ndibwakaca wakeeta bashikwiiya bakwe. Lyalo pakati kabo wakasalawo bali likumi abobilo abo mbaakatumba ayi batumwi. 14Menaabo ngaaya: Simoni uyo ngwaakapa liina lya Pita, aAndulu mukwabo, Jemusi aJoni, Filipo aBatolomeyo, 15Mateyo, Tomasi, aJemusi mwanaakwe Alufeyasi alimwi aSimoni shikulwanina lwaanguluko, 16Judasi mwanaakwe Jemusi alimwi aJudasi Isikalyoti wakesa mukwaaba Jesu kunembo.
Jesu mbwaakeeisha akushilika
(Mate 4:23-25)
17Jesu ndyaakakunkuluka pakalundu pantu pomwi abatumwi, wakeemikana paselebete. Pakalinga likoto linene lya bashikwiiya bakwe alimwi alikoto linene lya bantu bakaswa kumbasu shoonse sha kuJudeya akuJelusalemu. Bamwi bakaswa kumandabala anene a Taya aSidoni, akalinga muloombe lwa lweenge. 18Bakesa mukukutika Jesu alimwi ayi malwashi abo amane. Lyalo boonse bakalinga kupenshekwa abashikaswa bakaba kabotu. 19Bantu boonse bakalinga kweelesha kumukumya, mukwiinga nkusu shakalinga kuswa muli nguwe, shakalinga kubashilika boonse.
Bantu bacite coolwe abatacite
(Mate 5:1-12)
20Ono Jesu wakalanga kubashikwiiya bakwe akwaamba ayi,
“Mulicite coolwe mwebo nobakandu
mukwiinga Bweene bwakwe Lesa mbwanu!
21“Mulicite coolwe mwebo nomufwa nsala bulya
mukwiinga mulaakukuta!
“Mulicite coolwe mwebo nomutoolila
mukwiinga mulaakusekelela!
22“Mulicite coolwe nomutoopatwa kubantu, kusuulwa akutukanwa alimwi akwaambwa ayi muli babiibi ceebo ca MwanaaMuntu!#1 Pita 4:14 23Mukakoondwe caakucitika ici akusotooka cakusangalala ceebo cilambu canu ncinene kwiculu. Mukwiinga abalo bakulukulu mbobakacita kubalaluki.#2 Maka 36:16; Mili 7:52
24“Sombi mapensho kuli ndimwe nobabile
mukwiinga mwebo mwatambula kale cilambu canu!
25“Mapensho kuli ndimwe nomukutite bulya
mukwiinga mulaakufwa nsala!
“Mapensho kuli ndimwe nomusekelela bulya
mukwiinga mulaakuungumana alimwi akulila mikunga!
26“Mapensho kuli ndimwe noonse nomwaambwa kuba kabotu kubantu boonse mukwiinga bweenka ubo bamashali babo bakulukulu mbobakalinga kucita kubalaluki babeshi.
Kuba alusuno kubalwani
(Mate 5:38-48; 7:12a)
27“Ono noonse nomutoonkutika ntoomwaambila ayi, ‘Amusune balwani banu alimwi akucita shibotu kubaabo bamupatite. 28Amubasengele coolwe kuli Lesa abo bamushingana alimwi abaabo bamupensha akubapaililaako. 29Na muntu wakuuma kulicili, piluluka akuume kulimwi alyalo. Na muntu wabwesa cakufwala cako capeculu, mupeteewo acakufwala camukati. 30Aba cintu kumuntu woonse wakusenga, alimwi na muntu wabwesa cintu cako, utamwaambili ayi acibooshe. 31Amucitile bantu bamwi bweenka mbomusuni ayi bamucitile.’#Mate 7:12
32“Ono na kamusunibo bantu abo bamusuni, inga Lesa wamupetanshi coolwe? Mukwiinga abalo bamucita shibi balisunibo baabo babasuni! 33Na mulacita shibotu kubaabo beenka bacita shibotu kuli ndimwe, inga Lesa wamupa buyani coolwe? Mukwiinga abalo bamucita shibi mbobacita! 34Na mulakweleteshabo baabo beenka mbomushomete ayi balaakumubooshesha, ino inga mwalumbaishikwa buyani? Kayi abalo bamucita shibi balakweletesha bamucita shibinyinaabo ayi bakababooshele mweelo weenka uyo! 35Sombi mwebo mutaciti boobo, amusune balwani banu alimwi akucita shibotu kuli mbabo. Amukweleteshe kutamba ayi bakamuboosheshe. Lyalo mulaakuba acilambu cinene kwiculu. Mulaakuba bana bakwe Lesa wa kwiculu Wiindaawo uyo ucita shibotu kubaabo bataluumbi ababiibi. 36Amube ankuumbu bweenka mbuli Ishiwanu wa kwiculu.
Makani akoombolosha bantu bamwi
(Mate 7:1-5)
37“Mutoomboloshi bamwi kwaamba ayi amwebo Lesa atakamoomboloshi. Mutapi muntu mulandu kwaamba ayi mutapekwi mulandu amwebo. Sombi amumulekelele, Lesa alakwe ulaakumulekelela. 38Amupe babyaanu shintu nshibatacite, Lesa alakwe ndyeshi akamupe nshemutacite. Lesa ulaakumupa mucipimo cibotu cishindailitwe kashisempooka. Cipimo ncemupiminaamo bamwi alakwe Lesa nceshi akamupimineemo.”
39Mpeeke Jesu wakabaambila cikoshanyo ayi, “Sa muntu moofu inga watanjililwa amoofunyina? Sa te boonse bobilo inga bawita mucilindi?#Mate 15:14 40Taaku muntu utokwiiya wiinda mufundishi wakwe, sombi muntu woonse ulaba mbuli mufundishi wakwe ndyaamanisha kwiiya.#Mate 10:24-25; Joni 13:16; 15:20
41“Ino inga wabona buyani kapampaansha kali muliinso lya mubyo akushiya cisamu cili muliinso lyako? 42Inga waambila buyani mukwanu ayi, ‘Mukwabo, tubone nkukusheko kapampaansha muliinso,’ na muliinso lyako omwiine kamuli cisamu? Webo omuntu nowaamba nshootaciti, taanguna kusha cisamu cili muliinso lyako, ndyeshi ubone kabotu akukusha kapampaansha kali muliinso lya mukwanu.
Cisamu ashisepo sha ncico
(Mate 7:16-20; 12:33-35)
43“Taaku cisamu cibotu ceenga cacata shisepo shibiibi, nabi cisamu cibiibi kucata shisepo shibotu. 44Nkokwaamba ayi cisamu cili coonse cilashibilwa kushisepo nshecicata. Taaku muntu uyapa nkuyu kucisamu ca myuumfwa nabi minyansa kucisamu ca kankoloŋonso.#Mate 12:33 45Muntu uli kabotu ulaamba shibotu shili mumoyo wakwe, alakwe muntu mubiibi ulaamba shibiibi shili mumoyo wakwe mukwiinga muntu ulaamba shiswite mumoyo wakwe.#Mate 12:34
Shabayaki ba maanda bobilo
(Mate 7:24-27)
46“Ceebonshi mulanjita ayi, ‘Nkambo, Nkambo’ sombi kamutaciti nshemwaambila? 47Uyo woonse wisa kuli ndime akunyumfwa maswi angu akwaacita, ntoomutondesha mbwaabete. 48Uli anga ngumuntu wakakaba lwiimbi lulaamfu lwakashika palibwe, akuyakaawo ŋanda. Mulonga ndiwakesula, maanshi akatalika kuuma kuŋanda iyo. Sombi taikwe kuwa mukwiinga wakeeyaka kabotu. 49Sombi uyo unyumfwa maswi angu akutaacita, ulibo anga ngumuntu wakayaka ŋanda cakutakaba lwiimbi. Mulonga ndiwakesula, maanshi akatalika kuuma kuŋanda. Lyalo yakawa akunyonyooka abuumbi.”
Currently Selected:
Luka 6: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.