Bene Lefi 19
19
Milawo ipusenepusene
1Mpomunyaawo Mwaami Lesa wakaambila Mose ayi, 2“Lwiita bene Isilaeli boonse ayi babe bantu basalalite, ceebo nebo neMwaami Lesa wanu ndisalalite.#Bene Lefi 11:44-45; 1 Pita 1:16
3“Womwi awomwi ulyeelete kulemeka banyina abaishi, alimwi mulyeelete kulama inshiku shakookesha kweelana ambondamulwiita. Nebo ndime Mwaami Lesa wanu.#Kulo 20:12; Duto 5:16; Kulo 20:8; Duto 5:16
4“Tamweelete kushiya ndime akutalika kulambila shibumbwabumbwa. Tamweelete kubumba balesa ba sheela akutalika kubalambila. Nebo ndime Mwaami Lesa wanu.#Bene Lefi 26:1; Kulo 20:23; 34:17
5“Ono na mwacaya munyama ayi ngumulambu wa bwanabwankashi, mulyeelete kukonkela milawo njendamupa, lyalo ndaakutambula mulambu uyo. 6Nyama ilyeelete kulikwa pabushiku bweenka munyama ndyaacaikwa, nabi pabushiku bwakuboolaawo. Nyama yoonse yeenga yacaalaawo pabushiku bwatatu ilyeelete kutentwa 7mukwiinga teesalalite kweelana aMilawo. Ono na muntu umwi weelya, teshi nkatambule mulambu uyo. 8Uyo woonse weenga walya nyama iyo ulaakuba amulandu ceebo walengesha cintu cabengwa kuli ndime kuba cintubo. Aboobo teshi akanoociyeeyelwa kuba mulikoto lya bantu bangu.
9“Pakunootebula mumyuunda yanu, mutakanooshisha moyeela alimwi mutakanooboolela sheesho shakacaalamo pakumanisha kutebula. 10Mutanooboolela mumyuunda ya minyansa mukuyapa yeeyo yakalinga kucaalaamo nabi kubwesa yakaloka panshi. Mulyeelete kushiila bakandu abaswamashi. Nebo ndime Mwaami Lesa wanu.#Bene Lefi 27:15; Duto 24:19-22
11“Mutanokwiipa, kubeca nabi kuba shikucenjeeka.#Kulo 20:15; Duto 5:19; Kulo 20:16; Duto 5:20 12Mutanoolumbila muliina lyangu na ulishi ayi teshi ukacite cintu ico, ceebo na wacita boobo, nkucobola liina lyangu. Nebo ndime Mwaami Lesa wanu.#Kulo 20:7; Duto 5:11; Mate 5:33
13“Mutapenshi muntu nabi womwi, nabi kumwiipila. Tamweelete kucelwa kufolesha musebenshi wanu nabi bushiku bomwibo.#Duto 24:14-15 14Tamweelete kushingana muntu ushinkite matwi nabi kubika cintu kunembo lya moofu ayi alyuumeemo, sombi amulemeke ndime neMwaami Lesa wanu.#Duto 27:18
15“Mulyeelete kushomeka akululika pakoombolosha. Mutabi akasalulushi kubantu bakandu nabi kuloonda babile.#Kulo 23:6-8; Duto 16:19 16Tamweelete kuya cibekesha muntu nabi womwi, alimwi mutapi bukamboni bweenga bwalengesha buumi bwa shikamukobonyinaanu kunyonyoolwa. Nebo ndime Mwaami Lesa.
17“Tamweelete kubikila mfundilishi muntu nabi womwi, sombi mubandike pacilubo cili pakati kanu kwaamba ayi mutakabishi ceebo ca nguwe.#Mate 18:15 18Kuteelesha kubisha muntu nabi womwi ayi ceebo alakwe wakamubishisha nabi kutolelela kumupata, sombi amusune mubyaanu bweenka mbomulisuni nobeene. Nebo ndime Mwaami Lesa.#Mate 5:43; 19:19; 22:39; Maako 12:31; Luka 10:27; Loma 13:9; Gala 5:14; Jemu 2:8
19“Kamukonkela milawo yangu. Tamweelete kusuminisha mishobo ya banyama mbomufubite ayi banooshalana amishobo imwi ipusene. Tamweelete kushanga mbuto shobilo shipusene mumuunda womwi, alimwi tamweelete kufwala shakufwala shakapangwa kumishobo yobilo ya shisani.#Duto 22:9-11
20“Ono na musankwa wakumana amwanakashi musha uyo wakamamikilwa kumusankwa umwi, sombi kaatana kulipililwa maali nabi kwaangululwa, boonse bobilo balaakupekwa mulandu. Sombi teshi bakacaikwe mukwiinga mwanakashi uyo taana kwaangululwa. 21Musankwa uyo ulaakuleta mbelele isankwa kumulyango wa Tente ya Cipangano ayi ngumulambu wakumana milandu. 22Mpeeke mupailishi ulaakucita kweelana aMilawo pakusalasha, aboobo Lesa ulaakumulekelela.
23“Na mukenjile mucishi ca Kenani akushanga cisamu cili coonse ca shisepo, mulyeelete kulanga shisepo isho ayi tashisalalite kwa myaaka yotatwe itaanshi. Muciindi ico tamweelete kushilya. 24Mumwaaka wane, shisepo shoonse shilaakupekwa ayi ncipo cakulumbaisha ndime neMwaami Lesa. 25Sombi mumwaaka wasanu inga mwalya shisepo isho. Na mukacite shoonse ishi, shisamu shanu shilaakucata shisepo shiinji. Nebo ndime Mwaami Lesa, Lesa wanu.
26“Tamweelete kulya nyama ili yoonse icicite bulowa mukati.
“Tamweelete kuba beshikusonda nabi baloshi.#Mata 9:4; Bene Lefi 7:26-27; 17:10-14; Duto 12:16, 23; 15:23; Duto 18:10
27“Kutacesa misusu ili mumbasu sha mutwi wanu nabi kuceeshako ndesu, 28alimwi tamweelete kulyaanda akulinengoola pamibili ayi mulambile bafu. Nebo ndime Mwaami Lesa.#Bene Lefi 21:5; Duto 14:1
29“Kutasebaanya bana banu banakashi kwiinda mukubaalula bafuule ba muŋanda ya balesa bamwi. Na mwacita boobo, mulaakusandukila kubalesa abo, mpeeke cishi ico cilaakwisulabo bufuule.#Duto 23:17
30“Kamulama bushiku bwakookesha bwa Cibelu alimwi akulemeka musena wangu usalalite. Nebo ndime Mwaami Lesa.#Bene Lefi 26:2
31“Tamweelete kuya mukucebusha kubantu baamba amishimu ya bafu. Na mwacita boobo, teshi mukanoosalalite kweelana aMilawo. Nebo ndime Mwaami Lesa, Lesa wanu.#Duto 18:11; 1 Samwe 28:3; 2 Baami 23:4; Isa 8:19
32“Kamubonesha bulemu kubamanene alimwi akubalemeka. Kamumpa bulemu akunyumfwila. Nebo ndime Mwaami Lesa.
33“Tamweelete kupensha baswamashi bashiite mucishi canu. 34Kuli mbabo mucite bweenka mbweenga mwaciita kumwine Isilaelinyinaanu, akubasuna bweenka mbomulisuni nobeene. Kamwiibaluka ayi amwebo mwakalinga baswamashi mucishi ca Ijipiti. Nebo ndime Mwaami Lesa, Lesa wanu.#Kulo 22:21; Duto 24:17-18; 27:19
35“Tamweelete kubeca muntu nabi womwi kwiinda mukusebensesha shipimo shakubeca mushintu shili shoonse. 36Kamusebensesha shipimo sheelete. Nebo ndime Mwaami Lesa, Lesa wanu uyo wakamukusha mucishi ca Ijipiti.#Duto 25:13-16; Tushimpi 20:10; Ese 45:10 37Amukonkele milawo yangu yoonse alimwi amilasho yangu yoonse. Nebo ndime Mwaami Lesa.”
Currently Selected:
Bene Lefi 19: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
Bene Lefi 19
19
Milawo ipusenepusene
1Mpomunyaawo Mwaami Lesa wakaambila Mose ayi, 2“Lwiita bene Isilaeli boonse ayi babe bantu basalalite, ceebo nebo neMwaami Lesa wanu ndisalalite.#Bene Lefi 11:44-45; 1 Pita 1:16
3“Womwi awomwi ulyeelete kulemeka banyina abaishi, alimwi mulyeelete kulama inshiku shakookesha kweelana ambondamulwiita. Nebo ndime Mwaami Lesa wanu.#Kulo 20:12; Duto 5:16; Kulo 20:8; Duto 5:16
4“Tamweelete kushiya ndime akutalika kulambila shibumbwabumbwa. Tamweelete kubumba balesa ba sheela akutalika kubalambila. Nebo ndime Mwaami Lesa wanu.#Bene Lefi 26:1; Kulo 20:23; 34:17
5“Ono na mwacaya munyama ayi ngumulambu wa bwanabwankashi, mulyeelete kukonkela milawo njendamupa, lyalo ndaakutambula mulambu uyo. 6Nyama ilyeelete kulikwa pabushiku bweenka munyama ndyaacaikwa, nabi pabushiku bwakuboolaawo. Nyama yoonse yeenga yacaalaawo pabushiku bwatatu ilyeelete kutentwa 7mukwiinga teesalalite kweelana aMilawo. Ono na muntu umwi weelya, teshi nkatambule mulambu uyo. 8Uyo woonse weenga walya nyama iyo ulaakuba amulandu ceebo walengesha cintu cabengwa kuli ndime kuba cintubo. Aboobo teshi akanoociyeeyelwa kuba mulikoto lya bantu bangu.
9“Pakunootebula mumyuunda yanu, mutakanooshisha moyeela alimwi mutakanooboolela sheesho shakacaalamo pakumanisha kutebula. 10Mutanooboolela mumyuunda ya minyansa mukuyapa yeeyo yakalinga kucaalaamo nabi kubwesa yakaloka panshi. Mulyeelete kushiila bakandu abaswamashi. Nebo ndime Mwaami Lesa wanu.#Bene Lefi 27:15; Duto 24:19-22
11“Mutanokwiipa, kubeca nabi kuba shikucenjeeka.#Kulo 20:15; Duto 5:19; Kulo 20:16; Duto 5:20 12Mutanoolumbila muliina lyangu na ulishi ayi teshi ukacite cintu ico, ceebo na wacita boobo, nkucobola liina lyangu. Nebo ndime Mwaami Lesa wanu.#Kulo 20:7; Duto 5:11; Mate 5:33
13“Mutapenshi muntu nabi womwi, nabi kumwiipila. Tamweelete kucelwa kufolesha musebenshi wanu nabi bushiku bomwibo.#Duto 24:14-15 14Tamweelete kushingana muntu ushinkite matwi nabi kubika cintu kunembo lya moofu ayi alyuumeemo, sombi amulemeke ndime neMwaami Lesa wanu.#Duto 27:18
15“Mulyeelete kushomeka akululika pakoombolosha. Mutabi akasalulushi kubantu bakandu nabi kuloonda babile.#Kulo 23:6-8; Duto 16:19 16Tamweelete kuya cibekesha muntu nabi womwi, alimwi mutapi bukamboni bweenga bwalengesha buumi bwa shikamukobonyinaanu kunyonyoolwa. Nebo ndime Mwaami Lesa.
17“Tamweelete kubikila mfundilishi muntu nabi womwi, sombi mubandike pacilubo cili pakati kanu kwaamba ayi mutakabishi ceebo ca nguwe.#Mate 18:15 18Kuteelesha kubisha muntu nabi womwi ayi ceebo alakwe wakamubishisha nabi kutolelela kumupata, sombi amusune mubyaanu bweenka mbomulisuni nobeene. Nebo ndime Mwaami Lesa.#Mate 5:43; 19:19; 22:39; Maako 12:31; Luka 10:27; Loma 13:9; Gala 5:14; Jemu 2:8
19“Kamukonkela milawo yangu. Tamweelete kusuminisha mishobo ya banyama mbomufubite ayi banooshalana amishobo imwi ipusene. Tamweelete kushanga mbuto shobilo shipusene mumuunda womwi, alimwi tamweelete kufwala shakufwala shakapangwa kumishobo yobilo ya shisani.#Duto 22:9-11
20“Ono na musankwa wakumana amwanakashi musha uyo wakamamikilwa kumusankwa umwi, sombi kaatana kulipililwa maali nabi kwaangululwa, boonse bobilo balaakupekwa mulandu. Sombi teshi bakacaikwe mukwiinga mwanakashi uyo taana kwaangululwa. 21Musankwa uyo ulaakuleta mbelele isankwa kumulyango wa Tente ya Cipangano ayi ngumulambu wakumana milandu. 22Mpeeke mupailishi ulaakucita kweelana aMilawo pakusalasha, aboobo Lesa ulaakumulekelela.
23“Na mukenjile mucishi ca Kenani akushanga cisamu cili coonse ca shisepo, mulyeelete kulanga shisepo isho ayi tashisalalite kwa myaaka yotatwe itaanshi. Muciindi ico tamweelete kushilya. 24Mumwaaka wane, shisepo shoonse shilaakupekwa ayi ncipo cakulumbaisha ndime neMwaami Lesa. 25Sombi mumwaaka wasanu inga mwalya shisepo isho. Na mukacite shoonse ishi, shisamu shanu shilaakucata shisepo shiinji. Nebo ndime Mwaami Lesa, Lesa wanu.
26“Tamweelete kulya nyama ili yoonse icicite bulowa mukati.
“Tamweelete kuba beshikusonda nabi baloshi.#Mata 9:4; Bene Lefi 7:26-27; 17:10-14; Duto 12:16, 23; 15:23; Duto 18:10
27“Kutacesa misusu ili mumbasu sha mutwi wanu nabi kuceeshako ndesu, 28alimwi tamweelete kulyaanda akulinengoola pamibili ayi mulambile bafu. Nebo ndime Mwaami Lesa.#Bene Lefi 21:5; Duto 14:1
29“Kutasebaanya bana banu banakashi kwiinda mukubaalula bafuule ba muŋanda ya balesa bamwi. Na mwacita boobo, mulaakusandukila kubalesa abo, mpeeke cishi ico cilaakwisulabo bufuule.#Duto 23:17
30“Kamulama bushiku bwakookesha bwa Cibelu alimwi akulemeka musena wangu usalalite. Nebo ndime Mwaami Lesa.#Bene Lefi 26:2
31“Tamweelete kuya mukucebusha kubantu baamba amishimu ya bafu. Na mwacita boobo, teshi mukanoosalalite kweelana aMilawo. Nebo ndime Mwaami Lesa, Lesa wanu.#Duto 18:11; 1 Samwe 28:3; 2 Baami 23:4; Isa 8:19
32“Kamubonesha bulemu kubamanene alimwi akubalemeka. Kamumpa bulemu akunyumfwila. Nebo ndime Mwaami Lesa.
33“Tamweelete kupensha baswamashi bashiite mucishi canu. 34Kuli mbabo mucite bweenka mbweenga mwaciita kumwine Isilaelinyinaanu, akubasuna bweenka mbomulisuni nobeene. Kamwiibaluka ayi amwebo mwakalinga baswamashi mucishi ca Ijipiti. Nebo ndime Mwaami Lesa, Lesa wanu.#Kulo 22:21; Duto 24:17-18; 27:19
35“Tamweelete kubeca muntu nabi womwi kwiinda mukusebensesha shipimo shakubeca mushintu shili shoonse. 36Kamusebensesha shipimo sheelete. Nebo ndime Mwaami Lesa, Lesa wanu uyo wakamukusha mucishi ca Ijipiti.#Duto 25:13-16; Tushimpi 20:10; Ese 45:10 37Amukonkele milawo yangu yoonse alimwi amilasho yangu yoonse. Nebo ndime Mwaami Lesa.”
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.