Joni 7
7
Jesu abanandumi shakwe
1Kuswawaawo Jesu wakalinga kweendabo mucishi ca Galili. Taakalinga kusuni kuya mucishi ca Judeya mukwiinga bamaloba ba baJuda bakalinga kuyanda kumucaya. 2Ono ciindi cakusekelela kwa baJuda ca Shimpaka cakalinga pafwaafwi.#Bene Lefi 23:34; Duto 16:13 3Aboobo banandumi shakwe bakamwaambila ayi, “Swaako kuno uye kuJudeya kwaamba ayi bashikwiiya bako bakabone shaankamiko nshoocita. 4Taaku muntu ushisa ncaatoocita na kaasuni kupuka. Ono kweelana ambootoocita anu leka bantu boonse bakwishibe!” 5(Banandumi shakwe bakaamba boobo ceebo abalo tebakalinga kumushoma.)
6Jesu wakabaambila ayi, “Ciindi cangu ceelete tacina kushikila, sombi mwebo ciindi cili coonse cili kabotu. 7Mwebo bantu ba mucishi ca panshi tabamupatiteewo, sombi nebo balimpatite mukwiinga lyoonse ndabaambila ayi micito yabo njibiibi. 8Anu mwebo kamuya mukusekelela uko, nebo teshi njeeko mukwiinga ciindi cangu ceelete tacina kushikila.” 9Ndyaakamana kwaamba boobo, wakacaala muGalili.
Jesu mbwaakaya kulibungano lya kusekelela kwa Shimpaka
10Banandumi shakwe ndibakaya mukusekelela, Jesu alakwe wakaya, kaaya ciyubayuba. 11Ndibakalinga kusekelela uko, bamaloba ba baJuda bakalinga kuyandoola Jesu kabaamba ayi, “Anu uli kuli?”
12Mpeeke palya pakalinga shakuŋuŋuna shiinji pali nguwe. Bamwi bantu bakalinga kwaamba ayi, “Ngumuntu kabotu.” Ingayi bamwi ayi, “Sobwe, utoolubya bantu.” 13Sombi taaku wakaamba pali Jesu pameenso a bantu ceebo ca kuloonda bamaloba ba baJuda.
14Kusekelela ndikwakashika pakati napakati, Jesu wakaya kuŊanda yakwe Lesa akutalika kwiisha. 15Bamaloba ba baJuda bakakankamana abuumbi akwaamba ayi, “Ino muntu uyu ulishi buyani shintu shoonse ishi nabi taana kuyaawo amukushiiya.”
16Jesu wakakumbula ayi, “Kwiisha uku teshi kwangu, sobwe, sombi kulaswa kuli baTa abo bakantuma. 17Aboobo uyo woonse usuni kucita buyanda Lesa, ulaakwishiba na kwiisha kwangu uku kulaswa kuli Lesa nabi kuli ndime nemwiine. 18Muntu waambabo shaakwe ulisuni kulemekwa mwiine. Sombi uyo usuni kwaamba ayi uyo wakamutuma alemekwe, ngooshomeka alimwi taamu bubeshi muli nguwe. 19Te Mose wakamupa Milawo? Ono taaku muntu nabi womwi pakati kanu ukonkela Milawo iyo. Ceebonshi mutooyanda kuncaya?”
20Bantu baanji bakakumbula ayi, “Ulicite shikaswa webo! Ngani utooyanda kukucaya?”
21Jesu wakakumbula ayi, “Ndakacita caankamiko comwi, noonse mwakakankamana. 22Mose wakamupa mulawo ayi munoopalula bana banu basankwa (nabi tookwe kuswa kuli Mose, sombi wakaswa kubakulukulu) aboobo mulapalula mwaana musankwa pabushiku bwakookesha bwa Cibelu.#Bene Lefi 23:36 23Ino ono na mwaana musankwa ulapalulwa pabushiku bwakookesha kwaamba ayi mulawo wakwe Mose utatyolwi, inga mwankalalila buyani mukwiinga ndashilika mubili wa muntu woonse pabushiku bwa Cibelu? 24Amucileeke koombolosha kwiinda mukulanga muntu mbwaabete, mutalike koombolosha kweelana amulandu mboobete.”
Sa Jesu ngoUsalitwe wakwe Lesa?
25Mpomunyaawo bantu bamwi ba kuJelusalemu bakeepusha ayi, “Sa uyu teshi ngowooyu beendeleshi ngobatooyanda kucaya? 26Amubone ngooyu utokwaamba patuba alimwi taaku ancebatokwaambaawo. Sa nkokwaamba ayi aba bantu balishi ayi ngoUsalitwe wakwe Lesa? 27Sombi swebo tulishiiko uyu muntu nkwaaswa. Ono Usalitwe wakwe Lesa ndyeshi akese, taaku ngweshi akashibe nkweshi akaswe.”
28Mpomunyaawo Jesu kaaciisha muŊanda yakwe Lesa wakoolobesha ayi, “Ee, mulinshi! Ankondakaswa koonse mulishiiko. Sombi nshikwe kwisabo palwaangu, sobwe. Uyo wakantuma ulashomeka, ono mwebo tamumwishi. 29Nebo ndimwishi mukwiinga ndakaswa kuli nguwe alimwi ngowakantuma.”
30Ingayi banyumfwe boobo bakeelesha kumucata, sombi taaku wakacikonsha mukwiinga ciindi cakwe kacitana kushikila. 31Nakubi boobo bantu baanji mulikoto lilya bakashoma muli Jesu, bakaamba ayi, “Na akese Usalitwe wakwe Lesa, sa ulaakucita shaankamiko kwiinda sheeshi nshaacita muntu uyu?”
Mbobakatuma bantu mukucata Jesu
32Mpomunyaawo baFalisi bakanyumfwa bantu kabaŋuŋuna makani aya pali Jesu. Lyalo baFalisi abamatanjilili ba bapailishi bakatuma beshikulindilila kuŊanda yakwe Lesa ayi bakacate Jesu. 33Jesu wakaamba ayi, “Ndanooli amwebo kwa ciindi ciniinibo kaantana kuya kuli wooyo wakantuma. 34Ono mulaakunangoola, sombi teshi mukancane alimwi uko nkweshi nkanoobete teshi mukashikeeko.”
35Mpeeke baJuda bakatalika kulyaamboosha beene ayi, “Ino nkuli nkwaatooyanda kuya uyu muntu uko nkweshi tukabule kumucana? Sa utooyanda kuya kubamakwabesu abo bakapalanganina kubaGiliki akwiisha baGiliki? 36Ino nciinshi ncaalinga kwaamba ndyaamba ayi, ‘Mulaakunangoola, sombi teshi mukancane,’ aceeco ncaamba ayi, ‘Uko nkweshi nkabe mwebo inga tamukoonshi kushikaako?’ ”
Tulonga twa maanshi apa buumi
37Pabushiku bwakweelaako, bushiku bunene kwiinda nshiku shoonse shamukusekelela uko, Jesu wakanyamuka woolobesha ayi, “Na kuli muntu unyumfwite nyotwa ese kuli ndime anwe. 38Kweelana ambokulembetwe muMalembo akwe Lesa ayi, ‘Uyo woonse ushoma muli ndime tulonga twa maanshi apa buumi butamaani tulaakukunka kuswa mumoyo wakwe.’ ”#Ese 47:1; Seka 14:8 39Ndyaakaamba boobo, wakalinga kwaamba Mushimu Usalashi uyo ngweshi bakatambule abo boonse bashoma muli nguwe. Paciindi ico kabatana kutambula Mushimu Usalashi mukwiinga Jesu kaatana kwinjila mubulemu bwakwe.
Bantu mbobakapansaana
40Bamwi bantu ndibakanyumfwa maswi akwe aya, bakaamba ayi, “Uyu muntu ncakwiila ngomulaluki ulya!” 41Bamwi bakaamba ayi, “Uyu muntu ngoUsalitwe wakwe Lesa,” sombi bamwi bakalinga kwiipusha ayi, “Sa Usalitwe wakwe Lesa ulaakuswa kuGalili? 42Sa Malembo akwe Lesa taambi ayi, ‘Usalitwe wakwe Lesa ulaakuswa mulunyungu lwakwe Defedi alimwi ulaakushalilwa mundabala ya Betileemu umo mwakalinga kwikala mwaami Defedi?’ ”#2 Samwe 7:12; Mika 5:2 43Paceebo ceeco bantu bakapansaana ceebo cakwe Jesu. 44Bamwi bakalinga kusuni kumucata, sombi bakaalilwa.
Shakutashoma kwa bamaloba ba baJuda
45Ono beshikulindilila kuŊanda yakwe Lesa ndibakaboola kubamatanjilili ba bapailishi abaFalisi abo bakabeepusha ayi, “Tamukwe kumuletelanshi?” 46Balo bakakumbula ayi, “Tatuna kubonaawo kale muntu waamba mbuli woolya, sobwe.”
47Sombi baFalisi bakaamba ayi, “Ono ubo wamubeca kale amwebo. 48Sa mulishiwo mweendeleshi pakati kesu nabi muFalisi wakashoma muli nguwe? Taakuuwo! 49Sombi bantu abo bateshi Milawo yakwe Mose, Lesa wabashinganya kale.”
50Mpomunyaawo Nikodemasi, wakalinga waya kuli Jesu lutaanshi, womwi wa mulikoto lyabo wakabeepusha ayi,#Joni 3:1-2 51“Sa Milawo yesu ilasuminisha kupa mulandu muntu kaatana koomboloshekwa akwishiba ncaacita?”
52Balo bakamukumbula ayi, “Sa awebo uli wa kuGalili? Calula muMalembo akwe Lesa, utoocana kwaamba ayi taaku mulaluki uswa kuGalili.” [ 53Mpeeke boonse bakoonduluka kuya kumaandaabo.
Currently Selected:
Joni 7: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.