Joni 6
6
Jesu mbwaakapa shakulya basankwa bali shuulu shosanwe
(Mate 14:13-21; Maako 6:30-44; Luka 9:10-17)
1Kuswawaawo Jesu wakasubukila kwitala lya Lweenge lwa Galili (Ulo ndoLweenge lwa Tibelyasi.) 2Bantu baanji baanji bakamukonkela mukwiinga bakalinga babonaawo kale shaankamiko ndyaakashilika balwashi. 3Lyalo Jesu wakatanta pakalundu akwikala panshi abashikwiiya bakwe. 4Paciindi ico bushiku bwa Pasika bwakwiibaluka kusotokela bwakalinga pafwaafwi. 5Lyalo Jesu ndyaakalangalanga wakabona bantu baanji kabesa kuli nguwe, wakeepusha Filipo ayi, “Ino nkuli nkweenga twoola shinkwa ayi bantu aba balye?” 6(Jesu wakeepusha cakumweelesha, sombi mumoyo wakwe mwiine keeshi kale bwakucita.)
7Filipo wakamukumbula ayi, “Nabi twoola shinkwa wa myaanda yobilo ya maali asilifa inga taukwani kwaamba ayi muntu uli woonse alye nakaceyi.”
8Aumwi womwi wa bashikwiiya bakwe wiitwa ayi Andulu, mukwabo Simoni Pita wakaamba ayi, 9“Kuli mwanike musankwa kuno ucite shinkwa osanwe atuswi tobilo. Ino inga shacitanshi kubantu baanji bobulya?”
10Jesu wakaamba ayi, “Amwaambile bantu bekale panshi.” Pamusena apo pakalinga bwiisu buunji. Lyalo bantu boonse bakekala. Basankwa bakalinga mpashi shuulu shosanwe. 11Jesu wakabwesa shinkwa uyo akulumba Lesa. Mpeeke wakaabila bantu abo bakalinga kushiite. Tuswi atwalo wakacita bweenka ubo, boonse bakalya bakuta. 12Lyalo boonse ndibakakuta, Jesu wakaambila bashikwiiya bakwe ayi, “Amubwese shoonse nshebashiyaako kwaamba ayi kutanyonyooki nakaceyi.” 13Aboobo bakashibwesa akwisusha tutundu likumi atobilo twa bunsebunse bwa shinkwa ngobakashiyaako bantu kuswa kushinkwa osanwe uyo.
14Bantu ndibakabona caankamiko cakacita Jesu, bakaamba ayi, “Ncakwiila uyu ngomulaluki wakalinga kulangilwa mucishi ca panshi!” 15Jesu wakeshiba ayi bantu batooyanda kumubika pabwaami cakumukakatisha. Aboobo wakanyamuka akuya alimwi kutulundu eenkabo.
Jesu mbwaakeenda pamaanshi
(Mate 14:22-33; Maako 6:45-52)
16Macolesha, bashikwiiya bakwe Jesu bakaya kulweenge. 17Bakenjila mubwaato kwaamba ayi basubukile kwitala lya lweenge kuya kuKapenaumu. Mpeeke kwakashiya Jesu kaatana kuya kuli mbabo. 18Paciindi ico kwakalinga cipuupu cinene, aboobo kwakaba maaba pamaanshi. 19Bashikwiiya abo ndibakeenda makilomita mpashi osanwe akwiindilila, bakabona Jesu kaaenda pamaanshi keesa kubwaato. Mpeeke bakaloonda. 20Sombi wakabaambila ayi, “Ndime, mutaloondi.” 21Lyalo bakasumina ayi enjile mubwaato. Paciindi ceenka ico bwaato bwakashika kwitala lya lweenge nkubakalinga kuya.
Bantu mbobakayandoola Jesu
22Ono bushiku bwakaboolaawo, bantu baanji bakacaala kwitala lya lweenge, bakeshiba ayi pamusena uyo pakalingabo bwaato bomwi. Bakeshiba alimwi ayi Jesu taakwe kuya abashikwiiya bakwe mubwaato ubo, sombi ayi bashikwiiya bakaya beenkabo. 23Lyalo maato amwi akaswa kuTibelyasi akashika pafwaafwi ampobakalita shinkwa bantu, Mwaami Jesu ndyaakamana kulumba Lesa. 24Mpeeke bantu baanji abo ndibakabona ayi Jesu nabi bashikwiiya tabapo pamusena apo, balo bakenjila mumaato ayo akuya kuKapenaumu kunooya ciyandoola Jesu.
Jesu ncecakulya ca buumi
25Lyalo bantu ndibakamucana kwitala limwi lya lweenge bakamwiipusha ayi, “Bafundishi, mwakesa lili kuno?”
26Jesu wakakumbula ayi, “Ntoomulwiita calushinisho ayi tamutoonangoola ceebo mwakabona shaankamiko shindakacita, sombi mukwiinga mwakalya shinkwa akukuta. 27Mutanoosebensela cakulya cimana, sombi amusebensele cakulya cikalilila kushikila kubuumi butamaani. Ico ncecakulya MwanaaMuntu nceshi akamupe mukwiinga baTa baLesa mpobakabika cishibilo cakusuminisha kwabo.”
28Lyalo bakamwiipusha ayi, “Ino tulyeelete kucita buyani kwaamba ayi tucite nshiyanda Lesa?” 29Jesu wakabakumbula ayi, “Incito yakwe Lesa nkushomabo muli wooyo ngwaakatuma.” 30Mpeeke bakamwiipusha ayi, “Ino ncaankamikonshi nceshi mucite kwaamba ayi tubone akumushoma? Mutoocita mulimonshi? 31Bakulukulu bakalya mana muluyanga. Bweenka mbuli mbocilembetwe ayi, ‘Wakabapa shakulya kuswa kwiculu ayi balye.’ ”#Kulo 16:4, 15; Kulu 78:24
32Jesu wakaamba ayi, “Ntoomulwiita calushinisho ayi teshi Mose wakamupa cakulya ciswa kwiculu, sombi baTa mbobapa cakulya cancinencine ciswa kwiculu. 33Mukwiinga cakulya Lesa ncaapa ngooyo uswa kwiculu, lakwe ngoopa buumi kubantu boonse bamucishi ca panshi.”
34Mpomunyaawo bakasenga ayi, “Nkambo, kamutupa cakulya ico lyoonse.” 35Jesu wakabaambila ayi, “Ndi cakulya cipa buumi. Uyo woonse wisa kuli ndime teshi akafwewo nsala. Ncakwiila uyo woonse ushoma muli ndime teshi akanyumfwewo nyotwa. 36Ono mbuli mbondakamwaambila kale, nakubi kwaamba ayi mwamboona, tamushomi. 37Abo boonse mbobampa baTa, balesa kuli ndime alimwi uyo woonse wisa kuli ndime, teshi nkamutandeewo. 38Mukwiinga ndakaswa kwiculu kwisa mukucita sheesho shiyanda wooyo wakantuma, kuteshi shiyanda ndime nemwiine, sobwe. 39Nkuyanda kwakwe uyo wakantuma kwaamba ayi ntasoowi nabi womwi pabaabo mbwaakampa, sombi kwaamba ayi boonse nkababuushe kuswa kubafu pabushiku bwakweelaako. 40Mukwiinga baTa ncebasuni nkwaamba ayi uyo woonse wabona Mwaana akumushoma, abe abuumi butamaani alimwi ndaakumubusha kuswa kubafu pabushiku bwakweelaako.”
41Ndibakanyumfwa boobo baJuda, bakatalika kumutongooka mukwiinga wakalyaamba ayi, “Ndi cakulya cakaswa kwiculu.” 42Paceebo ceeco bakaamba ayi, “Sa te nguJesu mwanaakwe Josefu? Baishi abanyina tulibeshi, ino ono inga waamba buyani ayi, ‘Wakaswa kwiculu?’ ”
43Jesu wakakumbula ayi, “Mutatongooki, 44taaku muntu ukonsha kwisa kuli ndime, sombi baTa abo bakantuma bamusenya kuli ndime. Anebo ndaakumubusha kuswa kubafu pabushiku bwakweelaako. 45Cililembetwe muMalembo akwe Lesa akalemba balaluki bakulukulu ayi, ‘Bantu boonse balaakwiishikwa aLesa.’ Uyo woonse ukutika baTa akwiiya kuli mbabo, ulesa kuli ndime.#Isa 54:13 46Taaku muntu wakabonaawo kale baTa, sombibo eenka uyo wakaswa kuli Lesa ngowakababona. 47Ntoomulwiita calushinisho ayi uyo woonse ushoma muli ndime ulicite buumi butamaani. 48Ndi cakulya cipa buumi. 49Bamashali banu bakulukulu bakalya mana muluyanga, sombi bakafwa. 50Sombi cakulya ciswa kwiculu, ncino nceenga muntu walya wabula kufwitilila. 51Ndi cakulya cipa buumi cakaswa kwiculu. Na muntu uli woonse walya cakulya ici, ulaakuba abuumi butamaani. Cakulya ico nceshi nkamupe ngumubili wangu, uyo ngweshi nkape ayi bantu boonse ba mucishi ca panshi babe abuumi.”
52Mpomunyaawo baJuda bakatalika kupikishanya beene abeene kabaamba ayi, “Ino uyu muntu inga watupa buyani mubili wakwe ayi tulye?”
53Jesu wakabaambila ayi, “Ntoomulwiita calushinisho ayi, na mwabula kulya mubili wa MwanaaMuntu akunwa bulowa bwakwe, inga tamubi abuumi muli ndimwe. 54Uyo woonse ulya mubili wangu akunwa bulowa bwangu, ulicite buumi butamaani alimwi ndaakumubusha kuswa kubafu pabushiku bwakweelaako. 55Mukwiinga mubili wangu ncecakulya cancinencine abulowa bwangu ncecakunwa cancinencine. 56Uyo woonse ulya mubili wangu akunwa bulowa bwangu ulekala muli ndime, anebo ndekala muli nguwe. 57Bweenka mbuli baTa bakantuma mbobali boomi, anebo ndimuumi ceebo ca baTa. Mbweeke ubo alakwe uyo ulya ndime, ulaakuba abuumi ceebo ca ndime. 58Ici anu ncecakulya cakaswa kwiculu. Tacibete mbuli mana bamashali banu bakulukulu ngobakalya, nakubi boobo bakafwa. Sombi ulya cakulya ici ciswa kwiculu ulaakunooli abuumi lyoonse.”
59Jesu wakaamba makani aya ndyaakalinga kwiisha mucoonde ca baJuda kuKapenaumu.
Maswi apa buumi butamaani
60Bashikwiiya bakwe baanji ndibakanyumfwa kwiisha uku bakaamba ayi, “Kwiisha uku nkuyumu, ngani weenga wakunyumfwishisha?”
61Jesu wakalinga kwishi ayi bashikwiiya bakwe bakalinga kutongooka pamakani aya. Mpeeke wakabaambila ayi, “Sa mutooyanda kutyongola ceebo ca makani aya? 62Ino inga caba buyani na mwabonabo MwanaaMuntu waboolela kwiculu nkwaakalinga kataanshi? 63Cipa buumi nguMushimu Usalashi. Nkusu sha muntu mwiine taaku mboshibete napaceyi. Maswi ngondamulwiita alaleta Mushimu Usalashi upa buumi. 64Nakubi boobo nobamwi tamushomi.” Mukwiinga Jesu wakalinga kwishi kuswabo kumatalikilo, abo beshi bakabule kumushome alimwi awooyo weshi akamwaabe. 65Lyalo wakeelikaawo ayi, “Ici nceceeco ncendakamulwiitila ayi taaku muntu weenga wesa kuli ndime na baTa babula kumupa nkusu.”
66Abo bakalinga kumukonkela baanji bakashiya Jesu akucileka kumukonkela ceebo ca makani ngomunya aya. 67Lyalo wakeepusha bashikwiiya abo bali likumi abobilo ayi, “Sa amwebo mutooyanda kunshiya?”
68Simoni Pita wakamukumbula ayi, “Nkambo, inga twaya kuli ni? Mwebo ndimwe mucite maswi abuumi butamaani. 69Swebo tulashoma alimwi tulishi ayi ndimwe wooyo Usalalite uswa kuli Lesa.”#Mate 16:16; Maako 8:29; Luka 9:20
70Jesu wakaamba ayi, “Sa teshi ndime ndakamusala mwebo nomuli likumi abobilo? Ee, Sombi womwi pakati kanu ngumulwani.” 71Jesu wakalinga kwaamba Judasi mwanaakwe Simoni Isikalyoti mukwiinga Judasi, nabi wakalinga womwi wa bashikwiiya bali likumi abobilo, ngowakesa mukumwaaba.
Currently Selected:
Joni 6: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.