Matalikilo 50
50
1Josefu wakaliwaala pamubili pali baishi kaalila akufyonta ciwa cabo. 2Mpeeke Josefu wakaambila beshikushilika bakwe ayi babambe mubili kukasha kubola. Abalo beshikushilika bakacita bweenka ubo. 3Nshila njibakacitilamo boobo yakatola nshiku makumi one. Ici nceciindi cakalinga kweelete kubamba mubili kukasha kubola. Bene Ijipiti bakamulila nshiku makumi osanwe aobilo.
4Ciindi ca kulila ndicakeenda Josefu wakaambila bacinenenene ba mwaami ayi, “Amunyumfwileeko nkumbu. Amuye mundwiitileeko mwaami Falawo ayi, 5‘Bata ndibakalinga pafwaafwi kufwa, bakanengesha kubashomesha cakulumbila ayi ndaakubabika mucuumbwe ncebakabamba mucishi ca Kenani. Ono ndaseenga ayi bansuminishe nje nkabike bata, ndaakwisa alimwi.’ ”#Mata 47:29-31 6Lyalo mwaami wakakumbula ayi, “Koya ukabike baiso kweelana ambowakashomesha ayi ulaakucita.”
7Aboobo Josefu wakaya mukubika baishi. Bacinenenene ba mwaami boonse, bamatanjilili ba muŋanda yakwe alimwi ankumenkume shoonse sha muIjipiti, bakayaakwe. 8Bamuŋanda yakwe, bamakwabo abaabo boonse bakacaala mumushi wa baishi, boonse bakaya aJosefu. Bakacaalabo muGosheni mbanike baniininiini, mpongo, mbelele alimwi aŋombe shabo. 9Basankwa bamwi bakalinga mushikoci sha maaki alimwi abamwi pamaaki, abalo bakayaakwe. Lyakalinga likoto linene.
10Ndyebakashika palubansa lwakulupwitaawo paAtadi kwicwe lya Joodani, bakalilisha kwa ciindi cilaamfu, alimwi Josefu wakaba acililo kwanshiku shosanwe ashobilo uko. 11Bene Kenani ndibakabona bantu abo kabalila paAtadi, bakaamba ayi, “Ma wakomena mubala wakulila uyo bene Ijipiti ngobacite!” Nceceeco musena uyo ncewakatumbilwa ayi Abelo Misileemu.
12Aboobo bana bakwe Jakobo bakacita bweenka mbwaakabaambila. 13Bakanyamuna mubili wakwe, bautola kuKenani akuubika mucimfwengo ca Makipela, kwicwe lya Mamule, mumuunda Abulaamu ngwaakoola kuli Efuloni mwine Iti, kwaamba ayi abe maanda.#Mili 7:16 14Josefu ndyaakamana kubika baishi wakaboolela kuIjipiti abamakwabo alimwi abaabo boonse mbwaakayaabo mukubika baishi.
Josefu mbwaakakalika myoyo bamakwabo
15Ono ingayi baishiwabo bafwe, bamakwabo Josefu bakaamba ayi, “Ino na kakuli kwaamba ayi Josefu ucitucitile mfundilishi, alimwi na utoyeeya kutubooshesha cishole pabubi boonse mbotwakacita pali nguwe, inga twacita buyani?” 16Mpeeke bakatuma nkombe kuli Josefu yakwaamba ayi, “Bata kabatana kufwa, 17bakashiya maswi akwaamba ayi, ‘Ndaseenga ayi ulekelele bamakwanu shibiibi acilubo ncebakacita pali ndiwe.’ Ono twaseenga mutulekelele cilubo ncetwakacita swebo sobasebenshi bakwe Lesa wa baishiwanu.” Josefu wakalila ndyaakatambula nkombe iyi.
18Lyalo bamakwabo bakesa palwaabo bene akukotamina Josefu akwaamba ayi, “Twalileta, tuli basha banu.” 19Sombi Josefu wakabaambila ayi, “Mutaloondi, nebo nshikoonshi kulibika mumusena wakwe Lesa. 20Cibiibi ncemwakanjeyela kuncita Lesa wakacaalula caba bubotu, kwaamba ayi bantu baanji bapuluke alimwi bacili boomi bulya kwiinda muceeco cakacitika. 21Taaku ncemweelete kuloonda. Ndanoomulama pantu pomwi abana banu.” Mpeeke wakabakalika myoyo amaswi ankumbu ayo akabeensha misusu.
Kufwa kwakwe Josefu
22Josefu wakatolelela kwikala muIjipiti abamuŋanda ya baishi. Wakafwa kaacite myaaka ili 110. 23Wakekala cakubona abana bakwe Efuleemu abamashikulu bakwe. Alimwi wakalinga kulindila kutambula bana bakwe Makiya, mwanaakwe Manase musankwa mumukowa wakwe. 24Mpeeke wakaambila bamakwabo ayi, “Ndipafwaafwi kufwa, sombi Lesa ulaakumucafwa akumutanjilila kuswa momuno kuya kucishi ico ncaakalasha baAbulaamu, baIsaki alimwi abaJakobo cakulumbila.” 25Lyalo Josefu wakasenga bamakwabo, bana bakwe Isilaeli, ayi balumbile. Wakaamba ayi, “Amunshomeshe kwaamba ayi Lesa akumutanjilila kumutola kucishi ico, mulaakutolelela amafuwa angu.”#Mata 47:29-31 26Aboobo Josefu wakafwa kaacite myaaka ili 110. Bakabamba mubili wakwe kukasha kubola akuubika mulibokoshi mucishi ca Ijipiti.
Currently Selected:
Matalikilo 50: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.