Matalikilo 48
48
Jakobo mbwaakapa coolwe Efuleemu aManase
1Kunembo Josefu wakalwiitwa ayi baishi mbalwashi. Mpeeke wakabwesa bana bakwe bobilo basankwa Manase aEfuleemu, akuya mukubona Jakobo. 2Jakobo ndyaakanyumfwa ayi Josefu mwanaakwe wesa mukumubona, wakaliyuminisha wekalaako pabulo. 3Jakobo wakaambila Josefu ayi, “Lesa Shinkusu shoonse wakaboneka kuli ndime kuLusi mucishi ca Kenani akumpa coolwe.#Mata 28:13-14 4Wakandwiita ayi, ‘Ndakukupa baana baanji kwaamba ayi bamulunyungu lwako bakabe mishobo iinji. Ndaakupa bamulunyungu lwako cishi ici cikabe caabo muyayaya.’ ”
5Jakobo wakatolelela akwaamba ayi, “Josefu, bana bako basankwa bobilo mbowakashala kuno kuIjipiti kaantana kwisa, mbaangu. Efuleemu aManase balibo anga mbana bangu basankwa Lubeni aSimyoni. 6Na ulicite abamwi baana basankwa teshi bakayeeyelwe kuba bana bangu. Buboni mbweshi bakapyane bulaakwiinda muli Efuleemu aManase. 7Ici ntoocicita ceebo ca banyoko baLakelo. Ndakaba abuumba bunene abuumbi ndibakafwa muKenani, pafwaafwi aEfulati, ndindakalinga kuswa kuMesopotamya. Ndakababika kweenka kulya munshaanshila iya kuEfulati.” Efulati bulya iletwa ayi Betileemu.#Mata 35:16-19
8Jakobo ndyaakabona bana bakwe Josefu basankwa wakeepusha ayi, “Anu banyamata aba mbaani?” 9Josefu wakakumbula ayi, “Mbana bangu abo Lesa mbwaakampa muno muIjipiti.” Lyalo Jakobo wakaamba ayi, “Balete kuno ayi mbape coolwe.” 10Meenso akwe Jakobo akalinga kwaalilwa kubona ceebo ca kucembela alimwi taakalinga kukonsha kubona kabotu. Josefu wakabaleta kuli nguwe, mpeeke Jakobo wakabakumbata akubafyonta. 11Jakobo wakaambila Josefu ayi, “Nshindakalinga kuyeeya ayi inga ndakubona alimwi. Ono Lesa walengesha kwaamba ayi mbone abana bako.” 12Lyalo Josefu wakabakusha pamubili pali Jakobo akufukama kunembo lyakwe cakushisha ciwa panshi.
13Josefu wakabika Efuleemu kucipiko kuli Jakobo, kululyo wakabikaako Manase. 14Nacibi boobo Jakobo wakacilinganya maansa, akubika lyalulyo pamutwi wakwe Efuleemu nakubi kwaamba ayi ngomwanikebantu alimwi akubika lya cipiko pamutwi wakwe Manase munenebantu. 15Mpeeke wakapa coolwe Josefu ayi,
“Lesa uyo bata baAbulaamu abaIsaki
ngobakalinga kusebensela
aape coolwe baana aba!
Lesa uyo wakantanjilila kushikila asunu
aabape coolwe!
16Munjelo uyo wakampulusha mushintu shicaya
aabape coolwe.
Liina lyangu alya bata ba Abulaamu abaIsaki,
aatolelele kwiinda mubanike aba!
Abakabe abaana baanji
alimwi abamulunyungu lwabo!”
17Josefu ndyaakabona baishi babika lyaansa lyalulyo pamutwi wakwe Efuleemu akulibika pa wakwe Manase, taakwe kukondwa. Aboobo wakabwesa lyaansa lyalulyo lya baishi walibika pamutwi wakwe Manase. 18Mpeeke wakaambila baishi ayi, “Sobwe ta, uyu ngowakwiiya. Amubike lyaansa lyanu lyalulyo pali nguwe.”
19Sombi baishi bakakaka akwaamba ayi, “Ndishi omwanaangu, ndishi. Alakwe ulaakuba mushobo alimwi alakwe ulaakuba muntu ulemekwa. Nakubi boobo, mwanike wakwe ulaakwiindaawo alimwi bamulunyungu lwakwe balaakuba likoto lya mishobo.”
20Wakabapa coolwe bushiku ubo akwaamba ayi,
“Mumeena anu,
bene Isilaeli mweshi bakanoosengela coolwe.
Balaakunokwaamba ayi,
‘Lesa aakulengeshe kuba anga nguEfuleemu aManase.’ ”
Aboobo Efuleemu wakamubika kunembo kuli Manase.#Ebulu 11:21
21Lyalo Jakobo wakaambila Josefu ayi, “Ndi pafwaafwi kufwa. Nacibi boobo Lesa unanooli awebo akukuboosha kucishi ca bamashali bako bakulukulu. 22Ono webo, mbooli muntu wiindaawo pabamakwanu mubulemu, ndakupa cishi ncendakanyaya bene Amoli mukusebensesha mupeeni abuta.”
Currently Selected:
Matalikilo 48: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
