Esila 3
3
Mbobakatalika kulambila alimwi
1Mweenshi wasanu ayobilo ndiwakashika, bene Isilaeli kabali mumandabala abo, bantu boonsebo bakabungana kuJelusalemu. 2Ono Jeshuwa mwanaakwe Josadaki abapailishinyina, Selubabelo mwanaakwe Sheyalutyelo pantu pomwi abamakwabo, bakatalika kuyaka cipaililo cakwe Lesa wa bene Isilaeli ayi babenge milambu yakutenta, kweelana amilasho ilembetwe muMilawo yakwe Mose muntu wakwe Lesa.#Kulo 27:1 3Nabi bakalinga kuloonda bantu mbobakalinga kushiite abo, bakayaka alimwi cipaililo pamusena peenka mpocakalinga pakataanshi, akubenga milambu yakutenta kuMwaami Lesa nkokwaamba ayi milambu ya macuunsa aya macolesha.#Shakube 28:1-8 4Mpeeke bakaba akusekelela kwa Shimpaka kweelana amilasho. Pabushiku abushiku bakabenga mweelo wa milambu yakutenta weelete.#Shakube 29:12-38 5Kuswawaawo bakatalika kubenga milambu yakutenta ya lyoonse, milambu ya mweenshi upya, aya pakusekelela kusalitwe koonse kwakulambila Mwaami Lesa, pantu pomwi amilambu yakulyaaba yoonse ipekwa kuli nguwe.#Shakube 28:11—29:39 6Pabushiku butaanshi mumweenshi wasanu ayobilo bakatalika kubenga milambu yakutenta kuMwaami Lesa, nakubi kwaamba ayi Ŋanda ya Mwaami Lesa keetana kutalika kuyakwa.
Mbobakatalika kuyaka alimwi ŋanda yakwe Lesa
7Bantu bakapa maali akufolesha beshikubesa mabwe abeshikubesa mapulanga. Bakapa ashakulya, shakunwa alimwi amafuta a Olifi kubantu ba kuSidoni alimwi aTaya kwaamba ayi balete shisamu sha Sida kucishi ca Lebanoni kwiinda mulweenge kuya kuJopa, ici cakasuminishikwa aSailasi mwaami wa bene Pesha. 8Mumweenshi wabili mumwaaka wabili kuswa mpobakashikila kuŊanda yakwe Lesa muJelusalemu, Selubabelo mwanaakwe Sheyalutyelo, Jeshuwa mwanaakwe Josadaki abene Isilaelinyinaabo bamwi boonse nkokwaamba ayi bapailishi, bene Lefi alimwi aboonse abo bakaswa mucishi ca busha kuya kuJelusalemu, boonse bakatalika mulimo. Bakabika bene Lefi bakalinga kucite myaaka makumi obilo akwindilila pabutanjilili bwa mulimo wakuyaka alimwi Ŋanda ya Mwaami Lesa. 9Jeshuwa, bana bakwe alimwi abamakwabo, Kadimyelo abana bakwe bamulunyungu lwakwe Odafiya, pantu pomwi abana bakwe Enadadi, bana babo basankwa alimwi abamakwababo bakapankana pantu pomwi mukutanjilila babo bakalinga kusebensa kuŊanda yakwe Lesa. Bantu boonse aba bakalinga bene Lefi.
10Ono ndibakatalika kuyaka lwiimbi lwa Ŋanda ya Mwaami Lesa, bapailishi mumingaanjo yabo bakeemikana amapeenga, bene Lefi, nkokwaamba ayi bana bakwe Asafu, bakeemikana atusenke tupampamene twakulisha akulumbaisha Mwaami Lesa mbuli bwakaamba Defedi mwaami wa bene Isilaeli mukulukulu.#1 Maka 25:1 11Lyalo bakeemba kabalumbaisha Mwaami Lesa ayi,
“Mwaami Lesa ngumubotu,
lusuno lwakwe pabene Isilaeli ndwamuyayaya.”#1 Maka 16:34; 2 Maka 5:13; 7:3; Kulu 100:5; 107:1; 118:1; 136:1; Jele 33:11
Bantu boonse bakalumbaisha Mwaami Lesa cakoolobesha, mukwiinga mulimo wakuyaka alimwi Ŋanda yakwe Lesa wakatalika. 12Sombi bapailishi baanji bacembele, bene Lefi alimwi abamanene ba shipani sha mikowa, abo bakabona Ŋanda yakwe Lesa itaanshi, bakalila cakooloma ndibakabona lwiimbi lwa Ŋanda lwatalika kuyakwa, sombi bamwi baanji bakoolobesha mukusangalala. 13Aboobo taaku muntu wakakonsha kwishiba ciyobeyobe cakusangalala nabi cakulila, mukwiinga ciyobeyobe ico cakalinga cinene abuumbi cakwaamba ayi bantu bakalinga kulaale bakalinga kunooshiitemobo.
Currently Selected:
Esila 3: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.