Kulonga 14
14
Mbobakasubuka Lweenge Lusalala
1Lyalo Mwaami Lesa wakaambila Mose ayi, 2“Lwiita bene Isilaeli ayi baboole kwisule akuyaka misumba pafwaafwi andabala ya Pi Ailoti, pakati lya ndabala ya Migidolu alimwi aLweenge Lusalala, pafwaafwi aBaali Sefoni. 3Mwaami Falawo lakwe utooyeeya ayi bene Isilaeli batooshingulukabo muluundu, ceebo babula kwakuya mukwiinga wa luyanga. 4Ntoolengesha ayi mwaami Falawo abe shicimpamya, aboobo utoomukonkela. Ono kukoma kwangu pamwaami uyo alimwi abashilumamba bakwe kutoondetela bulemu. Lyalo bene Ijipiti balaakwishiba ayi nebo ndime Mwaami Lesa.” Bene Isilaeli bakacita kweelana ambobakalwiitwa.
5Mwaami Falawo wa mucishi ca Ijipiti ndyaakanyumfwa ayi bene Isilaeli baloboka, lakwe alimwi abacinenenene bakwe bakayeeya miyeeyo imwi akwaamba ayi, “Ino twacitilanshi bobulya? Twaleka bene Isilaeli ayi baye, mbulya ono twabuula basha!” 6Mpomunyaawo cikoci ca mwaami cankondo cakabambwa. Mpeeke wakanyamuka abashilumamba bakwe. 7Lyalo wakanyamuka ashikoci shakwe shoonse shankondo, kubikaawo ashimwi shiindaawo kubota shili myaanda yosanwe awomwi isho shakalinga kutanjililwa abamatanjilili ba nshisho. 8Mwaami Lesa wakalengesha ayi mwaami Falawo abe shicimpamya akukonkela bene Isilaeli abo bakalinga kuswa mucishi ca Ijipiti cakutaloonda. 9Likoto lya bashilumamba lya bene Ijipiti boonse, maaki oonse, shikoci shankondo alimwi abeshikweensha bakakonkela bene Isilaeli. Bakabacana mpobakayaka misumba muloombe lwa Lweenge Lusalala, pafwaafwi aPi Ailoti alimwi aBaali Sefoni.
10Ono bene Isilaeli ndibakabona mwaami Falawo alimwi abashilumamba bakwe kabaya kuli mbabo, bakaloonda abuumbi akulilila Mwaami Lesa ayi abacaafwe. 11Bakaambila Mose ayi, “Sa mucishi ca Ijipiti temwakalinga shuumbwe? Sa wakatuletela kufwita momuno muluyanga? Bona ono nshewacita ceebo cakutukusha mucishi ca Ijipiti! 12Sa tatukwe kukulwiita katucili mucishi ca Ijipiti ayi ishi shilaakucitika? Twakakulwiita ayi utuleekebo sobeene tutolelele abusha bwesu kubene Ijipiti. Naakwiinga ncibotu kunooli basha mucishi cilya kwiinda kufwita muluyanga muno.”
13Mose wakabakumbula ayi, “Mutaloondi! Amuyumebo, mubone Mwaami Lesa nceshi acite sunu kwaamba ayi amupulushe. Aba bene Ijipiti teshi mukababoneewo alimwi. 14Mwaami Lesa utoomulwaninaako, aboobo tamweelete kwaamba ayi mucite cintu nabi comwi.”
15Mpomunyaawo Mwaami Lesa wakaambila Mose ayi, “Ceebonshi mutoolilila ndime? Balwiite bene Isilaeli banooyabo kunembo. 16Tandabika nkoli yako palweenge. Maanshi atoopansaana, mpeeke bene Isilaeli batookonsha kweenda mulweenge mutaamu maanshi, muyumu nta. 17Ntoolengesha ayi bene Ijipiti babe beshicimpamya cakwaamba ayi batoobanjilila mulweenge. Lyalo anebo ntooba abulemu kwiinda mukukoma mwaami wabo, bashilumamba bakwe, shikoci shankondo alimwi abeshikweensha. 18Na mbakoome, bene Ijipiti ndyeshi beshibe ayi ndime mwaami Lesa.”
19Mpeeke munjelo wakwe Lesa uyo wakalinga kunembo lya bashilumamba bene Isilaeli wakaboola kwisule lyabo. Alyalo licincilo lya likumbi lyakasena kushikila lyaba 20pakati ka bene Ijipiti alimwi abene Isilaeli. Lyalo likumbi lyakalengesha munshinshe kubene Ijipiti, sombi lyakapa mumuni kubene Isilaeli. Aboobo bashilumamba ba makoto obilo ayo bakaalilwa kukumana mashiku oonse.
21Mpeeke Mose wakatandabika lyaansa lyakwe palweenge, alakwe Mwaami Lesa wakapansaanya maanshi kwiinda mumuuwo wakapupa kuswa kwicwe. Muuwo uyo wakapupa mashiku oonse, lyalo palweenge pakaboolabo nta. Maanshi akapansaana. 22Aboobo bene Isilaeli bakasubukabo payumu, maanshi akalinga kwiimfwibo kumbasu shoonse shobilo anga ndubumbu lwa ŋanda.#1 Koli 10:1-2; Ebulu 11:29 23Bene Ijipiti bakabakonkela amaaki abo oonse, shikoci shankondo alimwi abeshikweensha kushikila amulweenge. 24Ingayi macuunsacuunsa, Mwaami Lesa wakalanga pabashilumamba bene Ijipiti kuswa mulicincilo lya mulilo alikumbi, abafulunganya. 25Wakalengesha kwaamba ayi mawilo a shikoci shabo shankondo kucatwa cakwaamba ayi cakalinga ciyumu kweenda. Ndibakabona bobulya bene Ijipiti bakaamba ayi, “Mwaami Lesa utoolwaninako bene Isilaeli ayi tukomwe. Atusweemo muno!”
26Mpomunyaawo Mwaami Lesa wakaambila Mose ayi, “Tandabika lyaansa lyako palweenge, maanshi atookumana alimwi akufwekelesha bene Ijipiti alimwi ashikoci shabo shankondo alimwi abeshikweensha.” 27Alakwe Mose wakatandabika lyaansa lyakwe palweenge, ono ndibwakaca, maanshi akakumana akuboola bweenka mbwaakalinga. Bene Ijipiti bakeelesha kusubuka mumaanshi, sombi Mwaami Lesa wakabapisha mumaanshi. 28Lyalo maanshi akakumanabo poonse poonse akufwekelesha shikoci shankondo, beshikweensha alimwi abashilumamba boonse bene Ijipiti abo bakalinga bakonkela bene Isilaeli mulweenge. Taaku muntu nabi womwi wakacalaawo. 29Sombi bene Isilaeli bakasubuka lweenge kabeenda payumubo nta, amaanshi kaaimikenebo mweela anga ndubumbu lwa ŋanda.
30Anu pabushiku ubo, Mwaami Lesa wakapulusha bene Isilaeli mumaansa abene Ijipiti, alimwi bene Isilaeli bakabona bene Ijipiti bafwite kabaseela muloombe lwa lweenge. 31Ono bene Isilaeli ndibakabona nkusu sha Mwaami Lesa shiteelekwa isho nshaakakomeshako bene Ijipiti, bakalemeka Mwaami Lesa. Kuswawaawo bakashoma muMwaami Lesa alimwi aMose musebenshi wakwe.
Currently Selected:
Kulonga 14: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
