Kulonga 11
11
Mose mbwaakaambilisha lufu lwa baana bakwiiya
1Mpomunyaawo Mwaami Lesa wakaambila Mose ayi, “Ono ndaakutumabo mwaalu aumwi womwi kumwaami Falawo alimwi abene Ijipiti. Kuswawaawo Falawo ulaakumuleka ayi muye. Ncakwiila pakucita boobo, ulaakumutandaanyaamo noonse mucishi cino. 2Lwiita bene Isilaeli boonse ayi basenge shintu sha silifa alimwi agolodi kubaabo beshikamukobonyinaabo.” 3Lesa wakalengesha ayi bene Ijipiti balemeke bene Isilaeli. Ncakwiila bacinenenene ba mwaami Falawo alimwi abantubo bamwi boonse bakabona ayi Mose ngumuntu munene ulemekwa.
4Mpeeke Mose wakaambila mwaami Falawo ayi, “Mwaami Lesa waamba ayi, ‘Pakati ka mashiku, ntokweendaana mucishi ca Ijipiti. 5Baana boonse basankwa bakwiiya ba mucishi ca Ijipiti batoofwa, kutalikila kumwanaamwaami Falawo, uyo weshi akapyane cuuna ca bwaami, kushikila akumwaana mwanakashi musha uyo upela maila. Aboombe boonse bakwiiya batoofwa. 6Mucishi ca Ijipiti coonse mulaakuba kulila kunene abuumbi, uko kutana kubonekaawo kuswabo kalekale, alimwi teshi kukabonekeewo. 7Sombi balo bene Isilaeli alimwi ashifubwa shabo teshi shikakuwikweewo kabwa nabi womwi. Lyalo mulaakwishiba ayi nebo neMwaami Lesa ndakabika bupusano pakati ka bene Ijipiti alimwi abene Isilaeli.’ ” 8Mose wakalwiita mwaami Falawo maswi akweelaako ayi, “Bacinenenene bako boonse balaakwisa kuli ndime akumfukamina alimwi akunkombelela ayi nkushe bantu bangu mucishi ca Ijipiti. Kuswawaawo anebo ndaakuya.” Ndyaakamana kwaamba boobo Mose wakaswa kumwaami Falawo kaashimbite kubukali.
9Mwaami Lesa wakalinga waambila Mose kataanshi ayi, “Mwaami Falawo ulaakutolelela kutakunyumfwila, kwaamba ayi nkacite ashimwi shaankamiko muIjipiti.” 10Mose aAloni bakacita shaankamiko shoonse ishi pameenso a mwaami Falawo, sombi Mwaami Lesa wakalengesha ayi abe shicimpamya akukasha bene Isilaeli kuswa mucishi cakwe.
Currently Selected:
Kulonga 11: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
