Milimo ya Batumwi 24
24
Bajuda mbobakabekesha Paulo
1Ndipakeenda nshiku shosanwe, mupailishi munene Ananiyasi, bamaloba ba baJuda bamwi alimwi ashikucafwa bantu kwiinda mumilawo ya munkuta wiitwa ayi Tetulasi, bakaya kuSisaliya. Balo bakashika kumweendeleshi Felekisi akutalika kubekesha Paulo. 2Paulo ndyaakeetwa, Tetulasi wakatalika kwaamba ayi,
“Nomulemekwa! Butanjilili bwanu bwa busongo bwalengesha ayi twikale muluumuno ciindi cilaamfu alimwi shintu shiinji sheelete shitoocitika mukusumpula cishi cesu. 3Shintu ishi tulashitambula amaansa obilo kuli koonse paciindi coonse, aboobo twamulumba abuumbi. 4Sombi nshisuni kwaamba ayi musowele ciindi, ono ndamusenga ayi mukutikishe makani afwaafwi aya ngotutokwaamba. 5Twacana kwaamba ayi musankwa uyu taanyumfwi. Ngushi kutalika shimfulunganya pakati ka baJuda mucishi coonse alimwi ngumutanjilili wa likoto lya bene Nasaleti. 6Alimwi wakalinga kusuni kubisha Ŋanda yakwe Lesa, aboobo twakamucata. [Twakalinga kusuni kumoombolosha kweelana amilawo yesu, 7sombi mutanjilili wa bashilumamba Lisiyasi, wakeendililabo kumukusha mumaanseesu akumutola munkusu shakwe. 8Kuswawaawo Lisiyasi wakaamba ayi boonse beshimulandunyina balyeelete kwisa kuli ndimwe.] Na mwamwiipusha nobeene, inga mwalinyumfwila ayi shoonse nshetutokwaamba pali nguwe nshalushinisho.” 9Abalo baJuda bakasuminisha akwaamba ayi shoonse nshancinencine.
Paulo mbwaakaliimikanina kunembo lyakwe Felekisi
10Lyalo mweendeleshi wakaambila Paulo ayi alakwe aambe. Mpeeke wakaamba ayi, “Ndishi kwaamba ayi mwakatalika kale kale koombolosha bantu ba mucishi cino, aboobo ndikondetwe kwaamba ayi inga ndaliimikanina pameenso anu. 11Inga mweshiiba nobeene ayi peendabo nshiku shili likumi ashobilo ndindakaya kuJelusalemu mukulambila Lesa. 12BaJuda ndibakancana muŊanda yakwe Lesa nshindakalinga kupikishanya amuntu, nabi kuyungoola bantu ayi batalike shimfulunganya. Nshindakalinga kucita shimfulunganya mushoonde shabo nabi kumusena umwi uli woonse mundabala inene. 13Inga tabacikoonshi nabi kutondesha ayi shoonse nshebatoombekesha nshalushinisho. 14Sombi ntoosumina pameenso anu ayi ndalambila Lesa wakalinga kulambila bamashali besu bakulukulu kwiinda mukushoma Nshila njebaamba ayi njakubeca. Ndashoma ashoonse shilembetwe muMilawo yakwe Mose alimwi amabuku a balaluki bakulukulu. 15Ntoolangila muli Lesa, bweenka mbuli mbobalangila aba, ayi bantu boonse bali kabotu abatabete kabotu pameenso akwe Lesa, balaakubuka kuswa kubafu. 16Paceebo ceeco, ndeelesha lyoonse kwikala buumi bubotu pameenso akwe Lesa alimwi abantu.
17“Ceebo peenda myaaka iinji ndindakaswa kuJelusalemu, ndakayaako mukutola shipo sha maali kubaJudama bamwi bakandu, alimwi akupa shipo shimwi kuli Lesa. 18Ndindakalinga kucita boobo, bakancana muŊanda yakwe Lesa ndindakamanishabo kulisalasha kweelana aMilawo. Tekwakalinga bantu mbondakalingaabo nabi bamwi bakalinga kucita shimfulunganya.#Mili 21:17-28 19Sombi kwakalinga baJuda bamwi ba kucishi ca Esha beelete kwisa kunembo lyanu akwaamba na balicite mulandu wakumpa. 20Nabi baaba bali waano inga bamulwiita na kuli mulandu ngobakancanina ndibakaŋombolosha beshinkuta babo. 21Sombibo cintu comwi ncendakaamba ndindakeemikana kunembo lyabo ayi, ‘Ntokoomboloshekwa amwebo sunu ceebo ndashoma ayi bafu balaakubushikwa alimwi.’ ”#Mili 23:6
22Mpomunyaawo Felekisi wakatantusha bushiku bwa koombolosha mulandu wabo ceebo wakalinga kwishi kabotu shaNshila ya Mwaami Jesu. Wakabalwiita ayi, “Ndaakoombolosha mulandu wanu na Lisiyasi mutanjilili wa bashilumamba akese.” 23Lyalo wakaambila munene wa bashilumamba mwaanda ayi anoolindilila Paulo, sombi anoomupako ciindi cakulikalila mwiine akusuminisha babye kumupa shakalinga kuyandika kuli nguwe.
Paulo mbwaakabandika aFelekisi alimwi aDulusila
24Ndipakeenda nshiku, Felekisi wakesa amukaakwe Dulusila, muJuda. Wakatuma muntu mukwiita Paulo, mpeeke wakakutika mbuli Paulo mbwaakalinga kwaamba shakushoma muli Klistu Jesu. 25Sombi Paulo ndyaakalinga kwaamba shabululami, kulilama alimwi ashabushiku Lesa ndyeshi akoomboloshe bantu, Felekisi wakaloonda. Mpeeke wakaambila Paulo ayi, “Pacecino ciindi inga waya, ndakwiita alimwi na mbe aciindi.” 26Felekisi wakalinga kusuni ayi Paulo amupe maali. Paceebo ceeco wakalinga kumwiita lyobilo lyobilo ayi babandike.
27Ndipakeenda myaaka yobilo, Poshasi Fesitasi wakapyana Felekisi pabweendeleshi bwa cishi. Ono mukwiinga Felekisi wakalinga kusuni ayi baJuda bamusuune, wakashiya Paulo muntolongo.
Currently Selected:
Milimo ya Batumwi 24: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
