Milimo ya Batumwi 20
20
Paulo mbwaakaya kuMakedoniya akuGilisi alimwi
1Ono shimfulunganya ndishakamana, Paulo wakabunganya bashomi. Ndyaakamana kubayuminisha, wakalasha akunyamuka kuya kuMakedoniya. 2Wakeenda mucishi coonse ico, kaaya buyuminisha bashomi kwiinda mukushimikila makani akwe Lesa mankanda aanji. Wakaya mukushika akuGilisi 3uko nkwaakekala myeenshi yotatwe. Ndyaakalinga kulibambila shakuya kuSilya abwaato bunene, wakanyumfwa ayi baJuda batoopinga kumucaya. Paceebo ceeco, wakayeeya kuboola kwisule kwiinda muMakedoniya. 4Mpomunyaawo Sopata mwanaakwe Pailasi wa kuBiliya, Alisitakasi aSekundasi ba kuTesalonika, Gayasi wa kuDebe, Timoti, Taikikasi aTulofimasi ba kuEsha bakayaakwe. 5Balo aba bakatanjila akuya mukutulindila muTulowasi. 6Ndibwakeenda bushiku bwakusekelela bwakulya Cimaande, aswebo twakanyamuka abwaato bunene kuswa kuFilipi. Ingayi pabushiku bwasanu, twakabacana kuTulowasi uko nkotwakekala nsondo yomwi.
Paulo mbwaakafwakashisha bene Tulowasi camamanino
7Ono pabushiku butaanshi bwa nsondo, nditwakabungana akulya mulalilo wa Mwaami, Paulo wakatalika kubashimikila Makani Abotu. Wakatolelela kushimikila kushikila pakati ka mashiku mukwiinga wakalinga kusuni kuswaako macuunsa. 8Mucipinda ca peculu umo motwakalinga kubungene, mwakalinga malampi aanji akalinga kunyaka. 9Umwi musankwa wiitwa ayi Yutikasi wakalinga kushiite pambwelyo ya ŋanda. Ceebo Paulo wakashimika ciindi cilaamfu, musankwa uyu wakatalika kushinshila. Ono ndyaakoona, wakaloka kuswa pacipinda catatu kushikila apanshi, bakamucanabo kaafwite. 10Mpomunyaawo Paulo wakaselukila panshi akutandabala pamubili wa musankwa uyo akumufukata. Lyalo wakabaambila abo bakalingaawo ayi, “Mutoongumani, waba kabotu!” 11Kuswawaawo, Paulo wakaboolela alimwi mucipinda ca peculu. Wakakomona shinkwa akulya abashomi boonse abo bakalingaawo. Wakabandikaabo ciindi cilaamfu. Wakaswaako lisuba kalili pafwaafwi kuswa. 12Mpeeke musankwa uyo bakamutola kuŋanda kumishaabo kaali muumi, aboobo boonse bakakondwa abuumbi.
Paulo mbwaakaswa kuTulowasi akuya kuMiletusi
13Mpomunyaawo twakatanjila kuya kuAsosi abwaato bunene uko Paulo nkwaakaya mukutantila. Wakatwaambila ayi tukakumanine kuAsosi mukwiinga lakwe wakayeeya kuya panshi. 14Ndyaakatucana kuAsosi, wakatanta mubwaato bunene motwakalinga akuya kuMitilene. 15Bushiku bwakaboolaawo twakashika pafwaafwi aKiyosi. Buce twakeenda akushika kuSamosi. Lyalo bushiku bwakaboolaawo twakashika kuMiletusi. 16Mpeeke Paulo wakayeeya kuseesha ndabala ya Efeso kwaamba ayi atasoowi ciindi mucishi ca Esha. Wakalinga kwiingene ceebo wakalinga kusuni kwaamba ayi na cakonsheka, akanooli muJelusalemu pabushiku bwa Pentekositi.
Paulo mbwaakalasha bamatanjilili ba coonde ca kuEfeso
17Ndyaakalinga kuMiletusi, Paulo wakatuma muntu kuEfeso mukulwiita bamatanjilili ba coonde ayi bakese mukukumana anguwe. 18Ndibakashika Paulo wakabalwiita ayi, “Mwebo mulishi mbondakalinga kwikalaanu akusebensa kuswa pabushiku ndindakashika mucishi ca Esha. 19Ndakasebensela Mwaami Jesu cakuliceesha abuumbi, cimwi ciindi aminsonshi ceebo ca mapensho akalinga kundetela baJuda. 20Mulishi kwaamba ayi taaku cintu nabi comwi cakalinga kuyandika kuli ndimwe ncendakamushisa, sombi ndakamushimikila akumwiisha makani apali Jesu pameenso a bantu alimwi amumaandaanu. 21KubaJuda abaswamashi bakunsengwe boonse, ndakalinga kubakonkomesha ayi balyeelete kusanduka kuswa kushibiibi shabo akusandukila kuli Lesa kwiinda mukushoma muMwaami wesu Jesu. 22Ono bulya, kwiinda mukunyumfwila Mushimu Usalashi, ntooya kuJelusalemu, sombi nshishi sheshi shikancitikile kulya. 23Ndishibo kwaamba ayi mundabala yoonse inene, Mushimu Usalashi ulancenjesha ayi ntolongo amapensho shilanindilila. 24Nshicitaaco mulandu nabi ndafwa, cinene nkumanisha mulimo wangu uyo ngwaakampa Mwaami Jesu, wakushimikila Makani Abotu aamba paluse lwakwe Lesa.#2 Timo 4:7
25“Ndakeenda muli ndimwe noonse, kaanja cishimikila makani a Bweene bwakwe Lesa. Sombi bulya ndishi kwaamba ayi taaku weshi akamboneewo alimwi. 26Paceebo ceeco, ntoomulwiitilisha pabushiku bwa sunu ayi na bamwi mulikoto lyanu bakasoweke, teshi mulandu wangu, sobwe. 27Mukwiinga taaku cintu nabi comwi ncendakamushisa, sombi ndakamushimikila shoonse nshaasuni Lesa. 28Nkokwaamba ayi mulyeelete kulilama kabotu nobeene akulama likoto lya bantu abo Mushimu Usalashi mbowakamupa ayi mulame. Amweembele kabotu coonde cakwe Lesa, abo mbwaakapulusha ayi babe baakwe kwiinda mulufu lwa Mwanaakwe. 29Ndishi kwaamba ayi na nkasweewo palikoto lyanu, baumpe bakali balaakwisa pakati kanu alimwi teshi bakalekewo bamucoonde aba. 30Nabi mulikoto lyanu nobeene, mulaakuswa bantu beshi bakaambe shabubeshi kwaamba ayi bakushe bantu kulushinisho bakakonkele mbabo. 31Anu amucenjele. Kamwiingashila lyoonse ayi ndakapenshekwa abuumbi mashiku amalumwi alimwi nshikwe kucilekaawo kumwiisha noonse mulikoto lyanu kwamyaaka yotatwe.
32“Cakweelaako, ndamubika mumaansaakwe Lesa alimwi amakani aamba paluse lwakwe kwaamba ayi amulaame akumuyumya ayi mukatambule shoolwe isho Lesa nshaasungila bantu bakwe boonse. 33Nshina kuyandawo kale kubwesa maali nabi cakufwala ca muntu umwi kwiinda mulunkumbwa. 34Mwebo nobeene mulishi kwaamba ayi ndakasebensa amaansaangu aya akucana shoonse nebo ababyanji, nshetwakalinga kubula. 35Mushintu shoonse ndakamubonesha ayi kwiinda mukusebensa cankusu bweenka mbuli mbondakasebensa, inga twacafwa baabo batacite nkusu. Lyoonse kamwiibaluka maswi akaamba Mwaami Jesu ayi, ‘Kupa kulaleta shoolwe kwiinda kutambula.’ ”
36Ndyaakamana kwaamba, wakafukama pantu pomwi ambabo akupaila kuli Lesa. 37Boonse bakalinga kulila ndibakalinga kumukumbata akumufyonta pakulashanya. 38Cakabapa bunene buumba ngamaswi ngaakaamba ayi teshi bakamuboneewo alimwi. Kuswawaawo, bakamushindikila kubwaato bunene.
Currently Selected:
Milimo ya Batumwi 20: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
