Milimo ya Batumwi 18
18
Paulo mbwaakashimikila Makani Abotu muKolinto
1Kuswawaawo, Paulo wakaswaako kuAtenisi akuya kuKolinto. 2Nkomunya uko wakacana muJuda umwi wiitwa ayi Akwila uyo wakashalilwa kuPontusi. Musankwa uyu aPulisila mukaakwe ndibakaswabo kuItali ceebo Kulodyasi Sisa, muleli munene wakaambila baJuda boonse ayi baswe muLoma. Paulo wakaya mukubabona. 3Wakekala akusebensaabo ceebo abalo bakalinga beshikutunga matente bweenka mbuli nguwe. 4Lyoonse pabushiku bwakookesha bwa Cibelu, Paulo wakalinga kubandika cankusu abantu mushoonde sha baJuda kwaamba ayi mpashi baJuda abaGiliki inga bashoma Makani Abotu.
5Ono Sailasi aTimoti ndibakashika kuswa kuMakedoniya, Paulo lakwe wakalibenga ayi unanooshimikilabo akulwiita baJuda ayi Jesu ngoUsalitwe wakwe Lesa. 6Sombi ndibakamupikisha akutalika kwaamba shibiibi kuli nguwe, Paulo wakabonesha kukaka kwabo kwiinda mukulipampa lusuko kushakufwala akubalwiita ayi, “Mwalicaya nobeene! Nebo nshicite mulandu, sobwe. Kuswa sunu ndanooshimikilabo baswamashi bakunsengwe.” 7Mpomunyaawo wakabashiya akuya kuŋanda ya musankwa umwi muswamashi wakunsengwe wiitwa ayi Taityasi Jasitasi wakalinga kulambila Lesa. Ŋanda yakwe yakalinga kubambene acoonde ca baJuda. 8Mpeeke musankwa umwi wiitwa ayi Kilisipasi uyo wakalinga mutanjilili wa coonde, wakashoma muMwaami Jesu pantu pomwi abamuŋanda yakwe boonse. Bantu baanji muKolinto bakanyumfwa makani akaamba Paulo, bakashoma akubombekwa.
9Bumwi bushiku mashiku, Mwaami wakaboneka kuli Paulo anga muciloto akumwaambila ayi, “Utaloondi, sombi tolelela kushimikila, utacileeki 10mukwiinga ndi awebo. Taaku muntu nabi womwi ngweshi akakuciise ceebo bantu baanji mundabala inene ino bali kulubasu lwangu.” 11Lyalo Paulo wakekalako mwaaka womwi amusa, kaaisha bantu maswi akwe Lesa.
12Ono Galiyo ndyaakaba mweendeleshi wa Akeya, baJuda bakabungana akucata Paulo bamutola kunkuta. 13Lyalo bakaamba ayi, “Uyu musankwa utooyungoola bantu ayi banoolambila Lesa munshila ikashikwa amulawo wesu!” 14Sombi Paulo ndyaakalinga kusuni kutalika kwaamba, Galiyo wakaambila baJuda ayi, “Nemwalinga kwaamba ayi uyu muntu wasotoka mulawo nabi kubishisha mubye, naakwiinga ndoombolosha mulandu wanu mwebo nobaJuda. 15Ono mukwiinga ngamakani aamba pamaswi, meena alimwi amulawo wanu, mulyeelete kulibonena nobeene. Nebo nshikoonshi koombolosha shintu shambuli sheeshi, sobwe!” 16Mpomunyaawo wakaambila bashilumamba ayi babatande munkuta. 17Lyalo boonse bakacata musankwa wiitwa ayi Sositenesi uyo wakalinga mutanjilili wa coonde ca baJuda akumuuma kunembo lya nkuta, sombi Galiyo taakwe kulisukama napaceyi.
Paulo mbwaakaboolela kuAntyoki
18Paulo wakekala abashomi kuKolinto nshiku shiinji. Kuswawaawo, wakabalasha akutanta bwaato bunene kuya kuSilya pantu pomwi aPulisila alimwi aAkwila. Kaatana kuswa kuSenkiliya, Paulo wakacesa misusu kutondesha ayi wakashomesha cakulumbila kuli Lesa.#Shakube 6:18 19Ndibakashika kuEfeso, Paulo wakashiya Pulisila aAkwila. Lakwe wakaya mucoonde ca baJuda mukubandika ambabo. 20Bantu ndibakamusenga ayi ekaleko nshiku shiinji ambabo, wakakaka. 21Sombi ndyaakalinga kubalasha, wakabaambila ayi, “Na nkuyanda kwakwe Lesa, ndaakwisa alimwi.” Lyalo wakaswaako kuEfeso mubwaato bunene.
22Ono ndyaakashika kuSisaliya, wakaya kuJelusalemu mukubona bamucoonde. Kuswawaawo wakaya kuAntyoki. 23Ndyaakekalako nshiku shiniini, wakaswaako akuya kucishi ca Galatiya alimwi aFuligiya, kaaya ciyumyayumya bashomi boonse.
Apolosi mbwaakashimikila muEfeso amuKolinto
24Paciindi ico, muJuda umwi wiitwa ayi Apolosi, wakashalilwa mundabala inene ya Alekisandiliya, wakaya kuEfeso. Wakalinga muntu ucishi kwaamba alimwi wakalinga kwishi bumbi Malembo akwe Lesa. 25Musankwa uyu wakeeishikwa kabotu munshila ya Mwaami alimwi wakalinga kwaamba cabusongo akwiisha kabotu shapali Jesu. Nakubi boobo wakalinga kwishibo shakubombeka kwakwe Joni Mubombeki. 26Wakatalika kwaamba cakutaloonda mucoonde ca baJuda. Ono Akwila aPulisila ndibakanyumfwa kaamba, bakayaakwe kuŋanda yabo akumusansulwita mbuli nshila yakwe Lesa mbweebete. 27Lyalo Apolosi wakayeeya kuya kuAkeya. Bashomi ba muEfeso bakamuyumya kwiinda mukulemba nkalata yakutola kubashomi ba muAkeya kwaamba ayi bamutambule kabotu. Ndyaakashika, wakacafwa bumbi abo bakalinga kushoma muli Jesu kwiinda muluse lwakwe Lesa. 28Lakwe wakapikisha baJuda cankusu pameenso a bantu akubatondesha kwiinda muMalembo akwe Lesa ayi Jesu ngoUsalitwe wakwe Lesa.
Currently Selected:
Milimo ya Batumwi 18: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
