Milimo ya Batumwi 15
15
Libungano lyakaba kuJelusalemu
1Basankwa bamwi bakaswa kucishi ca Judeya, bakesa kuAntyoki akutalika kwiisha bashomi ayi, “Na mwabuula kupalulwa kweelana abwaamba Milawo yakwe Mose, Lesa teshi akamupulusheewo.”#Bene Lefi 12:3 2Mpeeke Paulo aBanabasi bakapikishanya abuumbi ambabo pacikani ici. Paceebo ceeco, bashomi bakasuminishanya ayi Paulo, Banabasi alimwi abamwi ba muAntyoki baye kuJelusalemu mukubandika abatumwi alimwi abamatanjilili ba coonde pamakani aya.
3Paceebo ceeco, coonde cakabatuma. Bakeenda muFonisha amuSamaliya kabaya bulwiita bashomi mbuli baswamashi bakunsengwe mbobakashoma muli Lesa. Makani aya akasangalasha bumbi bashomi boonse. 4Ndibakashika muJelusalemu, bantu ba mucoonde, batumwi alimwi abamatanjilili bakabatambula. Mpeeke abalo bakabasansulwita shoonse Lesa nshaakacita kwiinda muli mbabo. 5Sombi bashomi bamwi, abo bakalinga kulubasu lwa baFalisi bakanyamuka akwaamba ayi, “Baswamashi bakunsengwe balyeelete kupalulwa akulwiitwa ayi banookonkela Milawo yakwe Mose.”
6Mpomunyaawo batumwi abamatanjilili bakabungana pantu pomwi ayi balangilisheewo pamakani aya. 7Ndibakabandika ciindi cilaamfu, Pita wakanyamuka akutalika kwaamba ayi, “Nobamakwesu, mulishi kwaamba ayi Lesa wakansala kale kuswa pakati kanu ayi nshimikile Makani Abotu kubaswamashi bakunsengwe kwaamba ayi abalo banyumfwe akushoma muMwaami Jesu.#Mili 10:1-43 8Lyalo Lesa ushi myoyo ya bantu boonse, wakabonesha kwaamba ayi abalo baswamashi bakunsengwe inga bashoma kwiinda mukubapa Mushimu Usalashi, bweenka mbwaakatupa aswebo.#Mili 10:44; Mili 2:4 9Taakwe kuboneshaawo bupusano pakati pali ndiswe ambabo mukwiinga wakasalasha myoyo yabo abalo ceebo bakashoma. 10Ino nceebonshi ncemutokweeleshesha Lesa kwiinda mukubika mikuli ilemu pabashomi iyo bamashali besu bakulukulu, nabi ndiswe soonse, njetwakaalilwa kunyamuna? 11Tabwishi mboceelete kuba! Tulashoma kwaamba ayi tulapulushikwa kwiinda muluse lwa Mwaami Jesu, bweenka mbuli mbabo.”
12Mpeeke likoto lya bantu lyakoomunabo tontolo, kalikutika Banabasi aPaulo ndibakalinga kusansulula shaankamiko ashitondesho sha nkusu sha kwiculu, Lesa nshaakacita pakati ka baswamashi bakunsengwe kwiinda muli mbabo. 13Ndibakamana kwaamba, Jemusi alakwe wakaamba ayi, “Amukutike nobamakwesu! 14Simoni waswa mukutusansulwita mbuli Lesa mbwaakabonesha lusuno kubaswamashi bakunsengwe akusala bantu pakati kabo ayi babe bantu bakwe. 15Maswi aya akakoshanya amaswi akaamba balaluki bakulukulu, kweelana ambokulembetwe muMalembo akwe Lesa ayi,
16‘Shaakwiinda ishi ndaakwisa alimwi,
akuyaka ŋanda yakwe Defedi yakawa.
Isho shakamwayuluka ndaakushiyaka alimwi.
17Aboobo bantu bamwi boonse balaakulangoola nshila ya Mwaami Lesa,
nkokwaamba ayi baswamashi bakunsengwe
boonse abo mbondakasala ayi babe bantu bangu.
18Ubo mbwaatokwaamba Mwaami Lesa
uyo wakeshibisha bantu kale kale.’ ”#Amo 9:11-12
19Jemusi wakatolelela kwaamba ayi, “Mukuyeeya kwangu, ndaboona ayi tatweelete kupensha baswamashi bakunsengwe abo batoosandukila kuli Lesa. 20Sombi tulyeeletebo kubalembela nkalata yakubalwiita ayi tabeelete kulya shakulya shitasalalite ceebo nshipo shakapekwa kushibumbwabumbwa, kutacita cikololo, kutalya nyama shakashinwa alimwi abulowa.#Kulo 34:15-17; Bene Lefi 18:6-23; 17:10-16 21Mukwiinga Milawo yakwe Mose yakatalikabo kale kale kubelengwa mushoonde sha baJuda. Aboobo bantu balashimikila maswi ngaakaamba lyoonse pabushiku bwakookesha bwa Cibelu mumandabala oonse.”
Nkalata yakalembelwa baswamashi bakunsengwe bashomi
22Mpomunyaawo batumwi abamatanjilili pantu pomwi acoonde coonse, bakayeeya ayi basale basankwa bamwi mulikoto lyabo ayi babatume kuAntyoki pantu pomwi aPaulo aBanabasi. Lyalo bakasala Judasi, uyo wakalinga kwiitwa ayi Basabasi alimwi aSailasi, basankwa bobilo abo bakalinga kulemekwa kubashominyinaabo. 23Nkalata njebakabapa ayi batole yakalinga kwaamba ayi,
“Nobamakwesu, swebo sobatumwi abamatanjilili ba coonde twamwaansha noonse nobaswamashi bakunsengwe nomushoma muMwaami Jesu nomwikala muAntyoki, Silya aSilisiya. 24Twakanyumfwa ayi bamwi bakaswa mulikoto lyesu bakesa mukumupensha akumufulunganya pamakani ngobakaamba kuli ndimwe. Aba bantu tabakwe kupekwa nkusu kuswa kuli ndiswe. 25Lyalo twakakumana pantu pomwi akusuminishanya kwaamba ayi tusale bantu bamwi batumwe kuli ndimwe. Balaakwisa aBanabasi alimwi aPaulo abo mbotusuni abuumbi. 26Abo balo bakaaba buumi bwabo mukusebensela Mwaami wesu Jesu Klistu. 27Aboobo twatuma Judasi alimwi aSailasi mbeshi bese bamulwiite amilomo yabo makani oonse ngotwalemba. 28Mushimu Usalashi ngowakatutanjilila kwaamba ayi tusuminishanye ayi tutamutuli mikuli imwi ilemu, sombibo milawo iyi iyandika. 29Mutanoolya cakulya cakapekwa kushibumbwabumbwa, mutanoolya bulowa, mutanoolya banyama bakashinwa alimwi mutanoocita cikololo. Mwebo mulaakucita kabotu namukasuunge shintu ishi. Amucaale kabotu.”
30Mpeeke aba bakatumwa bakaya kuAntyoki uko nkobakabunganya likoto lya bashomi akubapa nkalata iyo. 31Lyalo bantu abo ndibakabelenga nkalata iyo bakasangalala pakunyumfwa makani akubayumyayumya. 32Judasi aSailasi balo bakalinga mbalaluki, bakayumya bashomi amaswi aanji akakalika myoyo yabo. 33Ndibakekalako nsondo shiniini, bashomi bakabalasha ayi beende muluumuno, mpeeke bakaboolela kubaabo bakabatuma. [ 34Lakwe Sailasi wakasala kucaala kweenka uko.]
35Paulo aBanabasi bakekalako myeenshi kuAntyoki. Bakalinga kwiisha akushimikila maswi a Mwaami Jesu pantu pomwi abamwi baanji.
Paulo aBanabasi mbobakapansaana
36Ndipakeenda myeenshi Paulo wakaambila Banabasi ayi, “Atuboolele tuye tukabone bamakwabesu mumandabala motwakashimikila maswi a Mwaami Jesu akuya mukubona mbuli mbobashiite.” 37Banabasi wakalinga kusuni ayi Joni Maako ayaabo. 38Sombi Paulo wakayeeya ayi acaalebo mukwiinga kataanshi wakaboolaamo akubashiya muPamfilya, milimo yabo keetana kumana.#Mili 13:13 39Mpomunyaawo bakapikishanya abuumbi akupansaana. Lyalo Banabasi wakaya aMaako mubwaato bunene kuSaipulasi. 40Lakwe Paulo wakasala Sailasi akuyaakwe. Bashomi bakabapaililaako kuli Lesa kwaamba ayi abape coolwe. 41Bakeenda muSilya amuSilisiya kuya ciyumyayumya bashomi ba mushoonde shoonse.
Currently Selected:
Milimo ya Batumwi 15: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
