Milimo ya Batumwi 12
12
Elodi mbwaakapensha bashomi
1Munshiku isho, mwaami Elodi wakatalika kupensha bantu bamwi ba mucoonde. 2Wakaambila shilumamba ayi acaye Jemusi mukwabo Joni amupeeni. 3Ono ndyaakabona ayi ici casangalasha baJuda, wakaambila bashilumamba ayi baye bacate Pita akumwaanga. (Ici cakacitika ciindi cakusekelela kulya Cimaande.) 4Pita ndyaakaangwa bakamubika muntolongo umo mwakalinga kulamwa atukoto tone twa bashilumamba. Tukoto uto twakalinga kucite bantu bone bone abo bakalinga kukomboshanya paciindi ceelene. Elodi wakalinga kusuni kumoomboloshesha pameenso a bantu bwaakwiinda bushiku bwa Pasika bwakwiibaluka kusotokela.#Kulo 12:1-27 5Aboobo bakatolelela kulama Pita muntolongo. Sombi bantu ba mucoonde bakalinga kumupailila cankusu kuli Lesa.
Pita mbwaakakushikwa muntolongo
6Ono mashiku pabushiku Elodi mbwaakalinga kuyeeya ayi macuunsa akamoomboloshe, Pita wakalinga kulete pakati kabashilumamba bakalinga kumulama. Wakalinga kwaangitwe ncetani shobilo, imwi kayaangitwe kushilumamba womwi kulubasu lumwi aimwi kushilumamba umwi. Kwakalinga abashilumamba bamwi pamulyango wa ntolongo. 7Mpomunyaawo kwakesa munjelo wa Mwaami Lesa, lyalo muntolongo mwakaboneka mumuni. Munjelo uyo wakapukumuna Pita akumubusha, kaamba ayi, “Fwambaana buka!” Paciindi ceenka ico ncetani shakalokaako kumaansa. 8Mpeeke munjelo wakaambila Pita ayi, “Anga laamba wako alimwi ufwale ansapato.” Pita wakacita mbweeke ubo. Munjelo wakamwaambila alimwi ayi, “Lifweke cakufwala cako ca peculu unkonkele.” 9Pita wakamukonkela kushikila baswa muntolongo, sombi taakalinga kwishi na cakalinga kucita munjelo ncancinencine nabi na wakalinga kulota. 10Lyalo bakeenda palikoto lya bashilumamba bataanshi beshikulindilila alimwi ababili kushikila bashika apamwinjililo wa nshimbi wa mundabala inene. Mpeeke cisasa ca mwinjililo uyu cakalicalukilabo ciine, lyalo bakaswa. Ndibakashika kumeelelesho a nshila imwi, munjelo wakashimingana akushiya Pita.
11Mpomunyaawo Pita wakeshiba cakacitika akwaamba ayi, “Ono ndeshiiba calushinisho kwaamba ayi Mwaami Lesa ngowatuma munjelo ayi amfuune munkusu shakwe Elodi alimwi akushintu shoonse baJuda nshebalinga kusuni kucita pali ndime.”
12Ndyaakeshiba boobo, wakaya kuŋanda yakwe Maliya, banyina Joni Maako, uko kwakalinga kubungene bantu baanji kabapaila. 13Pita ndyaakakonkoonsha pacisasa ca pamulyango wa kunsengwe, kwakesa mwanakashi musebenshi wiitwa ayi Loda uyo wakanyumfwa akwisa mukubona wakalinga kukonkoonsha. 14Ndyaakeshiba liswi lyakwe Pita, wakasangalala abuumbi. Kaatana akucalula kumulyango, wakaboolela lubilo kuya mukulwiita bakalinga mukati ayi, “Pita uliimfwi pamulyango apa!” 15Sombi balo bakamukumbula ayi, “Wacinkuka webo!” Ndyaakatolelela kwaamba bweenka ubo, bakaamba ayi, “Anu ngumunjelo wakwe.”
16Ndibakalinga kucaamba, Pita alakwe wakalinga kucikonkoonshabo. Ono ndibakacalula cisasa akumubona, bakakankamana. 17Pita wakaboomusha alyaansa akubasansulwita mbuli Mwaami Lesa mbwaakamukusha muntolongo. Wakabaambila alimwi ayi, “Mulwiiteko Jemusi alimwi abashomi bamwi boonse.” Ndyaakamana kwaamba boobo, wakaya kumwi.
18Ndibwakaca, bashilumamba bakalinga kulindilila kuntolongo bakafwa boowa akufulungana abuumbi. Bakalinga kuliipusha ayi, “Ino Pita waya kuli?” 19Elodi ndyaakanyumfwa boobo, wakapingula ayi bamulangoole, sombi tabakwe kumucana. Lyalo wakeepushisha bashilumamba abo akwaamba ayi balyeelete kucaikwa.
Kuswawaawo, Elodi wakaswaako kuJudeya akuya kuSisaliya nkwaakaya mukwikala nshiku shiniini.
Lufu lwakwe Elodi
20Elodi wakakalalila bumbi bantu ba kuTaya aSidoni. Paceebo ceeco, bantu ba mumandabala aya bakatuma likoto lya bantu ayi baye babonanaakwe. Cakutaanguna, bakalwiita akunyumfwana aBulasitasi, uyo wakalinga munene wa kuŋanda ya mwaami Elodi. Kuswawaawo, bakaya kuli Elodi mwiine kwaamba ayi pabe luumuno mukwiinga cishi cakalinga kukusha shakulya mucishi cakwe Elodi.
21Pabushiku Elodi mbwaakasala mwiine, wakafwala shakufwala sha bwaami akwikala pacuuna cakwe ca bwaami. Lyalo wakatalika kubaambila bantu abo. 22Mpeeke bantu bakalinga koolobesha ayi, “Taatokwaamba anga ngumuntu, sombi anga ngulesa.” 23Paciindi ceenka ico munjelo wa Mwaami Lesa wakalengesha Elodi kuciswa mukwiinga taakwe kupa bulemu kuli Lesa. Mpeeke mapila akamulya, wafwa.
24Paciindi ici, bantu baanji baanji bakanyumfwa maswi akwe Lesa akwaashoma.
25Banabasi aSaulo ndibakamanisha mulimo ngobakalinga batumwa, bakaswaako kuJelusalemu batolelela aJoni Maako.
Currently Selected:
Milimo ya Batumwi 12: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
