2 Makabisi 1
1
Nkalata yakalembelwa baJuda bakuIjipiti
1Ndiswe baJuda bekala kuJelusalemu amucishi caJudeya, tutoomwaansha nobamaJudanyineesu nomwikala kuIjipiti. 2Mwaami Lesa amupe lumuuno ashibotu shoonse. Eebaluke cipangano cakwe Abulaamu, Isaki alimwi a Jakobo, basebenshi bakwe bashomeka. 3Amupe noonse amyooyo isuni kulambila akuyanda kucita kwakwe mukuyuma akukondwa. 4Acalule myooyo yanu ayi isumine maswi akwe amilawo yakwe, lyalo amupe luumuno. 5Anyumfwe mipailo yanu, akunyumfwanaanu, kwaamba ayi atakamushiyi paciindi camapesho. 6Aswebo kuno tutoomupailila.
7“Ciindi camwaami Demetiliyasi mucaaka ca 169, swebo somaJuda twakamulembela, ciindi ncetwaalinga mumapesho anene, akatushikila mucaaka ceenka ico. Paciindi ceenka ico lilya Jasoni alikoto lyakwe ndyaakabukila cishi cesu cisalalite abwaami bwesu. 8Wakatenta milyango yaŊanda yakwe Lesa akucaya bantu batakwe akumubishisha. Sombi swebo twakapaila ku Mwaami Lesa, lakwe wakatunyumfwa. Twakatula milambu yabusu, twakanyasha malampi akubika shinkwa panembo lya Mwaami Lesa. 9Ono tutoomulembela alimwi ayi mwiibaluke inshiku isho shakusekelela sha Kisilefu mweenshi wa tente caaka ca 188.”
Nkalata yakalembelwa Alisitobulusi
10Tuli bantu bakuJelusalemu abakuJudeya, balikoto lya bacinenenene pantu pomwi aJudasi. Twamwaansha mwebo noba Alisitobulusi nomukowa wabapailishi wakananikwa amwaami Pitolemiyusi. Twamwaansha alimwi nobaJuda bekala kuIjipiti. Noonse twamwaansha. 11“Palya Lesa wakatupulusha kushiloondesha shinene, tutoomulumba abuumbi pakwiinga mwakatucafwa pa nkondo yakulwana a mwaami.” 12Ngu Lesa uyo wakatandaanya balwani balya bakalinga kusuni kuleta nkondo mundabala Isalalite. 13Nkokwaamba ayi, mwaami wakaya kuPesha alikoto lyakwe lyabeshilumamba. Beshilumamba bakwe bakaboneka anga tabakoonshi kukomwa. Sombi balo bakacaikwa muŋanda yakwe Naneya kalesa kabo kanakashi, pakwiinga mupailishi wakwe Naneya wakababeca a bubeshi bwabo. 14Mwaami Antyokusi wakaamba ayi mbakwabo kuŊanda yakwe Lesa, mwanakashi uyo kucita anga utooyanda kumweeba. Sombi cinene wakalinga kusuni kushika pafwaafwi ayi amunyaye buboni bwakwe kuba anga ngumuntu wabubwesa. 15Mupailishi Naneya, wakabubona buboni ubo kumwaami, lakwe wakenjila abantu bongayebo muŋanda yakwe Naneya iyo. 16Antyokusi ndyaakenjila, mupailishi wakacalaako kumulyango alimwi wakacalula cisasa cimwi citashibikitwe capeculu, wakatalika kuwaala mabwe. Wakacaya mwaami alimwi abantu mbwaakalingabo, wakalila mitwi yabo, bantu balya bakalinga pansengwe. 17Alumbwe Lesa wesu pashoonse, lakwe uyo wakanyonyoola bantu bakamunyansha. 18“Pakucana kwaamba ayi tulisuni kucita shakusekelela Ŋanda yakwe Lesa pabushiku bwa 25 pa mweenshi wa Kisilefu, twayeeya ayi tumwishibishe, ayi amwebo musekelele tente ilya. Muyeeye alimwi mulilo ulya Neemiya ngwaakabona lilya ndyaakalinga kupa milambu, lilya ndyaakalinga kuyaka Ŋanda yakwe Lesa acipaililo ca mitulo. 19Palya peenka bashalibesu ndyebakalinga kuya kuPesha, ndyebakatolwa busha, bapailishi bankumbu paciindi ico bakabwesa mulilo pacipaililo camilambu bakooshisa paanshi mubulyango mutamu maanshi. Lyalo wakooshisa ayi pamusena uyo pataboni muntu, nabi womwi. 20Ndyeshakamana shaaka shiinji, ciindi Lesa ndyaakayanda, mwaami waPesha wakeeta Neemiya wamutuma kuJelusalemu. Lakwe wakaambila baana babapailishi abo bakashisa mulilo uyo. Balo bakaamba ayi mulilo uyo tabakwe kuucana, bakacanabo mafuta. 21Lyalo Neemiya wakabalwiita bapailishi ayi batekule mafuta ayo akwisaawo kuli nguwe, lyalo wakabika mitulo pacipaililo. Neemiya wakalwiita mupailishi ayi asanseele mafuta alya pankuni apamitulo yakabikwa peculu. 22Ndyaakacitabo pakeendabo ciindi ciniini, lisuba lyakalinga mumakumbi lyakatalika kubala. Peenka apo mulilo wakanyaka, boonse bakakankama abuumbi. 23Lilya mutulo ndyewakapya, mupailishi abaabo mbwaakalingaabo bakapaila, Jonasani ngowakalinga kubatanjilila, bamwi boonse bakalinga kutila mafuta, pantu pomwi a Neemiya. 24Mupailo wakalinga bobulya: ‘O Mwaami Lesa Cilenga washintu shoonse, uyoosha wa nkusu shoonse, oluleme Omubombu moyo, webo weenka ndiwe mwaami, webo weenka ndiwe wankumbu. 25Ndiwe weenka noopa shibotu, ndiwe weenka ooluleme, wa nkusu shoonse a walyoonse alyoonse. Ndiwe wakapulusha baIsilaeli kushibiibi shoonse. Ndiwe wakasala bashalibesu ayi babe basalitwe bako, alimwi mwakabapatula. 26Amutambule mutulo muliina lyabantu banu baIsilaeli. Mubalaame akubasalasha. 27Mubabooshe abo bakapalanganina uku akooku. Mufune balya bali mubusha kubantu batashomi. Mubacitile nkumbu abo batoopenshekwa akusampulwa, kwaamba ayi batashomi boonse beshibe ayi mwebo ndimwe Lesa wesu. 28Amubapenshe bantu bashitaala abalinyumfwa abo batupensha akutusebaanya. 29Bantu banu mubabike mumisena yanu Isalalite, mbuli Mose mbwakabaambila.’
Muleli waku Pesha wanyumfwa makani amulilo
30“Ono bapailishi bakeemba nyimbo. 31Lyalo Neemiya wakaamba ayi, mafuta akacaalawo asansailwe pamabwe anene. 32Mpomunyaawo mulilo wakanyaka, sombi wakashimika bwangu ciindi ndibakanyasha pacipaililo. 33Impuuwo yasheesho yakanyumfwika, lyalo bakashibisha mwaami wakuPesha ayi kumusena nkobakatolwa busha, bapailishi balya bakashisa mulilo, bakacanaako mafuta, alimwi ayi Neemiya abantu bakwe, mafutaayo akasebense kutenta shintu shakalinga pacipaililo. 34Ono mwaami uyo wakeepusha ipusha wakanyumfwa ayi shoonse nshancinencine, wakaamba ayi acinjilishe musena uyo, lyalo wakabeeta bakasalwa a Lesa. 35Musena uyo wakaleta bubile buunji alakwe mwaami wakalinga kutola shipo shiinji kubaabo boonse mbaakalinga kucanaako. 36Neemiya abantu bakwe wakeeta liina mafuta ayo ayi, ‘Nefuta,’ nkokwaamba ayi, ‘Kusalasha,’ sombi bantu baanji balaita ayi, ‘Nafuta.’
Currently Selected:
2 Makabisi 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.