2 Timoti 4
4
1Pameenso akwe Lesa aKlistu Jesu, uyo eshi akoomboloshe boomi abafu alimwi ceebo cakwaamba ayi ulaakwisa mubwaami, ntoosenga cankusu ayi 2unooshimikila maswi akwe Lesa, muciindi bantu ndibasuni kukutika nabi tau. Kobalulika, kubakalalila alimwi akubayumya mukubeeisha camoyonteeka. 3Ciindi cilaakushikila bantu ndyeshi bakakake kunyumfwa kwiisha kwalushinisho, sombi balaakukonkela shiyanda myoyo yabo kwiinda mukulibunganishisha bafundishi baanji abo beshi bakanokwaamba nshebasuni kunyumfwa. 4Balaakufutata kwaamba ayi batanyumfwi shalushinisho akukonkela tulabi. 5Sombi webo lilame mushiindi sha mushobo uli woonse, koyuma mumakatasho, cita mulimo wakushimikila Makani Abotu akucita milimo yako yoonse kweelana amusebenshi wakwe Lesa.
6Kwaamba pali ndime, ciindi cangu cashikila ayi mbengwe pacipaililo, nciindi cakushiya buumi buno. 7Ndalwana nkondo ibotu akumanisha kucica lubilo alimwi ndasunga lushomo lwangu. 8Bulya mushini wa bululami utoonindilila uyo Mwaami Lesa, moomboloshi ululeme, ngweshi akampe pabushiku ubo. Nakubi boobo teshi ukapekwebo ndime, sombi abaabo boonse balindila kwisa kwakwe mulusuno.
Maswi amwi
9Elesha cankusu kwisa kuli ndime cakufwambaana, 10Ceebo Dimasi wakanshiya mukwiinga wakasunisha shacishi ca panshi cino. Paceebo ceeco wakaya kuTesalonika. Kilesensi wakaya kuGalatiya alakwe Taitasi kuDalumatiya.#Kolo 4:14; Filimo 24; 2 Koli 8:23; Gala 2:3; Taita 1:4 11Luka eenka ngooli anebo. Ukabwese Maako akwisaakwe ceebo ulakonsha kuncafwa mumulimo.#Kolo 4:14; Filimo 24; Mili 12:12, 25; 13:13; 15:37-39; Kolo 4:10; Filimo 24 12Taikikasi ndakamutuma kuEfeso.#Mili 20:4; Efe 6:21-22; Kolo 4:7-8 13Waakunoosa ukandeteleeko acakufwala ca peculu ncindakashiya kuli Kapasi kuTulowasi alimwi amabuku angu, bunene bunene ayo a shipaya.#Mili 20:6
14Alekisanda shikufula sheela wakambishisha abuumbi. Mwaami Lesa ulaakumupa mulandu weelete kweelana ancaakacita.#1 Timo 1:20; Kulu 62:12; Loma 2:6 15Awebo ulyeelete kucenjela amuntu uyo ceebo makani ayo ngootushimikila, wakaapikisha abuumbi.
16Paciindi ndindakataanguna koomboloshekwa, taaku wakesa mukuncafwaako. Boonse bakampalangana. Lesa abalekelele! 17Sombi Mwaami wakalinga anebo akumpa nkusu kwaamba ayi nshimikile makani akwe cakumaninina ayi baswamashi bakunsengwe boonse banyumfwe. Aboobo ndakapuluka mukanwa ka nkalamu. 18Mwaami Lesa ulaakumfuna kuswa kububi boonse akundama ayi nkenjile muBweene bwakwe bwa kwiculu. Kuli nguwe akube bulemu lyoonse alyoonse! Ameni.
Kwaansha kwakweelaako
19Waanshe Pulisila aAkwila alimwi abamuŋanda yakwe Onesifolasi.#Mili 18:2; 2 Timo 1:16-17 20Elasitasi wakacaala muKolinto, alakwe Tulofimasi ndakamushiya muMiletusi ceebo wakalinga mulwashi.#Mili 19:22; Loma 16:23; Mili 20:4; 21:29 21Weeleshe cankusu kwisa mupewo kootana kushikila. Yubulasi, Pudensi, Linasi aKulodyasi bamwaansha pantu pomwi abashomi bamwi boonse. 22Mwaami abe awebo. Luse lwakwe Lesa lube amwebo noonse.
Currently Selected:
2 Timoti 4: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.