2 Timoti 2
2
Shilumamba mubotu wakwe Klistu
1Ono omwanaangu liyumyeyumye muluse ndootucite muli Klistu Jesu. 2Maswi oonse ngowakanyumfwa kuswa kuli ndime pameenso a bakamboni baanji, ukaabike mumaansa a bantu bashomeka kwaamba ayi abalo bakeeisheko bamwi.
3Kopengela pantu pomwi anebo mukuba shilumamba mubotu wakwe Klistu Jesu. 4Shilumamba pamulimo wakwe ulisuni kukondelesha mutanjilili wakwe. Aboobo taalinyonyonganyi mubuumi bwa baabo bateshi bashilumamba. 5Shilubilo taakoonshi kutambula cilambu na wabula kukonkela milawo ya kupingana uko. 6Mulimi wasebensa cankusu ngooelete kutambula shitaanshi sha bulimi. 7Ono yeeya pashintu nshentokwaamba ceebo Mwaami Lesa utookulengesha ayi ushinyumfwishishe.
8Ibaluka Jesu Klistu uyo wakabushikwa kuswa kubafu alimwi wakashalwa mulunyungu lwakwe Defedi, mbuli bwaamba Makani Abotu ngoonshimikila. 9Ceebo cakushimikila Makani Abotu, ndapenga akwaangwa ncetani bulya anga ngushikusotoka milawo, sombi maswi akwe Lesa taangitwe muncetani napaceyi! 10Aboobo ndatolelela mushintu shoonse ceebo ca bantu Lesa mbwaakasala kwaamba ayi abalo bakatambule lupulusho lwakesa kwiinda muli Klistu Jesu, ulo luleta bulemu butamaani.
11Ono ngaaya makani alushinisho,
“Na twakafwa anguwe,
tulaakunooli boomi anguwe.
12Na tutolelele kushoma,
tulaakweendelesha anguwe.
Na twamukaka,
alakwe ulaakutukaka.#Mate 10:33; Luka 12:9
13Na tatushomeki,
lakwe ulatolelela kushomeka,
ceebo taakoonshi kulikaka, sobwe.”
Musebenshi mubotu
14Ono koibalusha bantu maswi aya, akubacenjesha pameenso akwe Lesa ayi kabataambanini pamaswibo. Tacicafwi, sombi cilakolonganyabo batookutika. 15Koelesha cankusu ayi ulyaabe kuli Lesa, mbuli musebenshi usuminishikwa ucita mulimo utamulenshi nsoni, uyo wiisha ciluleme maswi a lushinisho. 16Koswa kumibandi iteshi ya buLesa alimwi aya buluya, iyo ilengesha bantu kusena kulaale aLesa. 17Kwiisha kwa mushobo uyo kuli anga ncipwaloonda cilya mubili woonse. Basankwa bobilo balinga kwiisha shintu sha mushobo uyo nguAimeneyusi aFiletasi. 18Bakashiya nshila ya lushinisho alimwi batooya cikolonganya lushomo lwa bashomi bamwi kwiinda mukunokwaamba ayi kubushikwa kwesu kwakuswa kubafu kwakacitika kale. 19Sombi lwiimbi luyumu lwakwe Lesa talukoonshi kutenkanishikwa alimwi palilembetwe maswi akwaamba ayi, “Mwaami ulishi baakwe,” alimwi ayi, “Uyo woonse waamba ayi uli mumaansa a Mwaami ulyeelete kucileka kucita shitaluleme.”#Shakube 16:5
20Muŋanda inene muli mbale shipusenepusene, shimwi nshasilifa shimwi nshagolodi, shimwi nshashisamu shimwi nshabulongo. Shimwi nshaciindi ceelete, shimwi shilasebenseshekwa lyoonse. 21Na muntu walisalasha akushiya shintu shitaluleme isho, ulaba mbuli cisebensesho ca ciindi ceelete mukwiinga walyaaba kuMwaami wakwe kwaamba ayi amusebenseshe mumicito ibotu ili yoonse. 22Ucileeke lunkumbwa lwa mubili lwa bwanike, ukonkelebo bululami, lushomo, lusuno aluumuno pantu pomwi abaabo basenga lucafwo kuMwaami Lesa amoyo utacite kampenda. 23Sombi ucileeke kupikishanya kwabuluya alimwi kwakubula lushibo ceebo ulishi ayi kulaletelabo kwaambana. 24Musebenshi wa Mwaami teelete kwaambana abantu. Ulyeelete kunyumfwa nkumbu kubantu boonse, kuba mufundishi wiisha kabotu camoyonteeka, 25muntu ulibombya pakulwiita beshikumupikisha, mukwishiba kwaamba ayi mpashi Lesa inga wabapa ciindi cakusanduka kuswa kushibiibi shabo akwishiba shalushinisho. 26Mpeeke maano abo alaakuboolaamo akusupuka mukoose ka Mubiibi uyo wakabacatisha akubalengesha kunoocita kweelana akuyanda kwakwe.
Currently Selected:
2 Timoti 2: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.