2 Makabisi 6
6
Mwaami wakalwiita baJuda kukonkela milawo yaciGiliki
1Ndyepakeenda ciindi ciniinibo, mwaami wakatuma munene umwi ku Atenesi ayi akalwiite baJuda bakashiya milawo ya bashalibabo, alimwi ayi abakashe kukonkela milawo yakwe Lesa yoonse. 2Alimwi wakamulwiita ayi babishe Ŋanda yakwe Lesa yaku Jelusalemu pakuyaamba ayi, Ŋanda yakupaililaamo ya Seusi waku Olimpya, alimwi akubisha Ŋanda yakwe Lesa yaku Gelisemusi pakucita ayi, Ŋanda yakupailaamo yakwe Seusi. Mubye Mweensu mbuli mbobasuni bantu wakweenka uko. 3Penkaapo shintu inga shabicila limwi. 4Batashomi bakafushaamo shabufuule ashibiibi muŊanda yakwe Lesa umo, kabasekana abanakashi bafuule mweenka umo, kabasekana abo mumusena usalalite ukashikwa. 5Pacipaililo apalo pakesulabo milambu iteelete, iyo milawo ikashikwa. 6BaJuda tebakalinga kusuminishikwa kulemenesha bushiku bwa Cibelu abwakusekelela bwabashalibabo, nabi kulyaamba ayi “Tuli baJuda” bakalinga kubakasha. 7Mweenshi uli woonse, wakwiibaluka kushalwa kwa mwaami, bakalinga kukakatisha baJuda kulya iyo milambu yakunsengwe. Palya pabushiku bwakusekelela bwa Diyonisusi balabakakatisha kweenda mumindando pakulemenesha Diyonisusi, kumitwi kabafwete mishini yamateu. 8Mukulwiita kwakwe Potolemeyusi, mwaami wakalwiita ndabala shaciGiliki shilya shakalinga pafwaafwi, ayi amwalo umo akakatishe baJuda kukonkela milawo yaciGiliki iyo akulyaabo milambu yabo. 9Wakabaambila ayi bacaye boonse batookaka kukonkela milawo yaciGiliki. Balyeelete kwishiba ayi cintu ciloondesha cinene cilipafwaafwi.
10Kweelanisha, banakashi bobilo bakabacata paceebo cakupalula banababo. Bakabeensha mundabala yoonse, banababo bakabaangilila nkolo shabo. Lyalo bakayaabo kumulyango wandabala, akubawaala paanshi. 11Ciindi cimwi bantu bamwi bakakumana pantu pomwi mushicengo pafwaafwi, ayi balemeneshe bushiku bwa Cibelu mukuyuba yuba. Bamwi bakabaluula kuli Filipo, boonse bakabatenta kabali boomi pantu pomwi. Paceebo cakulemeka bushiku bwa Cibelu, tabakwe kucitaawo shitaala ayi balifuune.
Lesa ulaabapensha alimwi ulaabacitila nkumbu
12Ntoosenga ayi woonse eshi akabelenge libuku ili atabishi moyo pakunyumfwa mapesho aya, sombi ayeeye ayi lupesho ulo lwakatushikila, teeshi lutunyonyoole, nkwaambabo ayi tubambe mushobo wesu. 13Ncitondesho cankumbu shinene kumupensha bwangu muntu shikubisha, kutamulekelela ciindi cilaamfu. 14Mwaami Lesa na kaasuni kupensha bantu bamishobo imwi, ulataanguna walindila kushikila shibiibi shabo shashika amposheela. Sombi swebo tatuciti isho. 15Ono kulindiswe taaciti boobo pakwiinga taasuni kulindila ayi shifulishe shibiibi shesu. 16Paceebo ceeco taasuni kutulekelesha. Nabi atupensha takoonshi kutushiya. 17Ishi shentokwaamba shibe anga ciibalusho. Ono ntokwaamba makani esu.
Kucaikwa kwakwe Elyasa
18Elyasa wakalinga womwi wabafundishi bamilawo, muntu munene wampuuwo. Bakamucenamuna ayi bamulishe nyama yankumba. 19Ono lakwe wakasalawo kufwa mubulemu, kutaba abuumi bwa shibiibi, paceebo ceeco wakaishipa nyama iyo, walitola mwiine kumusena wakupensheshako bantu. 20Wakatondesha mbuli bantu bayumu myooyo mbobeelete kucita. Kukaka kulya shitasuminishikwi kwiinda kupulusha buumi bwabo. 21Munene ushikubona shakulya sha milambu ibiibi iyo abo kalekale bakalinga kunyumfwana a Alyasa bakamutola palubasu akumwaambila ayi ese ayo nyama yakwe isuminishikwa, ono pakulya ucite anga utoolya nyama itasuminishikwa ilya, mbuli mwaami mbwaakakwaambila. 22Wakamwaambila sheenka isho ayi atacaikwi kwaamba ayi apuluke paceebo cabucibusa cabo cakalekale.
23Ono lakwe wakasala kukonkela nshila ya bulemu, pakwiinga wakalinga muntu washaaka shiinji mucembele ucite bulemu amfwi shakwe kaacita shibotu sheenka sheenka kuswa kubwanike bwakwe, shikulama milawo isalalite yakwe Lesa. Lakwe wakakumbula bwangu ayi “sobwe amuncayebo.” 24Lyalo wakeendilila kwaamba ayi, “Swebo sobamyaaka iinji tatweelete kubeca bamwi. Taceelete kwaamba ayi basankwa baanji kabayeeya ayi Elyasa muntu washaaka 90, wakasoweka akukonkela kulambila kweensu. 25Paceebo cabubeshi bwangu, ayi kaancilyaabo buumi bwacalaako cilakundetela nsoni abunene bwangu, alimwi abasankwa baanji inga ndabalubya. 26Nebo nabi mpuluke bulya kumapesho abantu, nshikoonshi kushiya Shinkusu Shoonse, nabi kandi muumi nabi mfwe. 27Paceebo ceeco, na nshiyane abo buumi ubu amoyo uyumu ndaakuba mucembele wabulemu, 28lyalo ndaakushiila basankwa ceendo cibotu ndakufwa abulemu, bwakusuna abwakusumina neenka, paceebo camilawo yesu isalalite ayabulemu.
Ndyaakamana kwaamba maswi eenkayo, wakaya eenka kumusena wakauminwako bantu. 29Bantu balya bakamucitila nkumbu pakutaanguna bakasanduka akuba balwani bakwe, pakwiinga balo bakayeeya ayi maswi ngaamba ayo ngabuluya.
30Kaali pafwaafwi kufwa amapesho ayo, lakwe wakalila ayi, “Mwaami Lesa wamaano asalalite abone patuba ayi, nabi nendakayanda nendakacica lufu, ndakashibila kunyumfwa shicisa mumubili wangu pakunguma misako, ono ndeshibila akukondwa mumoyo wangu, paceebo cakuloonda Mwaami Lesa.” 31Muntu uyo wakafwa bweenka ubo, ono pakufwa uko wakatondesha nshila ibotu teeshibo kubasankwa beenka, sombi akubantu bamushobo wakwe akuyuma moyo cabwikaalo bubotu.
Currently Selected:
2 Makabisi 6: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.