2 Makani 36
36
Jeowasi mwaami wa bene Juda
(2 Baami 23:30-35)
1Lyalo bene Juda bakasala Jeowasi mwanaakwe Josiya ayi apyane bwaami bwa baishi muJelusalemu. 2Jeowasi wakaba mwaami wa bene Juda kaacite myaaka makumi obilo amyaaka yotatwe. Wakalela muJelusalemu kwamyeenshi yotatwebo. 3Lyalo Neko mwaami wa bene Ijipiti wakamucata busha akulengesha bene Juda ayi balipile makilogilamu a silifa ali 3,400 alimwi amakilogilamu a golodi ali 34 ayi ngumusonko. 4Kuswawaawo Neko wakasala Eliyakimu mukwabo Jeowasi ayi abe mwaami wa bene Juda abene Jelusalemu. Mpeeke liina lya Eliyakimu wakalicaya akumupa lya Jeoiyakimu. Ono mwaami Neko wakatola Jeowasi kuIjipiti.
Jeoiyakimu mwaami wa bene Juda
(2 Baami 23:36—24:7)
5Jeoiyakimu wakaba mwaami wa bene Juda kaacite myaaka makumi obilo amyaaka yosanwe. Wakalela muJelusalemu kwamyaaka likumi awomwi. Lyalo wakabishisha Mwaami Lesa, Lesa wakwe. 6Kuswawaawo Nebukadinesa mwaami wa bene Babiloni wakesa mukulwana cishi ca Juda, wacata busha Jeoiyakimu akumutola kuBabiloni kaangitwe ancetani sha bulonse. 7Lyalo Nebukadinesa wakayumuna shintu shimwi shamakwebo sha muŊanda yakwe Lesa akuya mukushibika muŋanda yakwe ya bwaami mucishi ca Babiloni. 8Shintu shimwi shoonse shakacita Jeoiyakimu kubikaawo amicito ilensha bunya abubi mbwaakacita, shililembetwe mulibuku lya buumi bwa bamaami ba bene Isilaeli abene Juda. Lyalo Jeoiyakini mwanaakwe ngowakapyana bwaami bwakwe.
Jeoiyakini mwaami wa bene Juda
(2 Baami 24:8-17)
9Jeoiyakini wakaba mwaami wa bene Juda kaacite myaaka likumi amyaaka yosanwe ayotatwe. Wakalela muJelusalemu kwamyeenshi yotatwe anshiiku likumi. Alakwe wakabishisha Mwaami Lesa. 10Mpeeke kumatalikilo amwaaka umwi mwaami Nebukadinesa wakatola busha Jeoiyakini kuBabiloni. Wakabwesa ashintu shamakwebo kuswa muŊanda yakwe Lesa akushitola kuBabiloni ashalo. Nebukadinesa wakabwesa Sedekiya shimishaabo Jeoiyakini akumubika pabwaami bwa bene Juda abene Jelusalemu.#Jele 22:24-30; 24:1-10; 29:1-2; Ese 17:12; Jele 37:1; Ese 17:13
Sedekiya mwaami wa bene Juda
(2 Baami 24:18-20; Jele 52:1-3a)
11Sedekiya wakaba mwaami wa bene Juda kaacite myaaka makumi obilo amwaaka womwi. Wakalela muJelusalemu kwamyaaka likumi awomwi.#Jele 27:1-22; 28:1-17 12Alakwe wakabishisha Mwaami Lesa alimwi taakwe kunyumfwila Jelemiya mulaluki uyo wakaamba maswi a Mwaami Lesa.
Jelusalemu mboyakanyonyoolwa
(2 Baami 25:1-21; Jele 52:3b-11)
13Kuswawaawo Sedekiya wakabukila mwaami Nebukadinesa uyo wakamukakatisha kushomesha cakulumbila muliina lyakwe Lesa kwaamba ayi ulaakunooshomeka kuli nguwe. Wakaba acimpamya akukaka kusandukila kuMwaami Lesa, Lesa wa bene Isilaeli. 14Kwiilika waawo, bamatanjilili boonse ba bapailishi abene Juda bakalinga kuya ciindaawo kutashomeka ceebo cakukonkela micito ilensha bunya ya mishobo imwi. Mukucita boobo, bakalengesha Ŋanda yakwe Lesa, iyo njaakasalasha muJelusalemu, kuba itasalalite kweelana aMilawo. 15Mwaami Lesa, Lesa wa bamashali babo, wakatolelela kutuma balaluki kwaamba ayi bacenjeshe bantu bakwe. Wakacita boobo mukwiinga wakanyumfwila nkumbu bantu bakwe aŊanda yakwe. 16Sombi balo bakalinga kuseka beshinkombe bakwe, kusebaanya maswi akwe akucobola balaluki bakwe kushikila basonkomona bukali bwakwe cakwaamba ayi kwakabula apakucicila.
17Lyalo Mwaami Lesa wakaleta mwaami wa bene Babiloni ayi abalwaane. Mwaami uyo wakacaya basankwa bacikula bwangu amipeeni muŊanda yakwe Lesa. Taakwe kushiyaako mwanike nabi munene, musankwa nabi mwanakashi. Ncakwiila Lesa wakaaba boonse mumaansaakwe Nebukadinesa. 18Nebukadinesa wakasaala shintu sha muŊanda yakwe Lesa, sha mucipinda cakusungilamo buboni ca Ŋanda yakwe Lesa alimwi abuboni bwa mwaami abwa bacinenenene bakwe akushitola kuBabiloni. 19Wakatenta Ŋanda yakwe Lesa akupwaya lubumbu lwa Jelusalemu. Wakatenta amaanda abwaami oonse akunyonyoola shintu shoonse shamakwebo. 20Wakatola boonse abo bakacaalaawo kuBabiloni uko nkobakaya mukuba basebenshi bakwe abasebenshi ba bamulunyungu lwakwe kushikila bwaami bwa bene Pesha ndibwakaba ankusu. 21Lyalo ico ncaakaamba Mwaami Lesa kwiinda mumulaluki Jelemiya cakacitika cancinencine. Jelemiya wakaamba ayi, “Cishi cilaakucaala mumatongo kwamyaaka makumi osanwe aobilo kwaamba ayi myaaka yasanu ayobilo yakookesha iyo njebatakwe kookesha ikwanine.”
Sailasi mbwaakacafwa bene Juda kuboolela kuJelusalemu
(Esila 1:1-4)
22Mumwaaka wakutaanguna wa bwaami bwakwe Sailasi mucishi ca Pesha, mukulengesha maswi a Mwaami Lesa ayo akaamba Jelemiya kucitika cancinencine, Mwaami Lesa wakaambila Sailasi ayi aambilishe mulawo uyo alimwi akuulemba ayi ubelengwe mubwaami bwakwe boonse. 23Wakalemba ayi, “Uku nkokwaamba kwangu nebo neSailasi mwaami wa bene Pesha. Mwaami Lesa, Lesa wa kwiculu, wampa nkusu shakulela cishi ca panshi coonse alimwi ashakuyaka Ŋanda yakwe muJelusalemu mucishi ca Juda. Ono noonse nobantu bakwe Lesa, mulyeelete kuya kooko alimwi Mwaami Lesa, Lesa wanu abe amwebo.”#Isa 44:28
Currently Selected:
2 Makani 36: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.