1 Makabisi 8
8
Judasi mbwaakapangana aba Loma
1Judasi wakanyumfwa mpuuwo yaba Loma, ayi bakalinga kucite beshilumamba bayumu abuumbi, alimwi bakalinga kunyumfwila nkumbu boonse abo basuni kucita cibusa ambabo. Wakanyumfwa alimwi ayi baLoma bakalinga kucita cibusa amuntu uli woonse wenga wesa kuli mbabo. 2Wakanyumfwa alimwi ayi mbashinkusu abuumbi. Bantu bakamulwiita nkondo shobakakoma kubonesha buyumu bwabo, isho shobakalwana abene Gauli, ambuli mbubakabakoma akubasonkesha. 3Wakanyumfwa asheesho shobakacita kuSipeni, ciindi ndyebakabanyaya migodi ya silifa agolodi yakweenka uko. 4Wakanyumfwa ayi ba Loma abo, ceebo camaano abo akukalika caamba bakakoma cishi coonse nabi ca kulaale akumishaabo. Cintu comwi abamaano bakesa kuswa kumeelelesho a cishi capaanshi kwisa mukulwanaabo, baLoma bakabakoma akubanyonyweetabo limwi lyalo abo bakacaala muli mbabo bakalinga kusonka misonko mwaaka uli woonse. 5Kwakalinga Filipo aPesiyasi bamaami bakuKitimu ababyaabo bamwi, abo bakabukila baLoma ayi balwane abo. Boonse aba bakakomwa. 6Antyokusi munene, mwaami waku Silya uyo wakalwanaabo kacite nsofu 120 abeshilumamba beshikweendela pamaaki, shikoci, pantu pomwi a likoto lyabeshilumamba linene, alakwe bakamukoma. 7Bakamucata kaali muumi, akumukakatisha lakwe pantu pomwi abaabo beshibakenjile mubwami pesule lyakwe kusonka musonko unene, bakalola bantu kwaamba ayi cibe cakucatilisha kuswawaawo bakamunyaya musena imwi ibotu abuumbi mucishi cakwe, 8mbuli Indya, Mediya alimwi aLidiya, akushipa mwaami Yumenesi.
9BaGiliki abalo bakayeeya shakubanyonyoola baLoma. Sombi ndyebakanyumfwa, 10bakatuma mutanjilili munene womwi wabeshilumamba. Lakwe wakalwanaabo, akucaya bantu baanji. Wakabwesa bamakaabo abanababo akubatola mubusha. Wakabanyaya buboni bwabo, wakanyonyoola cishi cabo akupwayoola misumba yabo yankondo. Wakabacita busha kushikila asunu. 11Bantu bamushishi shimwi abaabo boonse bakaalabo mumusumba bakalwanaabo, bakabakoma akubacita busha.
12Sombi babyaabo, abaabo boonse, abaabo babatambula, balabalama kabotu. Bakakoma bamaami bapafwaafwi abakulaale koonse, aboobo bantu boonse bakanyumfwa mpuuwo yabo, bakaba aboowa. 13Boonse abo baLoma mbobasuminisha kuba baami, bakalinga kuba baami cancinencine, alimwi bakalinga kukusha mwaami pa cuuna mbuli mbobasuni. Nkusu shabo abulelo bwabo shakalinga kushibikitwe pa cishi coonse capaanshi. 14Sombi pakati kabo tepakalingaawo nabi womwi wakafwala mushini wabwaami, nabi kufwala shisani shifebeluka kubonesha kukoma kwabo. 15Bakapanga likoto lyabacinenenene 320. Aba bantu lyoonse bakalinga kubandika makani akumite bantubabo, mbuli mbobakonsha kubalela kabotu. 16Mwaaka amwaaka bakalinga kupa nkusu kumuntu womwi eenka ayi anoolela akutanjilila cishi coonse. Boonse bakalinga kumunyumfwila muntu uyo, lyalo tekwakalinga wakalinga kumucitila munyono.
Kunyumfwana kwa ba Juda abaLoma
17Judasi wakasala Yupolemusi, mwanaakwe Joni wamumukowa wa Akosi, alimwi a Jasoni mwanaakwe Elyasa, akubatuma ku Loma ayi bakapangane abo cibusa. 18Wakalinga kusuni ayi bafune kumapesho ngobakalinga kucite, ceebo ba Giliki bakalinga kupensha bene Isilaeli akubacita busha. 19Lyalo bobilo abo bakaya kuLoma, alimwi lweendo lwabo lwakalinga lwanshiku shiinji. Ndyeebakanjila mulikoto lya bacinenenene balya bakaamba maswi abo ayi, 20“Judasi Makabisi abamakwabo, pantu pomwi abaJuda boonse, bakatutuma kuli ndimwe, ayi tucitaanu cipangano caluumuno alimwi ayi tulembwe pantu pomwi abantu mbomucitenaabo cibusa.” 21Maswi ayo akababotela bacinenenene. 22Ono ngaaya maswi ayo baLoma ngobakalemba pa libwe lya bulonse akwaatumisha kuJelusalemu, ayi bube mbobukamboni bwa luumuno a lunyumfwano abene Juda.
23Bakalemba ayi:
“BaLoma abaJuda banookala muluumuno ciindi coonse pa lweenge amucishi! Nkondo ibabete kulaale, alimwi balwanibabo batabaseni pafwaafwi. 24Na baLoma bataanguna kuya munkondo nabi mbobanyumfwanaabo, mpaashi muntu uli woonse uli mubulelo bwabo, 25likoto lyabene Juda lilaakubacafwa amoyo woonse bweenka mbweshishikanobete ciindi ico. 26Tabeelete kupa wiiti shilwanyo, maali nabi maato kubalwani babaLoma, pakukonkela milawo ya baLoma. Lyalo baJuda balyeelete kukonkela milasho yabo kwakubula coolola maansa. 27“Bweenka ubo na baJuda mbobatalika kuba ankondo, baLoma balakulwana nkondo pantu pomwi abaJuda, bweenka mbweshi cikanoobete ciindi ico. 28BaLoma teshi bakabe wiiti kubantu banyumfwana abalwani babaJuda, shilwanyo, maali nabi maato, kubalwani babaJuda, milawo yabaJuda. Lyalo baLoma balakukonkela milasho yabo kwakubula coolola maansa. 29“Aya ngomakani a Cipangano ico baLoma ncobakapangana abaJuda. 30Sombi na pesule baLoma abaJuda basuna kunungaawo maswi amwi, nabi kukushaawo maswi amwi, balakucita ubo kwakubula makatasho aboobo shili shoonse isho sheeshi bakanungeewo nabi kukushaawo balakunooshikonkela anga cipangano ceenka ico. 31“Kumakani amwaami Demetiliyasi ngakashupa baJuda, twamulembela maswi aya akwaamba ayi, ‘Ceebonshi utoopensha baJuda, alijoko lyako mukwiinga boonse abo mbeshi cibusanyineesu. 32Bakatutongookela mbuli shotoobacita, tulakubacafwa bweenka mbokweelete, lyalo tulakulwana awebo palweenge nabi pa mulundu.’ ”
Currently Selected:
1 Makabisi 8: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.