1 Makabisi 16
16
Banabakwe Simoni mbubakakoma Kendebeyusi
1Joni wakaswaako kuGesala akuya mukushibisha beeshi ba Simoni isho Kendebeyusi shakalinga kucita. 2Lyalo Simoni wakeeta banabakwe bakwiiya bobilo, Judasi aJoni, akubaambila ayi, “Nebo abamakwesu, pantu pomwi amukowa wabata, twekala katulwanina bene Isilaeli nkondo kuswita kubwanike bwesu kushikila sunu. Shoonse shotwakacita shakatweendela kabotu, ncakwaamba ayi twakafuna bene Isilaeli mushiindi shiinji. 3Sombi nebo ono ndacembela, lyalo mwebo, munkumbu shakwe Les, mwakuula. Amubwese musena wangu awabamakwesu. Kamuya mutanjilile mushobo wanu kulwana. Lucafwo luswita kwiculu lutooba amwebo.” 4Mpomunyaawo Joni wakasala beshilumamba balwanina paanshi 20,000 abamwi abo beshikulwanina pamaaki. Boonse bakanyamuka kuya mukulwana aKendebeyusi. Bakoonena kundabala yaku Modeyini. 5Ndibakabuka macuunsa bakaya kucinyika. Peenka apo bakabona likoto linene lyabalwani beenda paanshi abaabo balwanina pamaaki batoosa mukukumanaabo. Sombi pakati kabo pakalinga mulonga. 6Joni abeshilumamba bakwe bakayaka misumba yankondo kelangene abalwanibabo. Lyalo ndyaakabona ayi beshilumamba bakwe batoloonda kusubuka mulonga, lakwe wakatalika kusubuka. Bantu bakwe ndibakamubona, abalo bakasubuka mwisule lyakwe. 7Wakapansaanya likoto lyakwe mushipansha shobilo, wakabika beshikulwanina paanshi, ceebo balwanibabo beshikulwanina pamaaki bakalinga baanji. 8Lyalo wakalisha mapeenga ankondo. Mpomunyaawo Kendebeyusi pantu pomwi a likoto lyakwe lyabeshilumamba bakacica. Baanji bakacaikwa, bakapuluka bakacicila kulubumbu. 9Bushiku bweenka ubo Judasi, mukwabo Joni, wakayaswa, sombi Joni wakabakonkela balwani abo kuya mukushika kuKediloni, ndabala iyo njakayaka Kendebeyusi. 10Bashikucica abo bakalicalila muŋanda ilaamfu yankondo ibete mumyuunda yaku Ashidodi. Joni wakeetenta ndabala iyo, ncakwaamba ayi bantu 2,000 bakacaikwa. Kuswawaawo Joni wakaboolela kuJuda muluumuno.
Pitolemiyesi mbwaakacaya Simoni
11Pitolemiyesi mwanaakwe Abubusi, wakasalwa kuba mutanjilili wabeshilumamba bakalinga kuCinyika cakuJeliko. Bakalinga kucite golodi asilifa uunji, 12ceebo wakalinga mukwe wakwe Simoni, Mupailishi Munene. 13Wakatalika kulisumpula. Wakalinga kusuni kuba mwine cishi, aboobo wakayeeya kucaya Simoni abanabakwe munshila yakubayubilila. 14Simoni ndyaakalinga kuya bwendeenda mundabala shabene Juda, ayi akabone shintu shobasuni, bushiku bumwi wakashikila kuJeliko pantu pomwi abanabakwe, Matatiyasi aJudasi, mumwaaka wa 177, mumweenshi waShebati, nkokwaamba ayi mweenshi wa likumi awomwi. 15Mwanaakwe Abubusi ulya wakabacenjelela, akubatambula mukabuumbu keetwa ayi Doki, uko nkakayaka. Wakababambila shakulya kweenka uko, kumwi kaali washisamo bantu. 16Simoni abanabakwe ndibakakolwa, Pitolemiyesi abantu bakwe bakayubuluka, babwesa shilwanyo shabo akusotokela Simoni kasangalete. Bakamucaya pantu pomwi abanabakwe bobilo balya abacikula bwangu bamwi. 17Aboobo bakacita cilubo cinene abuumbi, kuleta shibiibi mumusena washibotu.
18Lyalo Pitolemiyesi wakalembela mwaami akumulwiita sheenka ishi, wakasenga ayi mwaami amutumine beshilumamba bese bamucafwe, alimwi ayi amupe cishi cabene Juda andabala shancico. 19Wakatuma bantu bamwi ku Gesala kuya mukucaya Joni. Wakalemba makalata kubacinenenene babeshilumamba ayi bese batambule silifa agolodi ashipo shimwi. 20Wakatuma abamwi bantu ayi baye akanyaye Jelusalemu akalundu ka Ŋanda yakwe Lesa. 21Sombi muntu umwi wakatanjila akuya mukushibisha Joni, uyo wakalinga kwikala kuGesala, ayi beeshi abakwabo bacaikwa, lyalo Pitolemiyesi watuma beshilumamba bakwe ayi bese bamucaye. 22Ndyaakanyumfwa sheenka ishi, Joni wakapenshekwa mumuyo wakwe. Wakabacata bantu bakesa ayi bamucaye, wakabacaya, ceebo wakeshiba ayi balisuni kumucaya.
23Milimo imwi yakwe Joni kuswa ciindi ndyaakabwesa musena bwabeeshi anga Mupailishi Munene, mbuli shankondo, milimo njakacita, kuyaka ndabala ashintu shimwi, 24shoonse ishi shakalembwa mulibuku lya bupailishi bwakwe, kuswita ciindi ndyaakaba Mupailishi Munene mumusena wabeeshi.
Currently Selected:
1 Makabisi 16: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.