1 Baami 21
21
Muunda wa minyansa wakwe Naboti
1Ono kwakalinga musankwa umwi wakalinga kwiitwa ayi Naboti mwine Jesiliilu. Musankwa uyo wakalinga kucite muunda pafwaafwi aŋanda yakwe Aabu mwaami wa bene Samaliya. 2Bumwi bushiku Aabu wakaambila Naboti ayi, “Mpebo muunda wako wa minyansa mukwiinga uli pafwaafwi aŋanda yangu. Ndisuni kwaamba ayi nkashangeemo bucisa. Ndaakukupa muunda wa minyansa wiindaawo kubota pamuunda wako. Ono na koosuni inga wangulisha pamweelo uli woonse ngoosuni.” 3Sombi Naboti wakakumbula ayi, “Muunda uyu ndakashiilwabo kubamashali bangu bakulukulu alimwi Mwaami Lesa atansuminishi kwaamba ayi mupe muunda uyu!”
4Lyalo Aabu wakaya kumishaabo kaalisukeme alimwi kaaungumene abuumbi. Wakakalala abuumbi pamakani ayo Naboti mwine Jesiliilu ngaakaamba kuli nguwe. Wakashika woona pabulo bwakwe, walanga kulubumbu akukaka kulya.
5Jesebelo mukaakwe wakaya kuli nguwe akumwiipusha ayi, “Ino mwoongumana buyani? Ino mwakakilanshi kulya?” 6Wakakumbula ayi, “Ceebo ca sheesho shankumbula Naboti mwine Jesiliilu. Ndalinga ndamwaambila ayi ngule muunda wakwe wa minyansa nabi kumupetaamo muunda umwi. Sombi lakwe wakaka shoonse!”
7Mpomunyaawo Jesebelo mukaakwe wakaamba ayi, “Sa mwebo tamushi baami ba cishi ca Isilaeli? Amubuke, musangalale akulya! Nebo ntoomubwesela muunda wa minyansa wakwe Naboti mwine Jesiliilu.”
8Mpeeke Jesebelo wakalemba makalata wabikaawo aliina lyakwe Aabu, wacala akalamatila wa mwaami akutumina bamaloba abacinenenene bene Jesiliilu. 9Munkalata yomwi yomwi wakalembaamo ayi, “Amubambe bushiku bwakulikasha kulya. Kuswawaawo mukeete bantu boonse akupa Naboti cuuna ca bulemu. 10Mubike basankwa beshishimfulunganya bobilo kwikala kabalangene anguwe kwaamba ayi bamubekeshe ayi wakashingana Mwaami Lesa alimwi amwaami wa cishi. Lyalo mumukusheewo akumutola kunsengwe lya ndabala mukumuuma mabwe akumucaya.”
11Bamaloba bacinenenene bene Jesiliilu bakacita bweenka bwakabalwiita Jesebelo mumakalata. 12Bakasala bushiku bwakulikasha kulya, bakeeta bantu boonse akwikalika Naboti pacuuna ca bulemu. 13Lyalo basankwa beshishimfulunganya bobilo abo bakekala kabalangene anguwe akumubekesha ayi wakashingana Mwaami Lesa alimwi amwaami wa cishi. Lyalo bakamukusha mundabala akumucaya kumabwe. 14Lyalo nkombe yakatumwa kuli Jesebelo ayi, “Naboti twamucaya amabwe.”
15Mpomunyaawo Jesebelo ndyaakatambulabo makani akwaamba ayi Naboti mwine Jesiliilu wacaikwa amabwe wakalwiita Aabu ayi, “Naboti ulifwite. Ono kamuya mukabwese muunda wakwe wa minyansa uyo ngwaakalinga akaka kumuulisha.” 16Paciindi ceenka ico Aabu wakaya mukubwesa muunda uyo ayi ube waakwe.
17Mpomunyaawo Mwaami Lesa wakaambila Elija mulaluki mwine Tishibe ayi, 18“Koya kumwaami Aabu wa kuSamaliya. Utooya umucane mumuunda wa minyansa wakwe Naboti. Ulisuni kuubwesa ayi ube waakwe. 19Uye umwaambile ayi Mwaami Lesa waamba ayi, ‘Ndiwamana kucaya muntu uyo, sa ulisuni kubwesa amuunda wakwe?’ Lyalo umulwiite ayi, ‘Pamusena apo peenka bakabwa mpobakamyangutila bulowa bwakwe Naboti, awebo bulowa bwako mpweshi bakabumyangutile.’ ”
20Lyalo Aabu ndyaakabona Elija wakaamba ayi, “Sa te wancanikisha kale omulwani wangu?” Elija wakakumbula ayi, “Ee, ndamucana, mwebo nomucilibengetebo kukucita shintu shibiibi pameenso a Mwaami Lesa. 21Aboobo Mwaami Lesa wakwaambila ayi, ‘Ndaakuleta shinkunka pali ndiwe. Ndaakukunyonyoola pantu pomwi abana bako basankwa boonse, bamanene abanike. 22Bamuŋanda yako balaakuba anga mbamuŋanda ya mwaami Jeloboamu mwanaakwe Nebati alimwi anga mbamuŋanda ya mwaami Baasha mwanaakwe Aija, mukwiinga webo wasonkomona bukali bwangu mukulengesha bene Isilaeli kubisha.’ 23Ono pali Jesebelo, Mwaami Lesa waamba ayi, ‘Bakabwa balaakulya mubili wakwe mundabala ya Jesiliilu.’#2 Baami 9:36 24Wamuŋanda yako uli woonse weshi akafwite mundabala inene ulaakulikwa kubakabwa, alimwi uyo woonse weshi akafwite muliwesa ulaakulikwa makubi.”
25Takuna kubawo kale muntu wakalibenga kucita shintu shibiibi pameenso a Mwaami Lesa mbuli aAabu. Wakalinga kucita boobo kwiinda mukulwiitikwa kuli Jesebelo mukaakwe. 26Aabu wakacita shibiibi shilensha nsoni pakunoolambila shibumbwabumbwa mbuli mbobakalinga kucita bene Amoli abo mwaami Lesa mbwaakatanda mucishi, bene Isilaeli ndibakalingabo kwinjilaamo.
27Ono Elija ndyaakamana kwaamba, Aabu wakakwamoona shakufwala shakwe akufwala masaka. Wakalikasha kulya akutalika koonabo mumasaka alimwi kaaenda kaaungumene alimwi cabuumba.
28Lyalo Mwaami Lesa wakaambila Elija mulaluki ayi, 29“Sa wamubona Aabu mbwaalyungumika kuli ndime? Ono mbwaacita bobulya, teshi nkalete shinkunka isho kaacili muumi. Ndaakushileta ciindi mwanaakwe aakunoolela.”
Currently Selected:
1 Baami 21: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.