Romeŋ 2
2
Sariya dzerey ana ma Bay ma Bəla
1Kah ana tok, a da safəmaka ha yam kakay, kwa kah ka key way way na, kah ndaw me key sariya ka ndaw ana na. Hərway ka key sariya ka ndaw na, ka key na ka dzuwey bay 'ar ma vaw ɗek ana, hərway kah ana ka key aha andza ha tiyatsa, kah ndaw me key sariya na na. 2Hərway la səradakwa, sariya ma Bay ma Bəla na, a ka na da dərka, ka ndaw ma kam tek andza na ŋga na hay na. 3Aŋga dzala ɗagay, kah ndaw ma key sariya ka ndaw ma kam tek andza na ŋga na na hay na, kah ana ka key andza ma ta satsa na, ka kah na, ka da ləhey da har ma sariya ma Bay ma Bəla ɗaw? 4Tsukuɗu ka key na ka rəsa zleley ma kokwoɗ aŋga, ma me zəgey mevel aŋga, ma ma wurey har aŋga a ndaw, mandzara kah ka sərafa, kokwoɗ aŋga na na, a dahəɗaka a ma mbəɗada mendzey ɗek kakay ɗaw? 5Ta 'ar eɗek ana təɗo təɗo na, ta mevel eɗek a neney ma mbəɗey tikay ana, ka key na ka tsəhey zleley ma me tsey mevel, ka pas ma me tsey mevel, pas ma Bay ma Bəla ma da ɓadərawa sariya ŋga dzerey aha na. 6Na ma da vəladatara tek ka ndaw ka ndaw, andza ma mber aŋga ma kawa na. 7mendzey me ndəvey kakay ana na, a ndaw ta matanduroŋ ata ma key ka tek hayna hay, na ma səpam maram, me hesəkey bəzay ta mendzey me mətsey tikay ana. 8Ama mevel ma tsar ta ma kəla ’ar aha ka ndaw ma bəra na hay, ma tsənamar sləmay a dərka na kakay ana hay, ma kam tek ma dzerey kakay ana. 9Banay, ta ma tuway, ka mendzey ma ndaw ma key tek haya kakay ana hay, ka mey na Zuif hay, arka Grek hay tok. 10Me wezley dey, ɗuhwaha ta zozoy, kwa a way way me key tek hayna hay, ka mey na ma Zuif hay, arka na a Grek hay. 11Hərway Bay ma Bəla na a weley ndaw tikay. 12Mendzey ma ndaw ma ŋgəsam mandzara ka səradama mewey ana na, a da zəɗam na, mandzara mewey tiyatsa. Ama mendzey ma ndaw ma ŋgəsam da mewey na, a da kadəmatara sariya ta na na, ta mewey ana tey. 13Ma da tərey ndaw dzerey ahiya ka slam dey ma Bay ma Bəla na, ndaw ma dzəkafama sləmay ka mewey ana hay kakay. Ndaw ma da tərey dzerey ahiya na ndaw ma kadama mber ana hay. 14Kendzey ndaw Zuif ahiya kakay ana hay mewey ta dakay ana a kam tek na mewey me ləvey ana na, ma ndzaya na mewey ahiya ka ’ar vaw ta na, taya aŋga na mewey ta dakay ana. 15A ɓadama na mber ma Mewey ma wuɗey ana na, ma winda ha da mevel ata na, mezek ata na a ka sedewe na andza ha tsa, kəɗey na sariya ta na da mevel ata na na, a tewey a madatara malay, dakay na a dzaŋgərafata. 16Na ma da bawa ta pas ana, andza ma Mey Wayna ɗaw, Bay ma Bəla a da kadatara sariya ma tek ma ndaw ma kəzlaya da mevel ana hay, ta har ma Yezu Kriste.
Ma tsəney sləmay kakay ana ma Israyel
17Ama haɗaw kah ma zələmaka ndaw Zuif ana, kah ma pa ’ar aha ka mewey, kah ma pada me ŋgelekey ɗek ka Bay ma Bəla ɗek. 18Kah a neney ma sərada tek aŋga ma wuɗey ana, kah na ma saɗəka ha ta mewey, ma sərada me weley na hayna. 19Kah na ka sərada vaw ɗek, ɗa ma kəlatar ka mey a ndaw wulaf ana hay, kah waw ma nəkey dey ma ndaw da ləvaŋ ana hay. 20Kah na, ndaw ma seɗəkey ndaw ma səradama tek kakay ana hay! Ayaw, kah na miter ma ndaw tedehe na hay, kavəday da mewey na, ka slafərawa ma badərawa ma sərey tek ta dərka. 21Ayaw tok! Kah na ndaw ma tetəkey ndaw sana, kah ana na ka tatəkada bay ’ar ma vaw ɗek ana tikay ɗaw? Ka ləvatar a ndaw hay ka hulam zlay tok na, kah ana na, ka huley! 22Ka tatəkadata ndaw hay ka kam madama zlay, kah ana na ka key madama! A saka kah ka nəkadata ’ərlam so na hay kakay, amana ka hulawa da 'ay ma kuley ta na hay! 23Ka pada meŋgelekey ɗek na a mewey, arka ka par hwaray a dey a Bay ma Bəla ta tek eɗek ma key mewey ma wuɗey kakay ana sa! 24Akwa na andza na ma winda ha da ɗeriwel Kokwoɗ ana: «Mezəley ma Bay ma Bəla ma tsaɗa ha hərway kwar, da walaŋ ma ndaw Zuif ahiya kakay ana hay.» 25Waway kava dakay, ma sley kuɗey na haya ha haɗaw ka kada ha mber ta mewey ana na, ama haɗaw ka key tek ma mewey me wuɗey kakay ana na, ta me sley kuɗey ɗek ana dzay na, kah na andza ndaw ma sla kuɗey aha kakay ana. 26Haɗaw ndaw ma sla kuɗey kakay aha, a kata ha tek ma mewey ana, ma sla kuɗey ŋga na kakay ana na, a da mbəslama na andza ma sla kuɗey aha, kiɗaw? 27Ŋga na hana ma sla kuɗey aha da slaw vaw tikay ana, a ndaslada ha mewey na, a da kadaka sariya ɗek, kah a neney ma sərada mewey ma winda na, ma sla kuɗey aha na, ma key tek andza ma mewey kakay ana na. 28Akwa na, ma tərada ndaw Zuif aha na, tek ana ma nəkey ana kakay, kwa vavay mbəlek ana ka vaw ma ma sley kuɗey ana kakay. 29Ama ma tərada ndaw Zuif aha na, tek ana ma kəzla ha na, ma sley kuɗey na mala ma mevel, na ma bawa da Mesəfrey ana zləna, na ma winda ha ta windey ana kakay. Nəkafa na ŋga na tok na, ndaw a ndzefey ma səmbərey ŋga na, da Bay ma Bəla zləna, da ndaw hay tikay.
Currently Selected:
Romeŋ 2: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun