Zaŋ 9
9
Yezu ma ndalada ndaw ana daha wulaf aha a yadəmərawa da hwoɗ
1Andza Yezu a daw aha na, ŋga ma nəkada ndaw ana daha wulaf aha, a yadəmərawa da hwoɗ. 2Gawla ŋga hay ma tsəhafama guma neney: «Rabi, a yəmərawa ndaw a neney wulaf aha na, ɗagay ma ŋgəsafa tek na way? Bay 'ar ma vaw ŋga na tsukuɗu, baba ŋga, ta may ŋga ɗaw?» 3Yezu me mbəɗey kava: «Kwa ŋga ka ŋgəsey kakay, kwa baba ŋga, ta may ŋga, ka ŋgəsam tek kakay, amana hayna mber ma Bay ma Bəla ka nəkey da ŋga. 4Ekəɗey rəpas mba na, a dafa na me key mber ma Ndaw ma sləradiyawa na: dəvaɗ a sawa ha na, ndaw a slafa me key mber sakay. 5Da mendzey ɗaw a neney ka bəla na, yah na, waw me nəkey dey ma bəla.» 6Andza a dəba ma guma ŋga neney me tsey na, Yezu me təfey sleslem ka dala, ma heləɓey hahay ta sleslem, ma fəɗadara ka dey ma ndaw wulaf a hana. 7Arka ŋga ma ləvar: «Daw da pəra vaw ba da slam me pərey vaw ma Silowey.» Silowey ka ləva na: maslaŋ. Ndaw wulaf ana hana, ma daway, ma pərərawa vaw, a da mawa na, a nəkada dey ka dəba. 8Ndaw mambaw hay, ta ndaw ma nəkadama zlekete, ma ləvam: «Neney na ndaw aŋga na ma ndza ha, a rəkey aha tek ana, seŋgey?» -Hərway ŋga ndaw me rəkey tek aha-. 9Sa ma ndaw hay, ma ləvam: «Neney na ŋga təŋga.» Sa na hay tey waya: «A-ay neney na ndaw ma zəga ndaw.» Ama ndaw wulaf ana me mbəɗey kava: «Yah ana təŋga!» 10Taya ma ləvamar tok: «Ɗagay azlakwa dey ɗek ana hay a da wuram na teŋgey?» 11Ŋga me mbəɗey kava: «Ndaw aŋga na, ma zəlamar Yezu ana, me heləɓey hahay, ma fəɗaya ka dey na, ma ləvaya: daw a Silowey, da pəra vaw; yah ma daway, i ma pərərawa, arka na, i ma nəkada dey tok.» 12Taya ma ləvamar: «Ɗagay ndaw ana na ŋga da may?» Ŋga me mbəɗey kava: «I sərada kakay.» 13Ma dadama ndaw a kete wulaf aha na, ka tsakay ma Fariziyeŋ hay. 14Azlakwa Yezu a heləɓey hahay, ma wuradara dey ŋga na na, ta pas ma mesley. 15Fariziyeŋ hay satsa na, ma tsəhafama: ɗagay a wuradəmara dey ŋga na na, teŋgey? Ŋga ma mbəɗatar kava: «Ŋga ma fəɗaya hahay ka dey, i ma pəra vaw na, i ma nəkada dey.» 16Da walaŋ ma Fariziyeŋ na hay na, sa na hay ma ləvam: «Ndaw a neney na, a tsənar sləmay a mesley kakay, a sawa da Bay ma Bəla tikay.» Ama, sa na hay ma ləvam: «Ndaw ma ŋgəsa ha na, a slafa me key zeheɗ andza ha tata ɗaw?.» Arka, a da key da walaŋ ata na na, me tsey vaw. 17Arka taya ma tsəhafama, ka ndaw wulaf ana sa: «Kah ekəɗey na, ka ləvafa ka ndaw ana ma wuradaka dey ɗek ana na, teŋgey?» Ŋga na me mbəɗey kava: «Ndaw ana na, ndaw sek.» 18Andza taya ka zələmatərawa, andza baba ŋga na, ta may ŋga na tsaray kakay na, Zuif hay ka təɓama ka mevel ata, ndaw ana tsəfəmey aha na, wulaf aha, a da wuradəmara dey ta wurey tikay. 19Taya ma tsəhafəmata kandza baba na, ta maya na: «Ndaw a neney na, bəzey kwar na kuray ma ləvam, a yəmərawa wulaf aha na kakay ɗaw? Azlakwa ekəɗey a da nəkada dey ka dəba na, teŋgey?» 20Baba na, ta may na ma mbəɗafəmatara kava: «La səradama dey ta kava, neney na bəzey la dərkana, a yəmərawa na wulaf aha. 21Ekəɗey a da nəkada dey ka dəba na teŋgey na, la səradama tikay; ma wuradara dey ana way na, la səradama kakay, tsəhafama ka ŋga na, ŋga ɗuhwaha ɗa, ka vaw ŋga sana, ŋga na ta ’ar aŋga na ka wandzaladakwar kwa!» 22Baba na ta may na a tsam andza ha na, hərway a wasam ta Zuif hay. Hərway ma mey na, taya ka tsama tsoy: «Kwa way way me ləvey Yezu na Kriste ha na, a warzlama ba da ’ay me ɗuley mey.» 23Nəkafama baba na, ta may na, a da ləvam: «Ŋga ɗa ka vaw ŋga sana, tsəhafama kwa», na hərwuiya. 24Dey ma tsetsew ana, Zuif hay ma zələmərawa ndaw ana hana wulaf ana, ma ləvamar: «Kar salalay a Bay ma Bəla! Amana, la na, la səradamaha ndaw ana na, ndaw ma ŋgəsa ha.» 25ŋga ma mbəɗatar kava: «Kendzey ŋga ndaw ma ŋgəsa ha na, i sərada tikay; tek a ɗaw ma sərada na neney: tsəfəmey aha na, i wulaf aha, ama ekəɗey na, i nəkada dey ka dəba.» 26Taya ma ləvamar: «Ɗagay a kaka na mey? A da wuradaka dey ana na, teŋgey?» 27Ŋga ma mbəɗatar kava: «I ka ɓadakwar tsoy, amana ka wuɗam me pey sləmay kava kakay, ka wuɗam ma tsənadama dey mekelehe na, ka mey? Tsukuɗu ka wuɗam na, ma da tərey gawla ŋga hay tiyatsa ɗaw?.» 28Fariziyeŋ hay ma zlamar ma tsaɗama ma ləvamar: «Kah na, kah gawla ŋga! Ama la na, gawla ma Moyiz hay. 29La səradama ha Bay ma Bəla na, ka tsərawa guma ba a Moyiz, ama ndaw a neney na, la səradama a sawa na da may tikay!» 30Ndaw ana ma mbəɗatar kava: «Ana dzadzak, me rəzley ndaw na ŋga ha tok, hərway ma mey na, ka səradama a sawa na da may kakay ana, ama zlənemey na, ka wuradaya dey ba! 31Ka səradakwa ha seŋgey: Bay ma Bəla na, a patar sləmay a ndaw ma ŋgəsa na hay kakay, ama haɗaw ndaw ana ma ɗamara ’ar aha, a key tek andza ma Bay ma Bəla me wuɗey ana na, a vəladara. 32Ɗaɗa, ndaw ka tsənada ndaw ka wurey dey ma ndaw wulaf aha, a yadəmərawa da hwoɗ na, dakay seŋgey. 33Haɗaw ndaw a neney na, ndaw ma Bay ma Bəla kakay na, a slafa me key tek andza neney kakay.» 34Taya na ma mbəɗamar kava: «Kah na, a yəməkawa na da meŋgəsey tok na, dzadzak na, ka da tsandar guma a 'ar tok ɗaw?» Arka taya ma kəladəmərawa ba a bəla. 35Yezu ma tsənada waya ka ɓələmərawa ba a bəla na, ŋga ma sawa, ma ndzafa ma ləvar: «Ka pey 'ar ka Bəzey ma Ndaw ɗaw?» 36Ŋga tey ma mbəɗar kava: «Ŋga na na way Bay’ərlam a ɗaw, ma i ka pey 'ar ka ŋga na na?» 37Yezu ma ləvar: «Ka nəkada ha, ma tsaka guma neney na ŋga.» 38Ndaw ana me ləvey: «I pey 'ar Bay’ərlam a ɗaw.» Arka ŋga me gərdey ka mey dey ŋga. 39Arka Yezu me ləvey tok: «I sawa ka bəla na, ma da key sariya, ma aza ndaw ma nəkadama dey kakay ana hay, ka nəkadama dey, ndaw ma nəkadama dey ana hay tey na, ka təram wulaf ahiya.» 40Fariziyeŋ hay daha ka tsakay ŋga, ma tsənadama guma neney na, ma ləvamar: «Ka ləva na, ta la adzay na, la wulaf ahiya tiyatsa ɗaw?» 41Yezu ma mbəɗatar kava: «Kendzey akwatay kuray ka kam wulaf ahiya na, meŋgəsey ka kuray dakay, ama ekəɗey ka ləvam, ka nəkadama dey sana, meŋgəsey kwar ŋga re.»
Currently Selected:
Zaŋ 9: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun