Mber 3
3
A ndalam ndaw ma təra ha
1Piyer ta Zaŋ ma tsəlam a 'Ay me key Kuley, ma da ɗulawa mey ma ndzemdey makar ma hakwaɗ. 2Ka pas ka pas na, a zəgəmaɓa ndaw ana daha ma təra ha zla da ma yawa ŋga, a padama ka mambaw ma ’ay me key kuley, na zəlamar Mambaw Mambay ana, ma aza ka tsəhey sadaka ka ndaw ma fuləkwam a 'Ay me key Kuley ana hay. 3Andza ma nəkadata andza Piyer ta Zaŋ a da fuləkwam aha a 'Ay me key Kuley na, ŋga ma tsəhafata ka kamar sadaka. 4Arka Piyer ta Zaŋ ma zazurama, arka ma ləvar: «Zazurandar!» 5Ndaw ana hana ma zazurata tok, hərway ka ŋga na, waya a da vəlamar tek. 6Piyer ma ləvar: «Gura, dakay sulay na, a rafaya dakay, ama tek na ma rafaya daha na na, i vəladaka, ta mezəley ma Yezu Kriste, ndaw Nazorieŋ ana, heley! 7Arka ma zəga ta har zəmay na, ŋga ma lətsada. Deŋe ka slam ana tsana, sek ta tarkwakwasl ma ndaw ana ma marɗam. 8Huram me lətsey da mey asləta, ma zlar me heley, taya ma fuləkwam a 'Ay me key Kuley dzaya, a daway, a hərɗey, ta ma səmbəra Bay ma Bəla aha. 9Sekway tabiyaha ma nəkadama a heley aha, a Səmbərey aha Bay ma Bəla. 10Ma səradama: neney na, ŋga aŋga na ma ndzaha ka Mambaw Mambay ana ma 'Ay me key Kuley, a rəkey aha tek ana. A katar a ndaw hay na, hassəkakka, a rəzlata badaŋ badaŋ, hərway ma tek a neney ma safərawa na.
Guma ma Piyer da 'Ay me key Kuley
11Ndaw ana a mbəkadata andza Piyer ta Zaŋ sakay. Səkway tabiyaha ma rəzla hiya, ma humawa ka tsakay ta, ka slam ma mambaw ana daha a zəlamar «Mambaw ma Salomoŋ» 12Arka andza ŋga ma nəkada ba andza ha tsana, Piyer ma tsar guma a səkway: «Ndaw ma Israyel a neney hay, ɗagay tek a neney me key ana a rəzlakwar na, ka mey? Dakay na, ka nəkafəmandar andza ka ləvam, ndaw a neney a heley na, ta ma slafa la, dakay na, ta me pey 'ar ala na, ka mey? 13Bay ma Bəla ma Abraham, ma Izak ta Zakob, Bay ma Bəla ma baba lakwa hay, ka vəlar maram ba a Yezu Gawla ma 'ay ŋga, Yezu aŋga na kuray ma vəladama a har ma bay hay ana, ma pərafama har ma vəladəmara a Pilat ana, akwa ŋga na, a wuɗey ma mbəkada ba na. 14Kuray ma mbəɗamar mey a Ndaw kokwoɗ ana, dzerey aha na, kuray ka da tsəham ka vəlaməkurawa na, ndaw me kəɗey ndaw vagay aha na. 15Bay ma mesəfrey ana ŋga na kuray ma kəɗama ba vagay aha na na, Bay ma Bəla ka mbəladərawa ba da walaŋ ma ndaw ma mətsa na hay, la neney na, ndaw seydewe na hay. 16Kuse ma me pey 'ar ka Mezəley ma Yezu, mezəley ana ma ndalada ndaw a neney kuray ma nəkadama, ma səradama, me pey 'ar a neney, ma sawa da Yezu ana na, ma ndalada ndaw a neney kiyal kiyal ka slam dey kwar tabiyaha na. 17Azlakwa tok na, malam a ɗaw hay, i sərada ha kuray ta bay kwar ana hay, ka kəmawa andza ha na, hərway ka səradama kakay. 18Bay ma Bəla na, ŋga na ka ɓadərawa ba zla ka vaw ta huɗa mey ma ndaw sek hay tabiyaha Ndaw aŋga ma vahara 'ar ana na, a key tsetseh, a ndesley na ŋga ha tok. 19Mbəɗadama mendzey kwar tok na, mbəɗəmawa dey ka Bay ma Bəla na, aza meŋgəsey kwar hay ka davasam ba. 20Kəɗey tok na, har ma me sesəkey vaw ma Bay’ərlam ma da vəley na, andza ka da sləradərawa Kriste, na ŋga na ma padukurawa na, Yezu. 21Ekəɗey ana na, a da ndzey da 'ərlam, ha kasl ka har ma da ləmadata tek hay tabiyaha na, na Bay ma Bəla ma tsawa ta huɗa mey ma ndaw sek aŋga kokwoɗ ana hay zlezle na. 22Ma tsawa tsəfəmey aha na Moyiz ba ɗagay: «Bay’ərlam Bay ma Bəla a da lətsukurawa ndaw da walaŋ ma malam a kwar hay, ndaw sek aha andza yah, ka da pafama sləmay ka tek ana tabiyaha ma da tsakwar ana. 23Mendzey ma ndaw ma da par sləmay a ndaw sek ana ŋga na kakay na, a da wurzləma ba da səkway ana» 24Mendzey ma ndaw sek hay tabiyaha, zla ka Samuwel ta ndaw ma ndzam a vəɗ aŋga na hay taya tiyatsa na, ka tsəmawa guma ma taləkadərawa mey ta pas a lakwa neney hay lakwa ma ndzakwama na. 25Kuray na, bəzey ma ndaw sek hay, bəzey ma me dzəmey vaw ma Bay ma Bəla ma kəmawa ta baba kwar hay, andza na ma ləvərawa a Abraham ana: Ta bəzey ma hwoɗ eɗek hay na, a da pəsafəmata mey ka səkway ma dala hay tabiyaha. 26Bay ma Bəla a lətsadərawa, a sləradərawa Gawla ma 'ay ŋga na hərway kwar ba ɗagay, ma da pəsafakwar mey ma kwa way way ka mbəɗawa dey ba da tek aŋga ma key haya kaya ana hay na»
Le Nouveau Testament en langue Mofu © 2007 Alliance Biblique du Cameroun