Mber 2
2
Ma sawa ma Mesəfrey Kokwoɗ ana
1Andza pas ma Paŋtekot ma husawa na, taya ma kusa hiya tabiyaha ka maslətaha. 2Dekeslef, me bebətsey ma tek ana, ma tsənawa da 'ərlam, andza me bebətsey ma vavəray; ma rəhada 'ay ta hana ma ndza hiya da huɗa na. 3Arka tok na, ma nəkadama tek ana andza 'erneh ma waw, ma bəmawa, ma wanəkam, ma ndzam ka ndaw ka ndaw ka taya tabiya ta ha. 4Ma rəha vaw aya tabiya ta ha, ta Mesəfrey Kokwoɗ ana. Arka ma zlamar me tsey guma ta mey gəle gəle andza ma Mesəfrey Kokwoɗ ana ma ɓadatara na. 5Arka ta pas ana ŋga na, da Zeruzalem na, Zuif me pey 'ar ana hay, ma kusa hiya da huɗa, a kusəmawa 'ar da dala hay ma bəla tabiyaha. 6Andza ma tsənadama tek ana na, taya ma kusam 'ar ka maslətaha, taya ma rəzla hiya kambəlaɓa, hərway kwa way way a tsənada na a tsam aha mey ŋga. 7A rəzlata, a mbafata, taya ma ləvam ka 'ar vaw ta na: «Ndaw a neney hay ma tsam guma na tabiyaha na, ndaw ma Galiley hay kakay ɗaw? 8Azlakwa a da key kwa way way da walaŋ a lakwa a tsənada, a tsam aha guma ta mey ma ŋgwa ŋga na, teŋgey? 9Part hay, Med hay, Elamit hay, ndaw ma Mezopotami hay, ndaw ma Zudey hay ta Kapados, ndaw ma Poŋ ta ndaw ma Azi hay, 10ndaw ma Firzi ta na ma Pamfili, ndaw ma Ezipte ta ndaw ma Libi ma Sireŋ, ndaw ma Rom na ma ndza hiya ka sləna na hay. 11Tobiyaha na, sana Zuif aya, sa na hay a tələkam a səkway ana ta tələkey, Kretuwa hay ta Arab hay, lakwa tabiyaha i tsənadukwa ta mey ma ŋgwa lakwa hay, a tələkadama mey ta tek ma Bay ma Bəla me key mambay ana hay.» 12Tobiyaha ma rəzlaya, a səradama ka kam na teŋgey kakay. Da me rəzley ta na na, taya ma ləvam ka 'ar vaw ta na hay: «Neney na, ka ləva na teŋgey?» 13Sa na hay ma kuyam ka me səŋgərey ma ləvam: «Taya ma waya ta zom ma tsəray ana.»
Guma ma Piyer ma tsatar a ndaw ma kusa hiya na hay
14Arka vəɗe ma ɗay ma Piyer me tsəney, taya ta maslaŋ kurow kava asləta na hay, ma ɓadatara andza neney: «Ndaw ma Zudey eɗey hay, ta kuray a neney tabiyaha ma ndza hiya da Zeruzalem ana hay, səradama haya hayaha tek a neney me key ana, dzəkam sləmay ka guma a ɗaw a ɗey hay. 15Ɗaɗa ndaw a neney hay ka sam zom, andza ma kwar ma dzalam ana tikay; ekəɗey na, a key na ndzemdey tsəfaɗ ma zlemedew mba seŋgey. 16Ama, ekəɗey ka sləna na, a key me ndesley na guma ma ndaw sek Zowel:
17Bay ma Bəla a ləvey:
a da key ta pas madakwaydok ana hay na, i da batəkwafatəraɓa Mesəfrey ɗaw ka ndaw hay tabiyaha,
bəzey kwar hay ta dem a kwar hay, a da təram ndaw sek ahiya.
Tek a da nəkatar a dey a mambəlazaw a kwar hay,
maraw a kwar hay, mesəney a da katar.
18Ayaw, ta pas ana ŋga na na,
i da batəkwafatəraɓa Mesəfrey ɗaw ka gawla ma 'ay ɗaw hay, ta dem ma 'ay ɗaw hay,
arka a da təram ndaw sek ahiya.
19I da key tek hay me rəzley ndaw ahiya, da mekekəle ma 'ərlam,
i da key zeheɗ hay ka sləna ka dala, mambaz, waw ta geŋges tezewhwe.
20Pas a da tərey ləvaŋ aha, kiya a da tərey andza mambaz,
amba andza pas ma Bay’ərlam ka husawa ɗuhwa ha a wezley dey.
21Arka kwa way way me zəley mezəley ma Bay’ərlam ka vaw na, a da buwama.»
22Ndaw ma Israyel hay, pafama sləmay ka guma a ɗaw eɗey hay: «Yezu ndaw Nazorieŋ, Ndaw na Bay ma Bəla ma sləradərawa ka tsakay kwar ana na, ta har aŋga na, ŋga ka key ɗeɗew hay ba, tek me rəzley ndaw ana hay ta zeheɗ hay ba da walaŋ a kwar, andza na kuray ma səradama na, 23ndaw aŋga na andza Bay ma Bəla ma dzalərawa zla ka vaw, ta ndaraw aŋga na ma slafa ma sərada, tek ma da key ka mey ana na, kuray ma mbəkafama har a har ma ndaw hay, kuray ma zəɗadəmara 'ar ba ta ma daradama ka 'ar ma tuwaw, ta har ma ndaw ma ŋgəsa na hay. 24Amana, Bay ma Bəla ka mbəladərawa ba, ma ləhadərawa ba da banay ma memətsey, zləna a key vaw memətsey ka slafa ma zəgada ta gədaŋ aŋga tata kakay. 25Akwa David a ləvafərawa na andza neney:
‹I nəkada ha Bay’ərlam zarra ka slam dey ɗaw,
hərway ŋga ta har zəmay ɗaw, ma i ka da təɗey zlay.
26Mevel a ɗaw satsa, a da key da wuiya, 'erneh a ɗaw a da kəlar walay ma wuiya.
A fəna satsa na, vaw ɗaw a da sesəkey vaw, hərway i pey aha dey.
27Hərway ka da mbəkada ha Mesəfrey ɗaw rap a tsəvay kakay,
ka da mbəkada ha ndaw eɗek kokwoɗ ana ka da zey kakay seŋgey.
28Kah ka ɓafaya ba ka tsəveɗ me mendzey,
ka da rəhadaya ta wuiya ka tsakay ɗek.›
29Malam a ɗaw hay, a slafama ma tsəmakwar ndar ndar, baba tete David na, ka mətsey ba, ma zləlama, ɗay tsəvay ŋga na na, re ekəɗey ŋga daha da 'ay lakwa na mba seŋgey. 30Ama ŋga na ndaw sek aha, a sərada ha Bay ma Bəla ka ləvar ba ta me mbəɗey aha kava: «I da pey bəzey ma hwoɗ eɗek ka koriwal ma bay ɗek, na ma da bawa da kah ana.» 31Ŋga na ɓa ka nəkada ma mbəlawa ma Kriste ba zla ka vaw, a ləvey andza neney na, hərway ŋga: «Ka da mbəkafa ha har a walaŋ ma ndaw ma mətsa na hay kakay. Slaw vaw ŋga na ka sərada mezey kakay. 32Yezu a neney ana, Bay ma Bəla ka mbəladərawa ba, la neney tabiyaha na, ndaw seydewe na hay. 33Ma tsakafa ha a 'ərlam ta har zəmay ma Bay ma Bəla, ŋga me ndzefey Mesəfrey Kokwoɗ ana da har ma Baba, na ma tsar kava na, ŋga ma batəkwadərawa andza neney, kuray ma nəkadama, ma tsənadama na. 34David na, dey ta kava, ka tsəley a 'ərlam kakay, amana me ləvey andza neney:
‹Bay’ərlam a ɗaw ma ləvar a Bay’ərlam,
ndzey ta har zəmay ɗaw,
35ha aza i ka təradata ndaw dugwan eɗek hay andza
tek me pey sek eɗek ahiya.›
36Hayna səkway ma Israyel tabiya ka sərafa haya hayaha tok: Yezu aŋga na kuray ma daradama ka 'ar ma tuwaw ana na, Bay ma Bəla ka pada ba Bay’ərlam aha, Kriste aha.»
Ndaw ma mbəɗadama mendzey ta tsəfəmey ana hay
37Andza taya ma tsənadama guma neney hay na, mevel ata ma dawara hiya. Taya ma tsəham ka Piyer ta sa ma maslaŋ a sa na hay: «Malam a la hay, la ka kam na teŋgey?.» 38Piyer ma mbəɗatar kava: «Mbəɗadama mendzey kwar; kwa way way da walaŋ a kwar ka ndzefey medzuhəɓey de mezəley ma Yezu Kriste, ma ndzafada amboh ka meŋgəsey ŋga hay, arka na, ka da ndzafam tek ma hayaha ma Mesəfrey Kokwoɗ ana. 39Hərway tek ana ma tsəmawa kava na na ma vəla ha na, ma kwar ta wawa kwar hay, arka satsa na, ta ndaw na dəreŋ ana hay dzay, ta na haɗadzidzay na Bay’ərlam Bay ma Bəla lakwa ma da zəlatərawa na sa.» 40Tasa ma guma na sana hay na, Piyer me key seydewe na, ma səmadata. Ŋga ma ləvatar: «Wanəkam ba ka vaw ta ndaw ma bəla neney ma ŋgəsa na hay, ma ha da ləham vaw kwar.» 41Ndaw ma təɓama guma ŋga na hay na, ma dzafam me dzuhəɓey, arka ta pas ana ŋga na na, a key ndaw gabal makar me dzəmey a dey ta.
Kominite tsəfəmey ana
42Taya zarra da me tetəkey ma maslaŋ hay, da ma dzəma mey ta andza malam aya na, da slam me wunəkey peŋ, da me ɗuley mey. 43Zluwer ma katar a ndaw hay tabiyaha, hərway maslaŋ hay a kam tek me rəzley ndaw ana hay haɗadzidzay ta zeheɗ hay. 44Ndaw me pey 'ar ana hay tabiyaha ma dzəma hiya ka maslətaha, a padama zleley ta hay tabiya ha ka maslətaha. 45A haɗəkadəmata ley ta hay ta zleley ta hay, arka sumkwo na na, a wanəkadama tabiyaha ka 'ar vaw ta na, kwa way way a təɓey na, ka tek aŋga me wuɗey. 46Taya ma dzəma mey aya asləta, ka pas ka pas a dawam a 'Ay me key Kuley; da mbaw ta na hay na, a wunəkam peŋ, a zəmam tek ka maslətaha da wuiya, ta mevel ləfeɗeɗe ha. 47A səmbərama Bay ma Bəla. Səkway tabiyaha a ŋgəlata har tsew tsew. Bay’ərlam a səkada kominite na ka pas ka pas ta ndaw na ma buwa na hay.
Currently Selected:
Mber 2: MOF
Highlight
Copy
Compare
Share
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun