1 Korintieŋ Ma key ka ’ar ɗaf ma guma
Ma key ka ’ar ɗaf ma guma
Pol a zlərawa a Egliz ma Korint na da har ma ma daway ŋga dey me tsetsew ana ma meslərey ŋga. Koreŋt ana na wurow ɗuhwa ha da dala ma Gres. Zleley aha hərway ma tasa me lətsey kwambiwal hay tsew da huɗa. Da huɗa na, beke hay ta ndaw mbərga na hay haɗadzidzay. Ndaw hay haɗadzidzay da huɗa ma ndzaya so lamba ha. Da varay ana ŋga na na, ndaw ma Koreŋt ana hay a səpəmatar bəzay a kuley hay ta me dzeley ’ar hay haɗadzidzay. Sa ma ndaw ma Egliz ana da huɗa na hay na, a səpəmawa ka mey na kuley ana ŋga na hay, ambay ka da təram kretiyeŋ ahiya. Pol me tsəney guma waya ahiya da kominite (1.11 ta 7.11). Kretiyeŋ ma Koreŋt ma pəsla ’ar ahiya kambəlaɓa ta guma ma tsəham ma nəkey dey ka mendzey ma ndaw hay ana ta me zəgey har a vaw ta sa ma kuley ana sa na hay. Arka Pol ma mbəɗey kava da ɗeriwel aŋga tsəfəmey ana ma katar a Koreŋtiyeŋ hay.
Da lamba ɗuhwa na 1 kasl ka 4, Pol a tsey na ka kretiyeŋ ma Koreŋt hay ta ndaw ma taləkadəmatərawa mey ta Mey Hayna Wayna na hay. Waway da walaŋ a ta haɗa, arka na Egliz ma Koreŋt ana ma waɗəka ha tsay ka vaw. Kwa way na, a zəgey na tsakay ma ndaw ana ma tatəkadərawa na, arka a zlaram ta ndaw naŋgar sakay (1.10-13; 4.6). Azlakwa zlay gədaŋ aha na mey ana ma taləkadama na: Kriste dakay na maslaŋ ma Bay ma Bəla ka daradama ba ka ’ar ma tuwaw ma gazləla na. Bəzay ma guma neney na a fənar ’ar a ma me sərey’ar ma ndaw hay. (1.18; 2.15). Bəzey me slərey ma Yezu Kriste hay na, tabiya ta hiya gawla ma ’ay ma Bay ma Bəla ahiya, a kam mber na tabiya ta ha ka masləta ha (lamba ɗuhwa na 3)
Da lamba ɗuhwa na 5.1—11.16: Pol a mbəɗey ka bəzay ma guma ger ana ma kam ana hay, a ləvey ɗagay kretiyeŋ hay na a wama ’ar a ta na teŋgey (lamba ɗuhwa na 9) Me zəgey mezəley ma kretiyeŋ, arka me key tek ta huɗa kakay ana na, na ŋga na na a təɓama da Kominite kakay (lamba ɗuhwa na 5 ta 6). Arka Pol ma mbəɗatar kava tiyatsa ka guma ma Koreŋtiyeŋ hay ma tsəham ka me zəgey vaw (lamba ɗuhwa na 7), ka mendzey ka metsekesley tek hay ta na ma ndaw ma kuley ana sa na hay (lamba ɗuhwa 8-10). Da tek a neney hay tabiya ha na, a wunata kretiyeŋ hay ka səpam na tek na ma nafatar a ndaw hay ana ta ma ɗəmatar ndaw ana.
Ma zlar ka 11.17 kasl ka 14.40 na, Pol a tsey na ka me ndzey da kominite ma kretiyeŋ hay. A katar ka ’ar ɗaf ka bəzay ma guma ma me tsey vaw. A wandzaladatara ma ləmada me dzəmey vaw da Egliz ma wurow ana. Kwa way way da kominite na, a nefey. Akwa na, kretiyeŋ hay na, andza vaw ma ndaw asləta: kəɗey na mezəvey ma vaw waray waray na, a nefey da me ndzey ma vaw tabiya ha. Ma kəsada kominite na, ma wuɗa vaw (lamba ɗuhwa na 13)
Lamba ɗuhwa na 15 a ɓada na Bay ma Bəla ka pərkadərawa Yezu ba da memətsey, arka aza pas asləta na ndaw ma mətsa na hay a da pərkəmawa tiyatsa. Haɗaw kretiyeŋ hay ka pam ’ar ba andza neney na, na ŋga na na, me ndzey ta ta me pey ’ar ata na tsəveɗ aŋga na daha, andza ma sa ma ɗeriwel ana sa na hay na, neney tiyatsa na a ndəvey na ta me tsəney guma waya ahiya, ta me tsey guma hay a vaw (lamba ɗuhwa 16)
Koreŋtiyeŋ ana hay na, kretiyeŋ hayna hay me təke kakay, ama na Pol a madara sise a Bay ma Bəla hərway ta (1.4-9). Tek ger ana hay ta tek me zləgey ndaw ana hay tabiya ha na da Egliz hay tabiya ha daha, kwa andza ha tekeɗe na, Bay ma Bəla na ŋga re kava a vəlawa hahaya ŋga ta ma zəley kretiyeŋ hay ma da ndzey da me tsəney sləmay.
Currently Selected:
1 Korintieŋ Ma key ka ’ar ɗaf ma guma: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun