1 Korintieŋ 2
2
Pol a tatəkadata ndaw hay da Koreŋt
1Yah ana na, andza ma daɓa ɗaw a 'ay kwar na malam a ɗaw hay, i da taləkadakwar mey ta tek ma Bay ma Bəla ma kəzla na na, ta guma ɗuhwa hiya kakay, dakay na, i ka kada vaw andza ndaw ma səra ’ar aha kakay seŋgey. 2Hərway da walaŋ a kwar na, i ka dzalawa ma səradərawa tek mekelehe na, dakay, sey Yezu Kriste, Yezu Kriste aŋga na ma daradama ka 'ar ma tuwaw ma gazləla ha na, 3hərway mavəday, da har i da walaŋ a kwar na, i kada vaw ɗaw na bəle ha, zluwer aha, i wesey ka vaw kwasl kwasl. 4Guma ɗaw ana, ta tek a ɗaw ana i ma tatəkadakwar ana hay na, ka nəkey andza me zlepey ma ma səra ’ar kakay, amana, ŋga na a ɓawa gədaŋ ma ma slafa ma Mesəfrey. 5ma 'ar a kwar me pey ka da pey na, ka me sərey ’ar ma ndaw hay zlay, amana, ka ma slafa ma Bay ma Bəla.
Ma səra 'ar ma Bay ma Bəla
6Akwa na, la tatəkadəmatara a kretieŋ ma səka na hay na, ma səra ’ar, ma səra ’ar a neney na, ma ndaw ma bəla neney hay kakay, kwa ma bay ma bəla neney me devesey ana kakay. 7La tatəkam na, tek ma səra ’ar ma Bay ma Bəla, me nəkey kakay ana, ma ndzaha ma kəzla ha, na Bay ma Bəla ma padandərawa zla ka bəla ma ka ha tsaray kakay ana, ma da hasəkadandar bəzay. 8Kwa ndaw asləta da walaŋ ma bay ma bəla neney hay ka səradama kakay, zləna akwatay ka səradama ba na, akwatay ka daradama Bay’ərlam ma mewezley dey ka 'ar ma tuwaw ma gazləlaha na kakay. 9Ama andza na ma winda ha da ɗeriwel kokwaɗ ana na, tek a neney dey ka nəkada kakay ana, na sləmay ka tsənada kakay ana, na ka sərawa a mevel ma ndaw kakay ana, tek hay tabiyaha, Bay ma Bəla ma ləmatərawa a ndaw ma wuɗama na hay. 10Akwa na, Bay ma Bəla a da ɓadandar ta Mesəfrey na a la, hərway Mesəfrey na, a sasəkata tek hay tabiyaha, kwa tek na ma kəzla ha ma Bay ma Bəla na siom ana na. 11Ma slafa ma sərada tek ma vaw ma ndaw na way? Sey ma sərada na, Mesəfrey ana da ndaw ana, ana ma Bay ma Bəla na andza ha atsa, ndaw ma sərada na dakay, sey Mesəfrey ma Bay ma Bəla na. 12Na ŋga lakwa na, i ndzafakwa na mesəfrey ma bəla neney tikay, amana, Mesəfrey na ma sawa da Bay ma Bəla na, ma lakwa ka səradakwa tek ma haya ha, ma hahaya ma Bay ma Bəla. 13La tsama na, metetəkey ma ma səra ’ar ma slaw vaw kakay, amana, da na ma Mesəfrey me tetəkey ana, a ɓada na Mesəfrey aha na, ta guma ma Mesəfrey. 14Ndaw ma mbəka ha ma slaw vaw ŋga, makəraŋga na, a slafa ma təɓa tek na ma sawa da Mesəfrey ma Bay ma Bəla ana kakay, na ŋga na ma ŋga na, ma mbəɗa 'ar tedehe, a slafa ma tsənada kakay, hərway ma walada ŋga na na ta Mesəfrey. 15Ndaw ta Mesəfrey aha na, dzadzak a ka sariya ma tek hay tabiyaha, amana, ndaw ma da kafa sariya ka ŋga na, dakay. 16Hərway ma səradərawa me dzeley 'ar ma Bay’ərlam, ma da tatəkada na way? Amana, ŋga lakwa na, dzadzak lakwa ka ndzafakwa me dzeley 'ar ma Kriste ba.
Currently Selected:
1 Korintieŋ 2: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun