OZE 1
1
1Ti Zoroboˀam, mangal ngi Zoˀas mazum buy a ruwuy Israyel na, Oze mangal ngi Beˀeri, Bumbulvuŋ a ɓaŋ ɓi le. Ti di nah, Oziyas, Yotam, Ahas waɗ Ezekiyas ara zumam buy ar ruwuy Zuda ma.
Mijiviɗ muɗuv ngwas, mingiɓi mudumbuŋ ngi Buymisemuŋ da Oze
2Mingiɓi ngi Bumbulvuŋ miɓa ti balam Oze na, zli virzi naŋ n'ani.
Bumbulvuŋ a ɓa Oze na:
«Aru, zuɓ ngi ngwasa, i ngwas magi sulome vur Buymisemuŋ.
Ziri kum masa ya ka taŋ ati naŋ na, i ziri ngi ngwas sulomehey,
asi mike na, hirwuy taˀ gar a mbiɗa duba le da Bumbulvuŋ,
ara gam sulome lambaˀ.»
3Joˀ Oze ara zuɓ ngi ngwasa i Gomer, zuŋ ngi Diblayim. Gomer a gi hur, a yaŋ mangal mizile. 4Dar Bumbulvuŋ a ɓa Oze:
«Mangal ɗik na, caŋ slimiɗe Zizreyel, asi hin neˀ ng'aka, pumbus ngi mizli Zizreyel na, i sa cufuɗa ɓi naŋ avu dideˀ ngi Zehuhoy, yo zumabuy ngi Israyele, i sa kiɗa tay wãˀ avra.
5Hin a sa ndilawa, tapasa
i sa vuso soje ngi Israyeley
ar sozo ngi Zizreyel.»
6Gomer tuwa a gi hur ma, a yi zuŋ mongoso. Joˀ Bumbulvuŋ a ɓa Oze:
«Ki sa zila Lo-Ruhama
mbiɗe avra: ‹Mapurakaŋ ircece ta›
asi y'anta sa pura ircece da Israyeleye mata,
i sa pula pura taŋ ircece wãˀa.
7Amma, i sa pura ircece da hay ngi Zuda ɓula,
yo ya Bumbulvuŋ Buymisemuŋ taŋ, i sa laha taŋ,
y'anta sa laha taŋ ti lek ta, ti maslalam ta, ti gi vurum ta,
ti pilisey ta, ti misi pilisey ta ma.»
8A dirba Lo-Ruhama mupula ɗuwa na, Gomer a gi hur, a yi mangal mizile. 9Bumbulvuŋ a ɓaŋ na: «Caŋ slimiɗe Lo-Ami,
mbiɗe avra: ‹Mizli ɗuwoy ta›,
asi kum i mizli ɗuwoy ta,
yo ya kwana, yi zliram neˀ le ati kumo ta.»
Currently Selected:
OZE 1: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.