ROMAHAY 3

1Na, da naŋ kanah na, mbur Yude a fini vu ti mike? Ci mizawa, a pul gir ngi mike? 2Gwat mupuɗaw ada anga haɗi gisiŋ. Buymisemuŋ minjika mingiɓi naŋ dumbuŋ na, a pula asi haŋ taŋ. 3Na, mbri ska? Da mekelemey a wuzla taŋ, t'anta teŋteŋ ta na, gi teŋteŋ ta na, a sa tika Buymisemuŋ ɓa a ndir teŋteŋ ta ya kwa? 4Ndiɗaˀ wãˀ. Ko da mbur gar a gi slir tekeɗe kwana, anja mizli a sinaka, Buymisemuŋ a ɓi di i ɓi mikaslsla na si. Naŋ kaɓa mutohoko ɓi naŋ miɓi: Anja mizli a sinukuw, ka jeŋŋe ar mingiɓi ɗike. Da ara gukuw kiita na, anja kiita a hizigiɗuw ta.»

5Amma da malambaˀ ndra magaka ara biga da mizli, Buymisemuŋ naŋ jeŋŋe na, i sa ɓam mbrike? Buymisemuŋ naŋ jeŋŋe ta asi naŋ mazuɓ himaˀ, a kiɗa ndra ti naŋ na kwa? Ya maɓi ani na, ka wuluk ngi mizli si. 6Ndiɗaˀ wãˀ si! Asi da Buymisemuŋ naŋ anta jeŋŋe ta na, a sa ga kiita da duniya mbri mbrike?

7Da kaɓa slir ɗu ara biga Buymisemuŋ naŋ kaslsla njah wãˀ, ɓa mizli a gakaŋ dudok aseˀe na, a giy kiita ka yi mbur migi mungra vur mi aruŋ maka? 8Na, da naŋ kine na, zuwen i ɓam: «Gukum gwat malambaˀ ɓa ɓi mezle a bo tiraˀa» ta vur mike? Mizli mekelemey a kupam ndra ɓi, kaɓa ndr'i ɓam le kanah. Mizli tayna a ndilaka le ter ngi ga taŋ kiita.

Mbur mijeŋŋe anta wãˀ

9Na mbri ska? Ndra Yudeheye, i funaka mizli mekelemeye le aruŋ kwa? Ndiɗaˀ wãˀ! Asi yi biga ɓi nah le zleˀe si, yi ɓi na: «Mizli gar, Yudehey ati mizli mekelemeye, taŋ rak raka, mungra a funa taŋ gidaŋ le gar taŋ.» 10A tohoko na: «Mbur mijeŋŋe anta wãˀ! Ko pal tekeɗe anta. 11Ko mbur misi ti lesl loŋ anta. Mbur masipa Buymisemuŋ loŋ anta. 12Mizli gar a ngizlam le avu jiviɗ mezle, taŋ jom gar, a zizam le cek. Mbur magi mezle, ada kwa? Ko pal tekeɗe anta wãˀ. 13ˀAy ngi ɓi ɓi taŋ, naŋ ka zivi mibaŋ. A gam gilaw da mizli ti irne taŋ. Mingiɓi mabo ti balam taŋ, naŋ kaɓa muwuŋ ngi kwecesle. 14Mingiɓi taŋ a nis vu mukuy ta wãˀ. 15A zuɓam sar kutum nga pi pumbus ngi mizli. 16Angi li taŋ macohom gar na, a hiryaka gwat ngi mizli, a gaka taŋ bonoy. 17Tˀanta gam gwat ko neˀ, ɓa mizli a cifam zuy zuyo ta. 18Zluwun ti Buymisemuŋ, anta ko neˀ a mihiri taŋ ta.»

19Naŋ kine, i sinaka le, ɓimujuwa maɓi gar na, a ɓi da mizli mahinam hirnga aseˀe, ɓa wereke a bo ti balam mizli mata, ɓa Buymisemuŋ a ga kiita da mizli ngi duniya kurzluˀ gar. 20Vurˀe, ko mbur anta ndir jeŋŋe a mbuŋ Buymisemuŋ asi naŋ maga gwat ɓimujuwa maɓa na ta. Naŋ kine, ɓimujuwa a biga ɓa mbur a sina, a gi mungra le.

Buymisemuŋ a laha mburo mbri mbrike?

21Amma wurenna, Buymisemuŋ a biga ndra di le, a ɗiya mizli jeŋŋe manja ɓimujuwa. Ɓimujuwa ati mijiviɗeye, a gaka sedewo naŋ anihĩ: 22Buymisemuŋ a ɗiya mizli jeŋŋe asi taŋ mitiɓaka Yesu Kristu. A ɗiyi di i mizli matiɓaka Kristu gar, asi mizli gar, taŋ rak rak a mihiri ngi Buymisemuŋ. 23Mizli gar a gam mungra le, a ndiram le manja luuma dudok ngi Buymisemuŋ. 24Amma asi gimezle naŋ na, a ɗiya taŋ le jeŋŋe ngatara tisi Yesu Kristu mambiɗa hirnga taŋ na. 25Buymisemuŋ a vul di i Yesu vuna ngi gi mikuli a mbuŋ Buymisemuŋ ngi buna mungra ngi mizli ti pumbus naŋ, asi tiɓi taŋ. Buymisemuŋ a wuɗ ɓa a biga avu mizli, naŋ jeŋŋe: asi ti mizli migam mungra angi hin naŋ muɓus ɓi zleˀe na, a pula ɓi nah le, a ga taŋ kiita ta. 26Amma dana so na, ara biga, naŋ, naŋ jeŋŋe. Asi a wuɗ ɓa naŋ da jeŋŋe, yo mbur mandir ti siifa vur naŋ matiɓa Yesu na, a ɗiyaŋ jeŋŋe ma.

27Ɓi ɓa mburo huhumvu naŋ aseˀe, ada anga kwa? Ko anta wãˀ si! Vur mi ska? Asi gi gwat ɓimujuwa maɓa na kwa? Anta aseˀe ta wãˀ, amma asi tiɓi. 28Naŋ kine, i waka na, mburo anta ndir jeŋŋe a mbuŋ Buymisemuŋ asi naŋ maga gwat ɓimujuwa maɓa na ta, amma asi tiɓi. 29Malla Buymisemuŋ vuna, i Buymisemuŋ ngi Yudehey tewle si kwa? I Buymisemuŋ ngi mizli mekelemey ta wal kwa? Kanah ta, i Buymisemuŋ ngi mizli mekelemey aya. 30Buymisemuŋ, naŋ purla, asi mike na, a sa ɗiya Yudeheye jeŋŋe, asi tiɓi taŋ, yo a sa ɗiya mizli Yude tahay na jeŋŋe asi tiɓi taŋ na ya. 31Ndra mitiɓam na, mbiɗeˀvra, i ra hizigaka ɓimujuwa avra, ka slra naŋ anta sukwa? Kanah ta wãˀ jak, i ra ɗuvaka hirnga da ɓimujuwa jaka.

Currently Selected:

ROMAHAY 3: BEGDC

Highlight

Copy

Compare