ƁIMUNJUYO Ɓi madiɗa madiɗa ngi raˀa
Ɓi madiɗa madiɗa ngi raˀa
Wãˀ naŋ na, Ɓimunjuyo, i ɗerewol ngi tisla mevel, yo ngi biga jiviɗ da Cikil ngi misikristu mudumbuŋhoy, mizli maguzuvraka taŋ asi ɓi ngi Bumbulvuŋ. Mutoho i mbur mihizigaka fuk ar maktura ngi Patmos. A toho angi kiɗa mi ngi vi skat mudumbuŋ naŋ. A zilaka mbur nah vuna Zaŋ. Angi sirik ngi mizli ti di nah na, i Zaŋ, mislin ngi Kristu. Mbur mutoho ɗerewolo, Bumbulvuŋ a bigaŋ di, a pur gwatay ti kleŋ, kaɓa misi angi ɗerewol Jumoˀay Magala, wãˀ naŋ na, misi angi Daniyel, yo angi Ezekiyel. I gwatay maɓam ɓi ngi mbuŋ ati ɓi ngi gwatay masa gam gweˀ si.
Zaŋ, Buymbulvuŋ mizilaŋ, naŋ mupura ti kleŋ, naŋ mija haŋ ati naŋ mutoho ɗerewol da cikil ngi misikristuhoy angi lihey taˀ taˀ tarnaˀ na (sap. 1 hã ndila sap. 4), a dirba nah, Zaŋ, mbur misi kileŋ, a toho ɓi mutuwaˀ tuwaˀhay masa gam angi kiɗa mi ngi duniya tumbuŋ.
Angi pur naŋ ti kleŋ dumbuŋ na, a pura Buymisemuŋ angi li cifi naŋ ngi buyo, yo Kristu, i tumuŋ, i mobor, a lum madiɗa le angi ɓihey mucohom gar. Gwatay Zaŋ mupura taŋ ti kleŋ na, a sipam vu asi cala asi cala, dum le na, i ɓi ngi lammaba tarnaˀ tarnaˀ, (sluruɓoy tarnaˀ, tulumoy tarnaˀ, fi tulumoy tarnaˀ). Zaŋ a toho ɓi ngi kiɗa vu ar wala ngi cikil ngi misikristuhoy ati duniya, ar wala ngi Kristu ati Satan, yo anga ma na, a biga ɓi ngi muŋ ati ngi li vu taŋ kahana kahana. Ndrehhe na, makiɗa mi ngi kiɗa vu, i luuma bugawla ngi Kristu ati ngi Cikil ngi misikristuhoy. Amma kaɓa a mi buzugum a mizaw, yam majiɗ jirif jirif, mami nga dirba a muŋ, ɓa a pula li da mekelem na, gwat Zaŋ mupura taŋ ti kleŋ na kwana, taŋ kanah ya. Mekelem mucuh le wãˀ na, nawaya mekelem pal ara bugo vu ma, hã a sipi kanah kanah. Gwatay mupura taŋ ti kleŋ tayna, slufa ɓi nah, naŋ tuwaˀ haɗa. Mubun ndar na, i ɓi maɓi ɓi ngi kiɗa vu ɓa ngi luuma zumabuy ngi duniya na. Ar ɓi nah na, mubugo vu anga, i Satan, mesene ngi Kristu waɗ mijiviɗ misi slir (sap. 12 waɗ sap. 13), Babiloŋ, walahay madiɗa, a diɗ le (sap. 17), yo a dirba nah wãˀ na, luuma bugawla ngi Satana diɗ le (sap. 20).
Sapitir ngi dirba mucuwoyo, a biga ndra ɓi ngi kiɗa mi ngi duniya, i mupura taŋ ti kleŋ vuna ma: muŋ nawayaŋ ati hirwuy nawayaŋ, a buguko vu, yo Zeruzalem nawaya a rapo sar paɗ a muŋ, ti ciki Buymisemuŋ.
Currently Selected:
ƁIMUNJUYO Ɓi madiɗa madiɗa ngi raˀa: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.