MIKUCUWULOY 4
4
Luma sinmijileŋ, yo wi vu ti sinmijileŋ
1Ziri, cine kum maɓukum ɗaˀ ɗaˀ na, cinaka,
jikam slimiɗ ɓa ki sinaka ɓi ngi lesle.
2Haˀaw, yi dubunukum di i gwat migisiŋ gisiŋ,
gwat ya mudubunukum di na, ki pulaka ta.
3Ya vuna kwana, ya teŋteŋ avu baha zleˀe ya,
yo maha a wuɗiy kaɓa mawuɗam zuŋ kirmalay.
4Baha a dubuniy gwata, a ɓiy na:
«Ja mingiɓi ɗu kuy kuy a mevel ɗike,
gwat ya mawuɗ na, ja taŋ a hirnga, naɓa madiya ˀaw a zuma zay ɗike.
5Anja ki lum sinmijileŋ, anja ki lum lesle.
Ki puyuk hirnga ti mingiɓi ɗu ta,
yo ki mbiɗi duba ava ta.
6Anja ki pula sinmijileŋ fuk ta, asi masa jiginuw i naŋ,
wuɗ sinmijileŋ, a sa ki slimiɗ ar ka.
7Ɓa ki ndir, ki mbur misi ti sinmijileŋ na, sey ki zla ti luuma sinmijileŋ,
yo gwat ngi lum ɗik gar na, vula ɓa ki lum lesle.
8Ja sinmijileŋ gumbuˀ, naɓa a sa gi ti ka mbur madiɗa,
da ki jaŋ le kuɓuy na, a sa ɗuvuw hirnga.
9A sa tiri i gwat ngi wuya mezle avu ka,
kaɓa loppol mimezle tuwaɗ tuwaɗ a hirnga.
Ki sipa sar ngi misi moˀoreheye ta, sinmijileŋ i nah.»
10Mangal ɗu, cin, tiɓa mingiɓi ɗu na,
naɓa hin ngi siifa ɗik a sa gi subur.
11Yi ra buguw jiviɗ ngi gi slra ti sinmijileŋ,
yi ra dubunuw sipa jiviɗ mikaslsla.
12Kanah na, kisa ru nga mbuŋ gu, ko gwat masa guw ngaˀ anta,
yo kisa kil kpaŋ kpaŋ, ko gwat mabuw sar anta.
13Gwat ya mudubunuw di na, cici zlak araŋ, ki pula ta,
wi di vi, asi i siifa ɗiki.
14Ki ci sar kulaˀ le ar jiviɗ ngi misi moˀoreheye ta,
ki sipa sar ngi migi gwat malambaˀahaya ta.
15Pula jiviɗ taŋ mbak ti mi teˀ teˀe, ki cuh ti raˀa ta,
mbiɗi duba, cuh tir li mekelem.
16Mizli tayna, da a gam malambaˀ geˀ le ta na, t'anta hinjam ta,
da a zlumburam mbur a ruwuy ta na, a hinjam ta.
17Asi a zumam i gwat taŋ malumaka ti jiviɗ malambaˀa,
yo gi moˀore a wa taŋ ka mbaazla.
18Amma jiviɗ ngi mizli mijeŋŋeheye, naŋ njahha ka li mawun,
a gi njahha ti vendeke, hã wuzla papasa.
19Na jiviɗ ngi misi moˀoreheye, i luvuŋ timbiɗim,
t'anta sinaka gwat masa ba taŋ sara ta.
Cici kaŋ kaŋ ar gwat ngi gi ɗike
20Mangal ɗu, ji lesl asi mingiɓi ɗu,
jika slimiɗe jak asi mi ngi kuti ɗuwoyo.
21Anja ki puyuk hirnga ti mingiɓi ɗu ta,
wi taŋ vu weˀ a hur mevel ɗike.
22Mizli gar mira tiɓaka taŋ a mevel taŋ na,
i siifa ati jam ngi vu avu taŋ.
23Dumbuŋ naŋ na, jigina mevel ɗik avu gwat ka mawulka gar,
asi siifa ɗik a bo ti vaˀaŋ.
24Ɓi muslurkoɗ slurkoɗ gar na, ki pula a bo ti irne ɗike ta,
yo pula ɓi ngi mbaɗa kileŋ avu ka.
25Anja ki pur hiri taˀ ng'ar mizli ngi mbuŋ ɗike,
yo anja hiri ɗik a ndir taˀ cir cir a mbuŋ ɗike.
26Wuluk kuy kuy ar jiviɗ ka mawuɗo zuɓa,
yo anja i jiviɗ migisiŋ.
27Anja ki ngizli avu jiviɗ ɗike, ti hazum ta, ti gula ta,
kirih kileŋ avu gi malambaˀa.
Bible en Langue Guiziga © L’Alliance Biblique du Cameroun, 2011.